Read Hrangkhol 2 THURCHI SUINA 14 Bible Online

2 THURCHI SUINA 14 - Hrangkhol bible

2 THURCHI SUINA 14

¹Reng Abija chu a thia, Davida khopuia rênghai thâna an phûma. A nâipa Asa chu ama irthûlin an lala. Asa inlal kum sôm sûng chu râl irvei loiin an oma,

²Asa’n thil dik le thil sa, a Pathian RENGPA mithmua a tho ngaia.

³Nam dang maichâmhai le an pathian biakna hmun irsânghai a pai pehaia, an lung millimhai an khoipai pehaia, Aseri irlim an iphun kha an siat pehaia.

⁴Judai rama mihai chu an irchibulhai Pathian RENGPA nuam lama sintho le a dânhai zôm hrangin a hrilhaia.

⁵Judai ram sûng kho tina nam dang pathian biakna hmun irsânghai le an mirimhoi hâlna maichâmhai chu a pai pehaia, an lal sûng chu lungthi takin an iom a ni.

⁶RENGPA khan lungthi takin an omtira, irdoina a om no kâr hin Judai rama kulhai an sintira.

⁷Judai rama mihai kuang, “Tho ei khuahai hi siam insa nôk ei ta, lung kulhai sin ei ta, râl hrungna kul irsânghai mikot le a kalnahai sin ei ti. RENGPA ei Pathian chu a neitu’n a bê sikin, hi rama hin thu ei la inei a ni; ama ei pom sikin hmun tina râlboiin a ni inomtir a ni hi,” a tia. Khaang khan, kulhai kha an siama, satakin an zoi tâka.

⁸Reng Asa’n pho le ufeihai chôiin, Judai ram ata sipai nuai thum le Benjamina ram ata irdoi thei, rôppho innghâk le thal chôi sipai nuai hni sîngriat a neia; mi hrât irdoi thei tak tak an ni.

⁹Ethiopia mi Zera khan sipai nuai sôm irzakhat le sakor tâli irzathum hruaiin Judai ram a hong rûna, Maresa a hong tung rak tâka.

¹⁰Lei doi hrangin rêng Asa chu a le’rsiama, Maresa kôla Zefata irhôra khan a le’rsang tâka.

¹¹Asa chu a Pathian RENGPA kuanga a chongchaia, “O RENGPA sipai hrât loihai, hrât taka inchangtir theitu, nangma ang hi tûte om mahai. O RENGPA kin Pathian, ni zuang changpui ro, nangmaa hin kin irnghata, nangma irhming sâmin hi mihai doi hrangin kin irthok a ni. O RENGPA kin Pathian ni nia, mihriamin nang ngam no ri sehai,” a tia.

¹²RENGPA’N Ethiopia mihai chu Asa le Juda sipaihai makunga khan an hnêa, an rot zoi tâka.

¹³Asa le a rualhaiin Gerar dênin an irzûlhaia, Ethiopia mihai chu an thathai oka, a lei pût thei zel om ta mahai. RENGPA le a sipaihai chu an ingamhai viat loi a ni, sipaihaiin râllâk sum tamtak an lâka.

¹⁴Gerar le a kôlvêla khopuihai khom an insiat thei ving a ni; khataka mi lei omhai khan RENGPA kha an chi tak taka, khuahai an inmoka, râllâk sum tamtak an lâka.

¹⁵Belrapu omnahai an hâla, belra tamtak an chelhaia, saringseihai an chelhaia, Jerusalema an kîr nôk tâka.