Read Hrangkhol 1 THURCHI SUINA 5 Bible Online

1 THURCHI SUINA 5 - Hrangkhol bible

1 THURCHI SUINA 5

¹Jakoba nâi ulian tak Reubena irchihai chu hihai hi an ni. (Reubena hin a pa lâksîr a zâlpui sikin a nâilutîr tak sutpai a nia, Israel nâi Josefa inchanga pêk a ni, khasikin nâilutîr irtepna hin ar hming a iom ta loi a ni).

²Juda irchihai hin an urênghai an khêla, anni lai ata rêng a hong suak mâka chu nâilutîr nitna chu Josefa changtum a ni ta.

³Israel inei masa tak Reubena’n nâipasal minli, Hanoka, Palua, Hazrona, le Karmia a neihaia.

⁴Joela irchihai chu a’rlo fe dân angin Semaia, Goga, Simeia

⁵Mika, Reaia, Baala

⁶le Beera hai an ni, Beera hi Reubena irchihai laia a hruaitu tak a ni. Assuria rêng Tilgatpilnesera’n a chela, salin a hruaia.

⁷An sûngkua thurchi irziakna hin Reubena irchi laia hruaituhai irhming vai hi a chuang. Jeiela, Zekaria,

⁸Bela hi Azaza nâi a ni, a pu chu Sema, Joela irchi mi a ni. Joela irchihai hi Aroer khuaa an om. Hmâr tiang ram Nebo le Baal-meon dênin an donga.

⁹Gilead rama hin belra le kêl an nei intama; khasikin nisua ramchârna ram, Eufrates vadung dênin an ilua a ni.

¹⁰Reng Saula zoro lai khan Reubena hai hin Hagari hai an doihaia, an thathaia, Gilead ram nisua tianga an ram an sutpaihai tâka.

¹¹Reubena hai zoia chu Basan rama hin Gada irchia mihai an oma, nisua tiang Saleka dênin an sipa.

¹²Joela irchia mi hi a tam ual tak an nia, Sefama irchia mihai hi anni zoi renga tam an ni. Janaia le Sefata irchi hi Basan rama irchi dang viat omhai chu an ni.

¹³Gada nam laia hi irchi sarihai khom hi tep sa an ni; Mikaela, Mesulam, Seba Joraia, Jakana, Zia, Ebera hai hi, an rêngin sari an ni.

¹⁴Hihai hi Huria nâipasal Abihaila irchihai an ni. Huria pa chu Jaroa a ni, kha mi pa kha chu Gilead a ni, a pa chu Mikaela a ni. Mikaela pa chu, Jesisaia a ni, ama pa nôk chu Jadoa a ni, a pu chu Buza a ni.

¹⁵Hi irchihai sûnga a hruaitu tak chu Abdiela nâipasal Ahia a ni, a pa chu Gunia a ni.

¹⁶Gilead le Basan rama khua chîntea om a ni, Saron ram hnuaia an irthek indarh a ni.

¹⁷Juda rêng Jothama le Israel rêng Jeroboama hai zoro lai hin rêngin hi irchi irsui dân hi an irziak suak a ni.

¹⁸Reubena hai, Gada hai le nisua tianga om Manasea nam tômtehaiin pho, khandai le thal hmang dân thei sipai sîngminli sângminli le irzasari sômruk an neia.

¹⁹Hagari nam Jetura, Nafis, Nodab hai leh an irdoia.

²⁰Pathian an iama, changpui hrangin an ngêna, Pathianin an chongchaina chu a sâmhaia, Hagari hai chu an lei irsanpui namhai leh an inhnêhai tâka.

²¹An râlhai saringsei sîngringa, belra nuaihni sîngringa, sakuartung sânghni le mihriam nuaikhat an chelhaia.

²²Pathian irhminga irdoi an nia, mi tamtak an ithathai a ni. Sala an intâng mân chu kha rama khan an om ta a ni.

²³Nisua tianga Manasea irchia mi omhai chu Basan le hmâr tianga om Baal-Harmon, Senir, Hermon tâng dênin an oma, a sate’n an pung hrâta.

²⁴An laia hruaituhai chu Efera, Isia, Eliela, Azriela, Jeremia, Hodavia le Jadiela hai an ni. Sipai hâitak tak an ni, an irchihai laia chu hruaitu satak an ni.

²⁵Mihaiin an pahai Pathian mâksana; kha rama lei om, Pathianin a inhnotsuak hai pathian an biak tâka.

²⁶Khasikin Pathianin Assuria rêng Pula, Tilgatpilnesera an iti pa chu an omna ram a hon doitira, Reubena irchihai, Gada irchihai le nisua tianga om Manasea irchihai chu a koibukhaia, Hala, Habor, Hora, le Gozan tui kôla an omtirhai tâka.