Read Hrangkhol 2 THURCHI SUINA 20 Bible Online

2 THURCHI SUINA 20 - Hrangkhol bible

2 THURCHI SUINA 20

¹Zoro hong sôt ual tena chu Moab le Amon-haiin an irkoppui Meun-hai le Jehosafata ram chu an hong doia;

²mi senkhat an honga, Jehosafata kuang, “Tuipui thi râl Edom ram ata sipai tam takin nang hong doi an ta, Hazazon Tamar khua chu an lâkpai ta,” a tia.

³Jehosafata chu a char a dong pe oka, thil tho dân hrang RENGPA ar dona. Ram pumpuiin bu nghei hrang a tia.

⁴Judai ram kho tin ata RENGPA irdon hrangin Jerusalema mi an hong hluk tâka.

⁵Annihai le Jerusalema mihai chu tempil tual sin intharna khan an irbuka, rêng Jehosafata chu an makunga a va ngîra.

⁶Inring takin a chongchaia, “O RENGPA, kin irchibulhaiin Pathian sinthothei tak ni ni, tûte chelthung thei ni mak che.

⁷Hi rama lei om ngaihai kha ni mi Israelhai makunga nin hnotsuakhaia, ni rualpa Abrahama irchihai inei kumtuanga hrang ni ipêk mo ni ma? o kin Pathian!

⁸Hi rama hin an om tâka, nangma biakna hrang hmun Irthiang an sina.

⁹A ni hremna hrangin irdoina hai, hri hai, châm hai, thil saloi chi tinrêng hong tung khomsian, hi in mikot, nangma biakna hranga ni inkunga hin ngîr kin ta, ni san ni ti, an iti a ni.

¹⁰Irngai ro, atûn hin Amon mihai, Moab mihai le Edom mihaiin an ni doia, kin irchibulhai Aigupta rengata an hong suak khom khan an rama fe phalhai mak chea. Kin puhaiin an ram chu an irhuala, insiat thei mahai.

¹¹Irngai ro, ramchâra kin inei ta hranga ni ni ipêk ram rengata nin hnotsuak tumin an hong irthok tâk a ni!

¹²O kin Pathian an chunga roi hong rêlin lân; a ni doi hrang sipaihai hi an tama, ite châng thei ma ung. A thôna lam zel inhre ta ma ung, ni makunga kin hong intung phot a ni hi,” an tia.

¹³Judai rama mi murdi chu an dôngma le an nâihai leh tempil mikota an ngîra.

¹⁴Khataka om sa Levi irchia mi inkhat, Zekaria nâipa Jahaziela chunga RENGPA irtha a zuang tunga. Ama chu Asafa pâla mi a ni, Zekaria hi Benaia nâi a nia, Benaia hi Jeiela nâi a ni, a pu chu Matana a ni.

¹⁵Jahaziela’n, “Judai rama mi murdi le Jerusalema omhai le nang Jehosafata, RENGPA’N hiang hin a ti, sipai an tam hrai sikin chi no’n lân, ngîk viat no ro. Irdoina chu ki kuta om a ni, nin kuta om ni ma.

¹⁶Nangtûk chu Zif irkânna an hongin lei doihai unglân, phâizôl tung mân Jezruel kôl, ram irhelna laia lei inruanghai roi.

¹⁷Hi irdoinaa hin nin idoihai nang no ni, nin omna hranga khan lei inruanghai phot roi. RENGPA’N nangni inhnêtir a ti. Judai ram le Jerusalema mihaio, chi no roi, ngîkhai viat no roi, doi hrangin irthoksuak roi, RENGPA chu nangni tiang kop a ti,” a tia.

¹⁸Reng Jehosafata chu a hmâi kûnin irnêng a sika, mipuihai khom an kûna, RENGPA chubai an mûka.

¹⁹Levia irchi, Kohata le Kora pâlhai chu an ngîra, Israelhai Pathian RENGPA chu inpâkin inring takin hla an saka.

²⁰Zînga chu mihaiin Tekoa khua kôl ram irchêpna tiang an pan hrang a nia, an suak hranga khan Jehosafata’n an kuang, “Juda le Jerusalem ruathartehaio, RENGPA nin Pathian chu song unglân, ngîrsuak thei nin ti. A deipu thuhril kha iam unglân, hlochuk nin ti,” a tia.

²¹Rengin mihai kha a chongpuihaia, Levi irchia zaipôl sakhai chu hun ser bîka innghâk hrang tukfamhai irbelin sipaihai mahruai hrangin an tia; RENGPA chu inpâk roi, “A khonzâna chu kumtuangin a om hrang sikin,” ti hla an saka.

²²Khaanga hla an sak laiin a doitu sipaihai an tei phuata,

²³Amon-hai le Moabhaiin an doihaia, an that phiarhaia, a sate’n an irdoi tâka.

²⁴Judai rama sipaihaiin ramchâra in irsâng an va dêna, an râlhai an thîrhaia. An rêngin hnuaichanga an inrîl dûla, an lei thi vinga, inkhat lua an tânsuak om mahai.

²⁵Jehosafata le a rualhai chu râllâk sum la hrangin an fea. Kha laia khan sehrât tamtak an om saa, fâk hranghai, tukfamhai, le thilhlu tamtak an hmu sa. Râllâk sum lâk hrang tamtak a nia, sûn thum sûng chu an ilâk mai a nia, an ipêl zoi loi rakin an ilâk a ni.

²⁶A sûn minli nî chu, Baraka irhôra an irchuna, anni hranga a sinthohai sikin RENGPA chu an inpâka. Khasikin kha hmun kha Beraka, an iti tâk a ni.

²⁷RENGPA’N an râlhai an hnêtirhai tâk sikin Jehosafata le a rualhai chu lôm takin Jerusalema an fe tâka.

²⁸Khua an tung tôn chu, perkhuanghai, têngrephai le bekulhai tum pumin tempil an pana.

²⁹Israelhai râl, RENGPA an Pathianin a isoisak dân chu an kôlvêla namhaiin an inhriatin chu, Pathian kha an chia.

³⁰Jehosafata chu râl boiin an lala, RENGPA’N kil tin le hmun tina a vêng mai sikin.

³¹Jehosafata chu kum sômthum hleikhata khan Judai rama rêng a changa, Jerusalema kum sômhni ringa an lala. A nu chu Azubai, Silhia nâinu a ni.

³²A pa Asa ang khan RENGPA makunga sin sa a thoa.

³³Nam dang pathian biakna, hmun irsânghai insiat zoi maka, mipuihai khomin an irchibulhai Pathian biak uar ok ta mahai.

³⁴Jehosafata sintho murdi, rêng a chang phut ata a thi ni dêna thuhai chu Hanania nâipa, Jehua thurchi ti irziakna lekhabua a irziak a ni. Israelhai rêng thurchi ti irziakna lekhabua a om.

³⁵Voikhat chu Judai rama rêng Jehosafata’n Israel rêng Ahazia, thil dikloi tho ngaitu leh rual an irchanga.

³⁶Ezion-Geberah Tarsis khuaa fe hrangin irkuanga an kâia.

³⁷Maresa kho mi, Dodavahua nâipa Eliezera’n Jehosafata kuang, “Israel rêng Ahazia-hai leh nin irrualpuihai sikin, RENGPA’N ni sintho insiat a ti,” a tia. An irkuanghai a koi pehaia, Tarsis khuaa fe thei zât zel om ta maka.