Read Hrangkhol 2 THURCHI SUINA 1 Bible Online

2 THURCHI SUINA 1 - Hrangkhol bible

2 THURCHI SUINA 1

¹Reng Davida nâipa Solomona’n a ram sûnga inhrât le indetin a oma. RENGPA a Pathianin sat a vura, a hong roiinpui ok tâka.

²Khan Solomona chu Israelhai murdi chu sipai sâng hruaituhai, irza hruaituhai, roirêltuhai le Israel ram pumpuia mi lianhai, in sûnga ar lua murdihai chu a chongpuihaia.

³Khanchu Solomona leh inkhôm mihai murdi chu Gibeon khua hmun irsânga khan an fea; kha khan RENGPA siahlo Mosia’n ramchâra Pathian biakna in a sina.

⁴Pathian bôm rêk chu Davida’n a lei isinna hmuna Kiriath-jearim ata Davida’n a lei lâk nôk tâka, Jerusalema a siana hrang puan in a lei zar tâka.

⁵Khanchu Hura nâi Uria nâipa Bezalela isin dâr maichâm kha RENGPA biakna in kôla khan a oma; khan Solomona le mipuihai khan an va pana.

⁶Solomona chu irtongna puan in kôla dâr maichâm omna RENGPA makunga khan a hong fea, hâlirvôm thilinhlan sângkhat a hong inhlana.

⁷Kha ni zân khan Solomona kuang Pathian a inlâra, a kuang, “Imo nang ki ipêk hrang? ni zong ro,” a tia.

⁸Khan Solomona’n Pathian kuang, “Ka pa Davida kuanga khan lungthungna irkhêltak nin langtira, ama irthûlin rêngin ni ni siama.

⁹Khanchu, o RENGPA Pathian, ka pa Davida kuanga ni chonginkung kha hlo inchuktir ro, nangin mipui tamtak tep zoi loihai chunga rêngin ni ni siama.

¹⁰Khanchu hi mipuihai kôla suak le lûta ki om theina hrangin vârna le inhriatna ni lei pe ro; ni mi, hi dôra tamhai laia hin tu mo roirêl pehai hrang?” a tia.

¹¹Khanchu Pathianin Solomona kuang, “Hiang hin lungrîl ni’rputa sum le pâihai, irchongnahai, chôiindômna hai, nangma kaihruaitu kuang hringna zong loiin, dam sôtnahai khom zong loiin, an chunga rênga nang ki isiamnahai ki mihai chunga roi ni rêl theina hrangin vârna le inhriatnahai ni zong sika hin.

¹²Vârna le inhriatnahai chu pêk ni ni tâka. Khan matona rênghai khomin an la inei ngai loi, inhnunga khom an inei loi hrang sum le pâihai, irchongna hai, chôiindômna hai nang pe sa ki ti,” a tia.

¹³Khanchu Solomona chu hmun irsâng kôla biak in omna Gibeon khuaa inzin chu Jerusalema a fea, Israelhai chunga roi a rêla.

¹⁴Khan Solomona’n tâli le sakor chung chuang mihai a koibukhaia, tâli sângkhat le irzaminli le sakor chung chuang mi sîngkhat sânghni a neia, khahai kha tâli hrêna khuahai, Jerusalem khuaa rêng omnahai khan a hrêa.

¹⁵Khan, rêngin Jerusalem khuaa khan rângachak le tangkaruahai chu lung anga ngaiin a siahai hluka.

¹⁶Khan, Solomona inei sakorhai chu Aigupta ram ata zuang hôlhai an nia; rêng suminpâr mihaiin an lei lâk pe ngaia.

¹⁷Aigupta rama mi tâli chu tangkarua sekel irzaruk le an irthûlpuihaia, khan sakorhai chu tangkarua sekel irzakhat sômringain, khahai ang khan Hit mihai rêng murdihai le Suria rênghai khom an irthûlpuihai a ni.