Read Hrangkhol 2 THURCHI SUINA 18 Bible Online

2 THURCHI SUINA 18 - Hrangkhol bible

2 THURCHI SUINA 18

¹Juda rêng Jehosafata chu ar chong ok tâka, ar hming an thang ok zoiin chu Israel rêng Ahaba leh irkop hrangin an tia, an nâihai an irneitirhaia.

²Kum tamtak zoia chu Jehosafata chu Samari khuaa Ahaba hmu hrangin a suaka. Jehosafata le a rualhai lômna’n Ahaba’n kêlbelra le sehrât tamtak a thata, hruai an thea. Gilead biala Ramot khua doipui hrangin a koia.

³“Ramot khua doi hrangin ni fe nuam mo?,” a tia. Jehosafata chu, “Ni fe nuam te tena kei le ki sipaihai fe an irsiam mai, nang san ki ti,” a tia.

⁴“RENGPA irdon masa phot ro,” a ti saa.

⁵Ahaba’n deipu irzaminli vêl chu, “Ramot khua ki idoi hrang le doi loi hrang?” tiin ar dona. Anni khan, “Doi ro, Pathianin nang ompui a ti,” an tia.

⁶Jehosafata’n, “Deipu dang RENGPA nir don pe thei an iom loi ma ni?” a tia.

⁷Ahaba’n, “Inkhat, Imla nâipa Mikaia chu a la om, sin sa ite ni la zongpui thei ngai ma, ennuam ma ung, sin saloi i mani a ihrilsuak ngai kêng,” a tia. Jehosafata’n, “Reng takin khaanga ti hrang chu ni ma duah,” a tia.

⁸Reng khan hruaitu inkhat a koia, Mika hruai hrangin a tîra.

⁹Reng inhni chu Samari khopui lampui pên tiang hruizôla rêngtoihmuna khan an toia; deipuhaiin an hrilhaia, thu an hril khumhaia.

¹⁰An laia mi inkhat, Kenaana nâipa Zedekia’n thîr se’rki illim a sina, Ahaba kuang, “Suriahai chu hi leh hin beihai ei ta, inhnêhai ei ti,” a tia.

¹¹Deipu danghai khomin khaangin an tia. “Fe’n lân, Ramot khua chu doiin lân, man ngêt ni ti. RENGPA’N nan hnêpui a ti,” an tia.

¹²Mikaia hruai hranga an tîrin chu a kuang, “Deipu dang murdi’n a sa tiin rêng kuang khan thu an hrila, nang khomin ang khan ti ro,” a tia.

¹³Mikaia’n, “RENGPA mihring irhming sâmin ki hril, ki Pathianin hril hranga a ni inhril chu ti ki ti,” tiin a sâma.

¹⁴Reng Ahaba makunga a va tungin chu, rêngin, “Mikaia, rêng Jehosafata leh Ramot khua kha doi hrang mo doi loi hrang mo?,” a tia.

¹⁵Mikaia khan, “Hong doi ngân u ta, nin inhnê mo, RENGPA’N nangni inhnêtir a ti,” a tia. Ahaba’n, “RENGPA irhmingin ki kuang thu ni hrilin thudik vai nin hril ro, voi iza mo ki iti hrang?” a tia.

¹⁶Mikaia’n, “Kêlbelra hrungtu nei loi angin Israel mihai chu tânga an indarh ki hmua. Hihai hin hruaitu nei mahai; mâni in lama, a chîn tete’n fe ri sehai, a ti e,” a tia.

¹⁷Ahaba’n, Jehosafata kuang, “Irngai ro, keima hranga thil sa hrang ite hril ngai mah ti nang kin hril. Thil saloi inzen a hril ngai,” a tia.

¹⁸Mikaia’n, “RENGPA thu hi le’rngai roh. Irvâna a rêngtoihmun RENGPA thu chu ki hmua, vântîrtônhaiin an irhîlhaia.

¹⁹Tu mo Ahaba kuanga fe hranga, Ramot doia thi hranga zu huang hrang? RENGPA’N a tia, vântîrtôn senkhatin chu thu an hrila, a danghaiin thu dang an hrila.

²⁰Irtha inkhat hi a zuanga, RENGPA makunga a va ngîra, ‘La zu huang hi rong a ti,’ a tia. RENGPA’N ‘Itin mo ni zu ihrung hrang?’ a tia.

²¹Irtha khan, ‘Ahaba deipuhai minlak inthotir hrang,’ a tia.

²²Khaang khan a ni, RENGPA’N hi deipuhai hi ni kuang minlak a inthotir. RENGPA’N ni siatna hrang a inkung a ni,” a tia.

²³Deipu Zedekia’n Mikaia a va pana, “Itiklai khan mo RENGPA irtha’n a ni mâksana, ni kuang a iom tâk?,” a tia.

²⁴Mikaia’n hiang hin a sâma, “Tentan sûngrîla irbîk hranga ni fe tika, inhria ni ti,” a tia.

²⁵Ahaba’n hruaitu inkhat kuang, “Mikaia kha chelin lân, kho sûng hruaitu Amon kuang hruaiin lân, rêng nâipa Joasa khom irhmutir roh.

²⁶Dam takin ki hong kîr nôk mâka chu intângnaa khumin lân, bai le tui vai pe ri se,” a tia.

²⁷Mikaia’n “Dam taka ni hong kîrin chu RENGPA’N a ni ichongpui loi ni a ti; ki iti hi mi tinin inhre ri sehai,” a tia.

²⁸Reng Ahaba le rêng Jehosafata chu Gilead biala Ramot khua doi hrangin an fe tâka.

²⁹Ahaba chu Jehosafata kuang, “Ei irdoi tena irvô indanglam ki ta, nang chu rêng irvôna leh irvô mai ro,” a tia. Reng Ahaba chu a tukrivo a thûla, irdoina khan a va kop sa tâka.

³⁰Suria rêngin tâli chalaitu hruaitu chu, “Israelhai rêng ti no chu tûte doihai no roi,” a tia.

³¹Khahai kha Jehosafata’n a hmu’n chu Israel rêng mani a sôna, a hong bei tâka. Jehosafata chu a khêka, RENGPA Pathianin a sâma, a doituhai kha an hnotpaihai nôka.

³²Tâli chalaitu hruaituhai khan Israel rêng ni mah ti an inhriatin chu, irzûl ta mahaia.

³³Suria sipai thal kâpte hin mo rêng Ahaba chu râltukfam leh irvo a kârhai hin hong tok pal lik a ti, a tia. A tâli chalaitu kuang khan, “Sâbe ki tuang ta e, kîrin lân, irdoina hmun ata hi rot ta ro,” a tia.

³⁴An irdoi lai taka hin Ahaba chu tâli chunga a bânga, misa a tâkin chu a thi tâka.