Read Hrangkhol 2 THURCHI SUINA 12 Bible Online

2 THURCHI SUINA 12 - Hrangkhol bible

2 THURCHI SUINA 12

¹Rehoboama rêng a hong chang indet zoiin chu a mihai leh RENGPA dân uksak loiin.

²Rehoboama kum ringa an lal kumin RENGPA an uksak no sikin hremna an tuanga, Aigupta rêng Sisaka khan

³sakor tâli sângkhat irzahni, sakor chung chuang mi sîngruk le sipai tep zoi loi, Lub hai, Suki hai le Sudan sipai pâlhai leh Jerusalem chu an hong rûna.

⁴Judai ram kho kul neihai an hong lâka, Jerusalem khom an hong tung tâka.

⁵Sisaka chia Judai ram hruaitu Jerusalema hong rothai le rêng Rehoboama kuanga khan deipu Semaia chu a fea, an kuang, “Hi hi RENGPA thu chu a ni. Nin ni mâksana, kei khom Sisaka kuta nangni ki imâksan a ni,” a hong tia.

⁶Reng le hruaituhaiin, “Thilsual kin itho a ni, RENGPA hin a tho indik a ni,” an tia.

⁷An sinthohai kha an hriatin RENGPA thu chu Semaia kuang a zuang tunga, a kuang, “Thilsual kin tho an ti tâk sikin inhekhai ta no ning. Sisaka hin Jerusalem a hong doi tena, ki ningmurna chu Sisaka hmangin an chunga insum ual no ning, a sen chu an dam suak ki iphal pehai hrang a ni.

⁸Sisaka’n khua chu la a ta, irnêng rêng sintho le ki sintho an nang loizia inhria an ti,” tiin.

⁹Sisaka’n Jerusalem chu a doia, a tempil le a rêngin thilhlu omhai chu a lâkpai vinga. Reng Solomona’n rângachak pho a isinhai khom a rêngin a lâkpai vinga.

¹⁰Khahai nêkin Rehoboama’n dâr le pho a sina, rêngin mikot hrungtuhai kuta a pêka,

¹¹rêng chu tempila a fe richamin a hrungtuhaiin pho an chôia, an zuia; a hrungna sûnga an sia nôk ngaia.

¹²RENGPA kuang irhnuai takin an intûklût tâk sikin, RENGPA ningmur khan soisakhai ta maka, Judai rama mihai khom hoi takin an iom nôk thei a ni.

¹³Rehoboama chu Jerusalema an lala, a rêng chang chu a det pe oka, rêng a changa hin kum sômminli mi a nia, Jerusalema kum sômhleisari roi a rêl saa. Israel ram murdia khuahai chu ama chubai mûkna hmun hrangin, RENGPA khan a inthang a ni. Rehoboama nu chu Amon mi, Naamaii a ni.

¹⁴RENGPA nuamlam sin tho hrang a ngaitua no sikin thilsual a thoa.

¹⁵A phut ata a mong dênin Rehoboama sintho le a in mihai thurchi chu deipu Semaia thurchi irziakna lekhabua a chuang. Rehoboama le Jeroboama chu an irdoi mai a ni.

¹⁶Rehoboama chu a thia, Davida khopuia an phûma, a nâipa Abija chu ama irthûlin an lala.