Read Hrangkhol 2 THURCHI SUINA 16 Bible Online

2 THURCHI SUINA 16 - Hrangkhol bible

2 THURCHI SUINA 16

¹Judai rama Asa kum sômthum ringa an lal kumin, Israel rêng Baasa’n Juda rêng Asa ram ata tûte an hong thei loina hrangin le tûte an fe loina hrangin Rama khuaa kul a sina.

²Asa’n Tempila sum kok ata tangkarua le rângachak a lâksuaka, Damaska khuaa om Suria rêng Benhadada kuang a thona, a kuang,

³“Ka pa le ni pa an irsan ang khan, eini khom irkop ei ta, en ro, tangkarua le rângachak ki hong thona, Israel rêng Baasa leh nin rual irchang masan tan lân, ki ram ata a sipaihai khâipai sian,” a tia.

⁴Benhadada’n Asa iti chu a sa a tia, a sipai hruaitu a koia, Israel ram chu a rûn tâka, Ijon hai, Dan hai, Abel-maim hai le Naftalia hai biala neinun omna khua murdi chu a lâka.

⁵Kha thilhai kha rêng Baasa’n a inhriatin Rama khuaa kul a isin chu a’rngamsan tâka.

⁶Rama kul sinna hrang lung le thinghai chu la hrangin Judai rama mi murdi chu Asa khan a pana, Geba le Mizpa kul sinna’n a hmanga.

⁷Kha laia khan deipu Hanania chu rêng Asa kuang a honga, a kuang, “Pathian RENGPA iam loiin Suria rêng iampumin ni oma; khasikin, Israel rêng sipaihai chu nin suahai tâka.

⁸Ethiopia le Libua mihai khan sipai le sakor tâli tamtak le sakor chung chuang mi tamtak an inei mo ni ma? RENGPA chu ni tûnga nang a inhnêtir a ni kha.

⁹RENGPA’N ama iamzoi loihai chu changpui hrangin rammual pumpuia a mit a inlêngtir ngai a ni. Atûn ata chu doi hrang nei mai ta ni ti, inzakpuiom takin thil ni itho a ni hi,” a tia.

¹⁰Deipu chunga khan Asa chu a ning an mur pea, a kut thîr bânhrial leh a khita, intângna ina a khuma, khatak ata chu mi dang chunga khom nghaltôk song a phut tâka.

¹¹Asa inlal phut ata a mong dêna thurchi chu Juda le Israel rênghai thurchi irziakna bua a chuang.

¹²Asa chu kum sômthum kuak an lal zoiin a ke a pân pea, an bâi tâka, RENGPA pan loiin daktor a pana.

¹³Kum hni zoia chu a thia;

¹⁴Davida khopuia, a thân hranga a ichoina khan an phûma. An phûm mân mosola hai, sahriak mirimhoihai an pola, ama sûnpuina’n meipui an sêm ir-al tâka.