Read Hrangkhol 1 THURCHI SUINA 28 Bible Online

1 THURCHI SUINA 28 - Hrangkhol bible

1 THURCHI SUINA 28

¹Davida’n Israel ulian hai, nam chi da danga hruaitu hai, rêng makunga sintho hranga a tha tina irthûlhai ngai, sâng chunga thuneitu hai, irza chunga hruaitu hai, rêng sum le pâi ram enkoltu hai, ama nâihai le sorkâr sinthotu hai murdi le pasal sahai chu Jerusalema a bukkhômhaia.

²Davida chu an lei chia an ngîra, an kuang khan, “Ki urêng ki mihriamhaio, ki thu hi irngai roi. RENGPA Thuthung Bôm siana, a ke irnghatna hrangin sin ki’rzuk ta taka, a hrât danghai khom ki panhaia.

³Khannisianlân sipai ki nia, thisen kin suaktir hrai tâk sikin Pathianin keima isin phal maka.

⁴RENGPA Israelhai Pathianin, ki urênghai laia, ki dam sûnga inlal hrangin a nin thang suaka, nam hruaitu Juda irchihai hi a indanghai a ni. Judahai laia chu keini in sûng mi hi a nin thanga, kin in mi laia keima hi a nin dit bîka, Israelhai rêngin a ni siama.

⁵Nâipasal tamtak a nin neitira, anni laia mi Solomona hi RENGPA rama Israelhai chunga rêng hrangin an thanga.

⁶RENGPA’N ki kuang, ‘Ni nâipa Solomona hin ki tempil chu sin ri se, ki nâi hrangin kin thanga, a pa ni pe ki ti,

⁷ki thu’nkung hai, ki thupêk hai, a zôm maiin chu an lalna hi kumtuanga indetin om a ti.’

⁸Khasikin, Israel mi murdi, RENGPA mi pungkhômhai le kin Pathian mithmua RENGPA’N a thupêkhai chu irngaitua’n irdîn takin om roi; khanchu hi ram satak hi nei nin ta; nin nâihai khomin kumtuangin fa thei an ti,” a tia.

⁹Solomona kuang khan, “Nang ki nâipa Solomona, ni pa Pathian hi pomin lân, irzuk tak le dik takin a sin tho’n lân, kin ingaitua le kin itumhai hi an hriat ving a ni. Ama hi ni zong photin chu hmu ngêt ni ti, nir ngaitua no’n chu nang pai zôi a ti.

¹⁰A hmun irthianga in sin hrangin RENGPA’N nang an thang ti inhre ro, irnak songin lân, sin phut chian ta ro,” a tia.

¹¹Davida’n a nâipa Solomona kuang khan tempil sinna hrang irfûka, a thil siakhômna hmun le tentan chi da dang, hmun irthiang tak le sual ngaidamna hmun siam hrang dânhai a pêka.

¹²A kholâi irkul irvôtir hrang dânhai, a kôla insin hrang dânhai, tempila hmang hrang bêl le bûr siana hrang hmun hai, RENGPA makunga thilpêk sia irfûkna sin hrang dânhai a hril pe vinga.

¹³Ochaihai le Levihai sintho hrang, tempil sûnga an sintho hrang dân hai, tempila bêl le bûr enkol dân hrang hai a hril saa.

¹⁴Bêl le bûr siamna hrang sumru le rângachak i dôr mo hmang hrang ti le,

¹⁵meiser le a siana siam hrang dân,

¹⁶sumrua siam dokâng, Pathian hranga bai ser bîk siana dokâng siama sumru a ihmang hrang zâthai a hrila.

¹⁷Thîr kut hai, tâbor hai le uain tui siana rângachaka siam hmang zât hrang hai, khêng siamna hranga sumru le rângachak hmang hrang dânhai a hril pe vinga.

¹⁸Mirimhoi hâlna hranga dokâng siamna hrangin rângachak inzen hmang zât hrang hai le, RENGPA Thuthung Bôm chunga Cherub mitha phar tâli siamna’n rângachak inzen hmang zât hranghai a hrila.

¹⁹Reng Davida’n, “RENGPA ni ihril lam taka tho hrangin hihai hi irziak ving a ni,” a tia.

²⁰Reng Davida’n, a nâipa Solomona kuang, “Ni tumna inthûktirin lân, irnaksongin lân, sin phut ta ro, tûte’n nan hnungtir no ri sehai, ki Pathian a sin ki itho pe ngaiin nang ompui a ti. RENGPA’N a tempil ni sin zoi mâka nan tha no ni.

²¹Tempila ochaihai le Levi irchihai tho hrang infel a ni tâka, mi theithiamhai sin irzuktak tak an tama, mihai le an hruaituhai chu ni thu nghâkin an iom rum a ni,” a tia.