Read Hrangkhol 1 THURCHI SUINA 29 Bible Online

1 THURCHI SUINA 29 - Hrangkhol bible

1 THURCHI SUINA 29

¹Reng Davida’n irbukkhômhai laia, “Ki nâipa Solomona hi Pathian inthang mi a nia, khannisian, a la nâiinpang hraia, a sia le sa lan hriat infel maka. Sin tho hrang lak a tama, a isin hrang lak hi mihriam in ni maka, RENGPA Pathian in a ni.

²Ki thei la lamin ki hrâtna ki lei hmang tâka, rângachak hai, sumru hai, dârhai, thîr hai, thing hai, lunghlu hai, lung mantam hai, lung enhoi, le sailungvâr hai ki bukkhôm tâka.

³Hi khêla khom keima sum rengata sumru le rângachak ki pêka, Pathian tempil hrang hi ki’rvei sikin.

⁴Ofir rângachak a sa zât her nuaikhat, hâl irthiang sai sumru her nuai hni sîngminli vêl tempil sûng tianga bang irvôtirna hai,

⁵A theithiamhaiin an nuam lam taka irvôtirna hrangin ki pêka, RENGPA hrangin tu mo thilpêk sat irngaia pe thei?” a tia.

⁶Nam tina hruaitu hai, le sorkâr sinthohaiin irphal takin thil an pêk tâka.

⁷Tempil sinna hrangin rângachak her nuaikhat sîngsari, sumru her nuai irzathum sômminli, dâr her nuai irzaruk sômhni, thîr her nuai sômthum irzaminli nêka tam khom an pêka.

⁸Lung mantam neihai khomin, RENGPA tempil hrangin an pêka, Gersona irchi Jehiela’n a enkola.

⁹Mipuihai an râi a fân pehaia, phal takin mâni thua RENGPA hranga pêk an ni sikin an lôm a ni, rêng Davida khom a sate’n a lôm a ni.

¹⁰Khasikin, Davida’n Israel irbukhai laia RENGPA an pâka, “O RENGPA kin pu Israelhai Pathian, kumtuanga inpâk inruk ni ni.

¹¹Ni roiinpuia, sinthothei tak ni nia, ni’rsânga, ni saa, irnêng le irvâna thilhai hi ni ta a nia, o Pathian an laltak ni nia itinrêng chunga thuneitu ni ni.

¹²Irchongna le chôiindômna murdihai hi nangma ata hong suak a nia, hrâtna le sinthotheina ni neia, mi ni siam inlianin nin hrâttir thei.

¹³Khasikin kin Pathian kuang lômthu kin hril, nir hming roiinpui kin inpâk a ni.

¹⁴“Keima le ki mihaiin hi dôra tam ni makunga thilinhlan kin ipêk thei hi, kin thei sika ni maka, itinrêng hi ni ta a nia, khasikin ni ta hi kin hong ipêk nôk a ni.

¹⁵O Pathian, ni makunga chu kin pi le puhai ang khan, keini khom mikhual, zoro sôtnotea om ang hi kin nia, kin dam lai nihai chu irhlîm anga om a nia, a ihek zôi ngai a ni.

¹⁶O RENGPA kin Pathian nir hming inpâkna hranga ni in sinna kin hrâtna hai kin insuakhai hi, nangma ata suak a nia.

¹⁷Mi lungrîl ni fia ngaia, mi nun sahai chu ni lôm ngai. Keima’n chu hi thilhai hi phal taka lungrîl fel le dik tak irputin ki hong inhlan a ni, ni mi hong pungkhômhai khomin thilinhlan hong pêk nuam dân ki ihmu a ni.

¹⁸O Pathian kin irchibul Abrahama hai, Isaka hai, Jakoba hai Pathian, hianga lungrîl hi ni nâihai irputtirhai maiin lân, nangma hranga iamoma an om mai theina hrangin hrunghai ro.

¹⁹Ki nâipa Solomona hi, ni thupêk irzuk taka a zôm theina hrangin hrungin lân, ni tempila hmangrua ki ilâk pehai hi, a sin zoi theina hrangin changpui mai ro,” a tia.

²⁰Davida’n mipuihai chu, “Nin Pathian RENGPA hi inpâk roi,” a tia. Irbukkhômhaiin an irchi Pathian RENGPA an inpâka, an kûna, RENGPA chôiindômin, rêng khom an chôiindôm sa.

²¹Zînga chu sa an thata, RENGPA hrang thil an inhlana, mipuihai khom an infâktir hai, sehrât sângkhat, kêlbelra sângkhat, belrate sângkhat an thata, maichâma hâlirvôm thil an inhlana. Uain thilinhlan khom an neia.

²²Kha ni khan chu RENGPA kuang raifân takin an fâkin an ina. Solomona chu rêng a nih ti an inpuang nôka, RENGPA irhmingin roirêltua sahriak an pol nôka, Zadoka khom ochai ni hrangin sahriak an pol tâka.

²³Khanchu, Solomona’n a pa rêngtoihmun, RENGPA inding pe kha a lua tâka, rêng hlochuk tak a nia, Israel mi murdi’n a he an lâka.

²⁴Sorkâr mi lian, sipaihai le Davida nâi danghai khomin Solomona chu an rênga tep hrangin chong an inkunga.

²⁵Solomona chu RENGPA’N nam pumpuihai irngaisâng an nitira, Israelhai chunga roirêltu murdi irthûlin, Solomona’n a mihai a ichôiirsâng a ni.

²⁶Jesaia nâi Davida chu Israel murdihai chunga,

²⁷Kum sômminli an lala, Hebrona kum sari, Jerusalema kum sômthum inthum.

²⁸Tar kûna damin a thia, ar chonga, mi’n an inzaa, a nâipa Solomona’n ar thûlin an lal nôk ta.

²⁹Davida thurchi a phut ata a mong dênin deipu inthum Samuela, Nathana le Gada hai lekhabua irziak ving a ni.

³⁰A roirêl dânhai, a sinthothei lamhai, a chunga thil tunghai, Israel le a kôlvêl ram chunga thil tunghai an irziak ving a ni.