Read Hrangkhol 2 THURCHI SUINA 11 Bible Online

2 THURCHI SUINA 11 - Hrangkhol bible

2 THURCHI SUINA 11

¹Reng Rehoboama Jerusalem a va tungin chu, Benjamina mi le Judahai laia sipai sahai nuaikhat le sîngriat a bukhaia, hmâr tianga om Israelhai chu a thuhnuaia siahai nôk hrangin a ibei tum a ni.

²Khannisian, Pathian mi, Semaia kuang RENGPA thu a zuang tunga:

³Reng Rehoboama hai, Juda le Benjamina mihai kuang hiang hin an hriattira:

⁴“Nin urêng Israelhai chu doihai no roi, rot ving ta roi. An sintho chu keima thua an itho a ni,” tiin RENGPA thupêk an poma, Jeroboama kha doi ta mahaia.

⁵Rehoboama chu Jerusalema a oma, Judai ram le Benjamina-hai ram sûnga hi khuahai hi ar kula.

⁶Bethlehem hai, Etam hai, Tekoa hai,

⁷Bethzur hai, Soko hai, Adulam hai,

⁸Gath hai, Maresa hai, Zip hai,

⁹Adoraim hai, Lakis hai, Azeka hai,

¹⁰Zora hai, Aijalon hai, Hebron hai,

¹¹Hi khuaa kulhai hi iamom takin a sina, kho tina hruaitu an thanghaia, kho tina buhai, oliv hriakhai, uainhai a bukkhôma.

¹²Ufeihai le pho a buka, khaang khan Judai ram le Benjamin rama mihai chu a thuhnuaia a isiahai thei a ni.

¹³Israelhai ram bial tina om ochaihai le Levi irchihaiin sim tiang an pana, Judai rama an lûta.

¹⁴Levi irchihaiin an sâ vâina sahai leh an ram an inhroi kha an mâksana, Judai rama Jerusalema an honga, Jeroboama le a thûl hrangtuhai khan RENGPA ochaiin hmang nuam mahaia.

¹⁵Jeroboama khan nam dang pathian biakna hmun irsânga sintho hrang, sehrâtchal irlim siam chophai le khohri biakna hmuna sin hrangin ama ochai a inkung a ni.

¹⁶Israel namhai laia RENGPA, Israelhai Pathian bê ta tak nuamtuhaiin Jerusalema Levi irchihai an hong zuia, an irchihai Pathian RENGPA kuang thilinhlan an inhlan theina hranga hong an ni.

¹⁷Hi sika hin Judai ram chu Solomona nâipa Rehoboama tiang an kopa, rêng Davida le Solomona inlal lai ang khan an iom a ni.

¹⁸Rehoboama’n Davida nâi Jeremota nâinu Mahalati chu dôngma’n a neia, a nu chu Eliaba nâinu, Jesaia tunu Abihaili a ni.

¹⁹Nâipasal inthum Jeusa hai, Semaria hai, Zahana hai an neia,

²⁰zoro hong sôt ual tena chu Absaloma nâinu Maaki a nei nôka, nâipasal minli Abija hai, Ataia hai, Ziza hai, Selomita hai a neihaia.

²¹Rehoboama hin dôngma sômhleiriat le lâksîr sômruk a neia, nâipasal sômthum kiriat le nâinupang sômruk kiriat a neia. A dôngma le a lâksîrhai laia Maaki hi an dit tak a nia,

²²Abija hi a nâihai laia a inhlutak a nia, ama thûl hranga rêng chang hrangin a inthang a ni.

²³Rehoboama’n a nâihai hmang dân a theia, Judai le Benjamina ram sûng khopui kul nei murdia hruaitu a siahaia, anni hrangin ar phal oka, dôngma khom an neitirhai tuaia.