Read Hrangkhol 2 THURCHI SUINA 15 Bible Online

2 THURCHI SUINA 15 - Hrangkhol bible

2 THURCHI SUINA 15

¹Obeda nâipa Azaria chunga Pathian irtha a zuang tunga.

²Reng Asa irhmupui hrangin a fea, a khêka, “Reng Asa nangni Judai le Benjamina mihaio, ki thu hi irngai roi. Ama tiang nin kop sûng chu RENGPA khom nangni tiang om a ta, nin zongin chu hmu nin ti, nin mâksanin chu nangni masan a ti.

³Israelhaiin chu Pathian tak biak loiin zoro sôttak an oma, ar chutir hrang ochai khom nei mahaia, dân khom inhre mahai.

⁴Khannisian chardongna an tong zoro’n Israelhai Pathian RENGPA tiang an irheia, ama an zonga, an hmu ngai.

⁵Kha lai khan ram a buaia, ite mumal a nei no sikin tûte irvâksuak ngam zel om ngai mahai.

⁶Nam le nam deng an irthei irhlôma, kho sûng le kho sûng deng an irthei irhlôma. Pathianin buaina le chardongna a intungtir a ni.

⁷Nangni’n chu chi loiin irnaksong unglân, nin sintho ra chu hmu ngêt nin ti,” a tia.

⁸Reng Asa’n deipu Azaria, Obeda nâipa thu an hriatin chu a’rsongpuia, Judai le Benjamina rama millim om murdi chu a paihai vinga, a pa’n tâng ram khua a ilâk murdi an boipai vinga. Tempil tuala RENGPA maichâm khom a sin insa nôka.

⁹RENGPA’N a ompui a nih ti an hriatin, Efraima ram ata Samaria hai ram ata ama tianga kop mi tamtakin Asa an hor hnêla. Asa’n khahai kha Judai ram le Benjamina rama mihai a bukkhômhaia.

¹⁰Asa inlal kum sômhleiringa tha thumna khan chu Jerusalema an irbukkhôm nôka.

¹¹Kha ni khan an râllâk sehrât irzasari le kêlbelra sângsari RENGPA kuang an inhlana.

¹²An irchihai Pathian RENGPA chu lungrîl taka a dik taka biak hrangin thu an thunga.

¹³Ulian khom nâipang khom, pasal khom nupang khom, Israelhai Pathian RENGPA biak nuam loi chu that hrang a ni, an tia.

¹⁴Inring taka khêkin RENGPA irhming sâmin khomâk an irsâma; an thuthung chu an pom khaka, an khêka bekul an tuma.

¹⁵A diktakin thu an thung indet tâk sikin, Judai rama mihai chu an lôm tak taka. RENGPA sintho chu a hoi an tia, ama’n a lei poma, hmun tina irngeina an lêngtira.

¹⁶A pi rêngnu, Maaki’n Aseri irlim intirom tak a phun sikin rêngnu nina a pai pea; Aseri irlim kha Asa khan a tuka ilhlek hlekin Kidron tui kôla a hâlpai vinga.

¹⁷Ram sûnga hmun irsâng pathian dang an ibiakna murdi chu rêng Asa’n pai zoi no khomsian a dam sûng chu, RENGPA vai an tûka.

¹⁸A pa Abija’n Pathian kuanga thilpêk murdi chu Asa’n tempila a siaa, ama ngêtin rângachak le tangkarua a inhlanhai khom a sia saa.

¹⁹Asa hin kum sômthum ringa roi a rêl sûng chu irdoina om nôk ta maka.