Read Hrangkhol 2 THURCHI SUINA 22 Bible Online

2 THURCHI SUINA 22 - Hrangkhol bible

2 THURCHI SUINA 22

¹Arab mi senkhathaiin Jehorama chu an doia, a nâi mitum Ahazia ti no chu a nâi danghai chu an that pe vinga. Jerusalema mihaiin a pa irthûl hrangin Ahazia chu rêng an inchangtira.

²Ahazia chu kum sômhni inhni a ni le an lal irphuta, Jerusalem-a kum khat an lala. A nu chu Athali, Israel rêng Ahaba nâinu, Omria tunu a ni.

³Ama khom Ahaba in mihai omdân angin a oma, a nu thu a zôm ngaia.

⁴RENGPA mithmua thilsual a tho ngaia, a pa thi zoiin Ahaba in sûng mihai laia senkhat chu a thu lâkna tak an ni tâka, a isiatpui tâk a ni.

⁵An thu irdon angin Suria rêng Hazaela doi hrangin Israel rêng Jorama rual ar changpuia, Gilead biala Ramot khua an doia, an irdoina rêng Jorama chu sâbe a neia.

⁶Jezreel-a om hrangin a fea, Juda rêng Jehorama nâipa Ahazia an va hroa.

⁷Jorama a va hro chu Pathianin Ahazia siatna hranga a inkung a ni. An omsuam laiin mi inkhat Nimsia nâipa Jehua a honga, ama hi Ahaba inkamangtir hranga RENGPA mi tîr a ni.

⁸Jehua chu Ahaba irchihai chunga kut a thâk laiin Jorama dam loi en hrangin Ahazia hai Juda hruaituhai le Ahazia urênghai chu Jehua’n a hmua, a thatpaihai sa tâka.

⁹Ahazia kha an zonga, Samari khuaa a le’rbîka, Jehua kuang an hruaia, a lei thatpaia. A pu Jehosafata’n theidôr insua’n RENGPA iamtu chu an inzâna sikin a ruak chu satakin an phûma. Ahazia in sûngkua mi laia tûte an lal hrang om ta mahai.

¹⁰A nu Athali’n Ahazia thi an hriatin chu, Juda rêng in mihai an thattirhaia.

¹¹Ahazia khan farnu Jehosebi a neia, a ochai Jehoiada chu pasalin a neia. Ahazia nâipasal inkhat, Joasa chu inrûkin an ruanga, rêng nâi dang thi hranghai ata a lâksuaka, tempila zâlna tentan inkhata a thupa, a om tâka. A thup khak sikin Athali’n that thei maka.

¹²Kum ruk sûng a thupa, Athali chu rêng a chang tâka.