Read Hrangkhol 2 THURCHI SUINA 13 Bible Online

2 THURCHI SUINA 13 - Hrangkhol bible

2 THURCHI SUINA 13

¹Israel rêng Jeroboama kum sômhleiriat an lal kumin Abija chu Judai rama rêng a changa,

²Jerusalema kum thum an lala, a nu chu Gibea kho mi Uriela nâinu Mikaii a ni. Abija le Jeroboama chu an irdoia,

³Abija chu sipai hâi inthang nuaiminli a hmanghaia,

⁴Efraima tâng ram Zemaraim tâng sîpa Abija a ngîra, Jeroboama le Israelhai chu an khêka, “Ki thu hi lei irngai roi,

⁵RENGPA, Israelhai Pathianin, Davida le a’rchihai kuang Israel mihai chunga rêng nina chu thuthung neiin a pêk tâka, ti nin la inhriat loi ma ni?

⁶Davida nâipa, Solomona siahlo Nebata nâipa Jeroboama chu a pu kuang ata tehel a zonga, mi chanlamboihaiin an inpâka.

⁷Solomona nâipa Rehoboama chu ite bêin bê maka; ama lak nâipang a nia, annihai ngam hrangin a lungrîl la puihling maka.

⁸Davida irchihai kuang rêng thuneina RENGPA ipêk khôkmâkin nin sipai tam le Jeroboama sehrât irlim, nin pathian hranga a isiam songin nin hong pûta.

⁹RENGPA ochaihai le Levi irchihai kha nin inhnot dokhaia, nam danghai tho dân angin ochai hrang nin inkunghaia. Sehrâtchal hong kaihai chu kêlbelra sari mani, hong hôlhai kai chu, kin ochai tiin nin lei hmang nuamhai ngaia.

¹⁰“Keini’n chu kin Pathian RENGPA sin kêng kin itho, la irheisan ngai ma ung, Arona irchia ochaihaiin an thotum an thoa, Levi irchihaiin an ihruaihai a ni.

¹¹Zîng tin le khohloi tina RENGPA ta hrangin mirimhoi an hâla, hâlirvôm thilinhlanhai khom an inhlan ngai a ni. Bai kathâr chu dokâng irthianga an sia mai ngaia, khohloi tiang chu rângachak meiser khom an la ihâl mai ngai a ni. Keini’n chu RENGPA thupêk kin la zôm mai ngai a nia, nangni rêkin chu nin imâk tâk a ni.

¹²Pathian chu a ni hruaitu a nia, a ochaihai khom irdoina bekul tum hrangin an irsiam diam a ni. O Israelhai, nin irchibulhai Pathian RENGPA hi lei doi no roi, zoi no chin ni,” a tia.

¹³Khaang khan Jeroboama’n a sipai senkhathai chu Juda sipai hnenghai hrangin a siahaia, senkhat chu an hnung tianga doihai hrangin an fetirhaia.

¹⁴Judahaiin an hong thîrhaia, an râlhaiin an irhualhai tâka, RENGPA chu an koia, ochaihaiin bekul an tuma,

¹⁵Judahai chu an khêklula, Abija’n a hruaihaia, an doia, Pathianin Jeroboama le Israelhai chu an hnêhai tâka.

¹⁶Israelhai chu Judahai makunga an intâna, Pathianin Judahai chu an hrâttirhai tâka.

¹⁷Abija le a sipaihaiin Israel sipaihai chu an doktirhai tâka. Israel sipai sahai nuairinga vêl an thathai a ni.

¹⁸Judahaiin an irchihai Pathian RENGPA chu an irnghatna a ni sikin Israelhai an inhnêna a ni.

¹⁹Abija’n Jeroboama sipaihai chu a’rzûlhaia, an khopui senkhat Bethel hai, Jesana hai, Efron hai le a kôlvêla khuahai a sutpaihaia.

²⁰Abija dam sûngin Jeroboama chu ngîrsuak thei ta maka, RENGPA’N a ithatpai tâk a ni.

²¹Abija chu a hong hrât sit sita, dôngma sômhleiminli a neia, nâipasal sômhni inhni le nâinupang sômhleiruk a neia.

²²Abija thurchi dang, a thuhril le a sin thohai chu deipu Idoa thurchi irziakna lekhabua a chuang.