Read Hrangkhol 1 THURCHI SUINA 9 Bible Online

1 THURCHI SUINA 9 - Hrangkhol bible

1 THURCHI SUINA 9

¹Israel mi murdihai irhming chu irziak ving a ni. “Israel rênghai ti lekhabua” irziak lût a ni. Judai ram mi murdihai sualna sikin Babulon sala hruai lût ving an ni.

²An in le loi omna khuahai kîr masahai chu, Israel mi narân hai, ochai, Levi irchia tempil enkoltuhai an ni.

³Juda nam, Benjamina nam, Efraima nam, le Manasea hai chu Jerusalem khuaa om hrangin an fea.

⁴Juda nâi, Pereza irchihai hruaitu Amihuda nâi pasal Uthaia a ni, a pu chu Omria a ni. A’rchihai laia Imria le Bania an om sa.

⁵Juda nâi Sela irchihai hruaitu chu Asaia a nia, an hruaitu tak a ni.

⁶Juda nâi Zera irchihai hruaitu chu Jeuela a ni, Juda irchi Jerusalema omhai chu mi irzaruk sômkuak an ni.

⁷Benjamina nam sûnga lût Jerusalema omhai chu hihai hi an ni. Mesulama nâi Salua hai in mi, Mesulama pa hi Hodavia a nia, a pu chu Hasenua a ni.

⁸Jehorama nâipasal Ibneia hai in mi. Uzia nâipa Mikria tupa Ela-hai in mi, Sefatia nâi Mesulama hai sûngkua: Sefatia Reuela nâi Ibnija tupa a ni.

⁹Hi namhai hi Jerusalema in sûng mi irzakuak sômringa kiruk an om. An irhming târinlanghai hi an hruaituhai an ni.

¹⁰Hi ochaihai hi Jerusalema om an ni. Jedaia, Jehoiariba, Jakina, Hilkia nâipa Azaria, ama hi an tempil sûnga an hruaitupa tak a ni. A puhai chu a dônte’n hihai hi an ni.

¹¹Mesulama, Zadoka, Meraiota, Ahituba, Jehorama, nâipa Adaia a ni, ama hi a pu chu Pasura le Malkija hai an ni.

¹²Adiela nâipa Maasaia, a puhai chu Jazera, Mesulama, Mesilemita le Imera hai an ni.

¹³Ochai in sûng mi ulianhai chu mi sângkhat irzasari sômruk an ni, tempila tho hrang tinrêng tho thei ving an ni.

¹⁴Levi in sûng mi Jerusalema omhai chu: Hasuba nâipa Semaia, a puhai chu Azrikama le Hasabia an ni, hihai hi Meraria nâihai an ni.

¹⁵Bakbakara, Heresa, Galala le Mika nâipa Matania, hi hi Zikri nâipa a nia, ama hi Asafa nâipa a ni.

¹⁶Semaia nâipa Obadia, ama hi Galala nâipa a nia, ama hi Jeduthuna nâipa a ni. Khan, Asa nâipa Berekia hi Netofa khuaa mi Elkana nâipa a ni. Netofa khoram sûngkuaa om ngai an ni.

¹⁷Hi sipaihai hi Jerusalem tempil sûnga om an ni. Saluma, Akuba, Talmona, Ahimana le Saluma, hi pa hi an ulian tak a ni.

¹⁸Hi zoro tena hin chu rêng mikot an iti nisua tianga om ngai an ni. Atûn hin chu Levia irchihai omna mikot an ihrung a ni ta.

¹⁹Korea nâipa Saluma, Ebiasafa tupa chu Kora irchihai le an biakbuk inkhâr enkoltu a ni, an irchihai khom RENGPA omna in enkoltu an ni.

²⁰Eleazara nâipa Finehasa chu RENGPA’N ompui ri se, an ulian tak a ni.

²¹Meselemia nâipa Zekaria khom biakbuk inkhâr enkoltu a ni.

²²Inkhâr entu mi irzahni sômhleihni an inthang suakhaia. An omna khua a dônte’n an irhming an irziak pehai. Reng Davida le deipu Samuela’n an sintum an izêk pehai a ni.

²³Annihai le an irchihai hin tempil inkhâr chu an ihrung a ni ta.

²⁴Sim tianga, hmâr tiang, nisua le nitâk tianga inkhâr omhaia khan, an sika hruaitu an om chita.

²⁵Khan, an urênghai, an khuaa omhai kha, sûn sari sûng rikipa sin thoa anni leh om hrangin a kâr kârin an ihong ngai hrang a ni.

²⁶Hi hruaitu minli, irchamneituhai hi Levi irchia mi an ni. Tempila tentan dang dang le a sûnga thil irhmang thei loi hrang tena hi, an mophurna a ni.

²⁷Khaangin, a zîng tin hi tempil inhongin, a enkol pumin an ihrung mai ngai a ni.

²⁸Levi irchi sûnga mi danghai chu tempila bêlbûr enkoltu an ni, an hmang hrang an irsinsiahai vinga, an hmang zoiin an hong pêk kîr nôk khomin an irsinsia le an lei en indik ngai a ni.

²⁹Senkhat chu tempil thil ser enkoltu an ni; baidi, uain, oliv hriak, mirimhoi hâl zât, mosola hai ten an kut chunga om a ni.

³⁰Mirimhoi hâl hrang le mosola irzêl chu ochaihai tho hranga a ni.

³¹Kora irchia Saluma nâilutîr Matithia chu khuria thil inzêi tianga enkolna sin ngai a ni.

³²An urêng senkhathai, Kohatha mi irchihai chu sabat nia bai siam ngaihai an ni.

³³Levi irchia mi, mi senkhat chu tempila irhâihoi tumtu an ni, a sûn le zân itiklai khoma hmang thei an ni sikin, an hruaituhai chu tempil tentan senkhata omin ite sin dang tho ta ngai mahai.

³⁴Hi irhming târinlanghai hi Levi irchi dang dang, an irchi suina khoma an hruaituhai an ni, Jerusalema an hruaituhai an ni.

³⁵Gibeon hai hruaitu Jeiela chu Gibeon khua mi a nia, a dôngma chu Maaki a ni.

³⁶A nâipa ulian tak chu Abdona a ni. Ama nâihai chu Zura, Kisa, Baala, Nera, Nadaba,

³⁷Gedora, Ahioa, Zekaria le Miklota an ni.

³⁸Miklota hi Simea pa a ni. Hihai hi Jerusalema an irchi a dang omhai chu an ni.

³⁹Nera hin Kisa a neia, ama hi Saula pa a ni. Saula hin nâi minli a neia, Jonathana, Malkisua, Abinadaba le Esbaala hai hi an ni.

⁴⁰Jonathana hin Merib-baala a neia, ama hi Mika pa a ni.

⁴¹Mika hin nâipasal minli Pithona, Meleka, Tarea, le Ahaza a neihaia.

⁴²Ahaza’n Jara a neia, ama hin nâipasal inthum Alemeta, Azmaveta le Zimria a neihai. Zimria hin Moza a neia.

⁴³Moza nâipa Binea a nia, Binea chu hin Refaia a neia, Refaia hin Azela pa Eleasa a nei.

⁴⁴Azela hin nâipasal kiruk, Azrikama, Bokerua, Ismaela, Searia, Obadia le Hanana hai hi an ni.