Read Hrangkhol 2 THURCHI SUINA 17 Bible Online

2 THURCHI SUINA 17 - Hrangkhol bible

2 THURCHI SUINA 17

¹A pa Asa irthûlin Jehosafata chu rêng a changa, Israelhai doi thei hrangin ar sinsiama.

²Judai ram kul omna khuahaia sipai a siaa, Judai ram thingtânga sipai a siahaia.

³An lal phut laia a pa itho ang khan Jehosafata khomin a thoa, Baal biak nuam maka. RENGPA’N sat a vura.

⁴A pahai Pathian sin a zonga, Pathian thupêkhai a zôma, Israel rênghai angin om maka.

⁵RENGPA’N Jehosafata chu Judai rama an lal indettira, mihaiin khâzana an hong pêk ngaia, a irchong ok tâka, mihaiin an irngaiirsâng tâka.

⁶RENGPA sintho chu a inuam lam tak a nia, an millim biakna hmun irsânghai, Aseri irlimhai Judai ram ata an boipaia.

⁷Kum thum an lal zoiin Benhaila hai, Obadia hai, Zekaria hai, Nethanela hai, Mikaia hai, Judai ram khopuia irchutirtu a tîrsuaka.

⁸Levi irchia mi kuak le ochai inhni an fe saa, Levi irchihai chu Semaia hai, Nethania hai, Zebadia hai, Asahela hai, Semiramota hai, Jehonathana hai, Adonija hai, Tobija hai, Tobadonija hai an nia, ochaihai chu Elisama le Jehorama an ni.

⁹RENGPA dân lekhabu chu an chôia, Judai rama khuahai chu an irfangpuia, mihai an irchutirhaia.

¹⁰An omna ram sûnga chu Jehosafata doi ngam loi hrangin RENGPA’N an dôptirhaia.

¹¹Filistia mi senkhathaiin khâzana tangkarua le thilpêk dang tamtak an hong pêk ngaia. Arab mi senkhathai khomin kêlbelra sângsari irzasari le kêl sângsari irzasari an hong pêk saa.

¹²Khanchu, Jehosafata chu a hon lal ual uala, Judai ram sûnga a dung le a khangin kulhai a sina, khopuihai an dinga.

¹³Khahai hmuna khan fâk zât a hrê pehai oka. Jerusalem khuaa sipai hruaitu lian mi hâitak takhai a siahaia.

¹⁴An irlo fe dân angin hruaitu a siahaia. Juda irchia sipai hruaitu tak chu Adna a ni, sipai nuai thum ar ôia.

¹⁵A hnuai renga chu Jehohanana a ni, sipai nuai hni le sîngriat ar ôia,

¹⁶inthumna chu Zikria nâipa Amasia a ni, sipai nuai hni ar ôia.

¹⁷Benjamina irchia sipai hruaitu tak chu sipai songinruk tak Eliada a ni, sipai nuai hni rôppho le thal chôihai ar ôia.

¹⁸A hnung renga chu Jehozabada a ni, irdoi irsiamchak sipai nuai khat le sîngriat ar ôia.

¹⁹Jerusalema, hi sipaihai hi rêngin a isonghai a nia, hi khêla hin Judai rama kho kulhaia sipai a sia sa a ni.