Read Hrangkhol 2 THURCHI SUINA 23 Bible Online

2 THURCHI SUINA 23 - Hrangkhol bible

2 THURCHI SUINA 23

¹A kum sarina khan chu ochai Jehoiada le sipai irza hruaitu ringahai chu an irhlet irhlôma. Kha mihai kha Jehorama nâipa Azaria hai, Jehohanana nâipa Ismaela hai, Obeda nâipa Azaria hai, Adaia nâipa Maaseia hai, Zikria nâipa Elisafata hai an ni.

²Judai ram an irfangsuaka, Levi irchihai le nam dang hruaituhai chu Jerusalema an hruai bukhaia.

³Tempila khan an irbuka, Joasa, rêng nâipa leh khan chong an irkhâma. Jehoiada khan an kuang, “RENGPA khan Davida irchihai chu rêng hrangin an kunga, hi rêng a lei thi tâk nâipa hi rêng chang hrang chu a ni.

⁴Hiang hin thil tho ei ti, Sabat nia ochai le Levi irchihai sintho hrangin an hong tena, hmun thuma semin hmunkhat chu tempil mikothai hrung an ti.

⁵Hmun thuma hmun khathaiin chu rêng in hrung an ti, a danghai chu ‘Lung phûm’ mikot kôla om an ti. Mipuihai chu tempil tuala an iom hrang a ni.

⁶Tempil sûnga chu ochai le Levi irchi sintho lai tak ti no chu, tûte an ilût hrang ni mah. Anni chu serindang an ni sikin, lût thei an ti; mi danghai chu RENGPA thu zômin an ilût hrang ni ma.

⁷Levi irchihai chu rêng hi irhual khak an ta, khandai phôi sai chôiin an ihrung hrang a ni, rêng fena hmun tina an izui hrang a ni. Tempil sûnga lût tumtuhai chu an ithathai hrang a ni,” a tia.

⁸Levi irchihai le Judai rama mihaiin Jehoiada ihril angin an thoa. Sabat nia irngam hranghai chu an chela.

⁹Davida’n tempila a siaa, ufei le phohai chu Jehoiada’n a sema.

¹⁰Tempil mikota khandai phôi sai chôiin ar tângtirhaia, rêng kha an hrungtirhai khapa.

¹¹Jehoiada’n Joasa kha a hruaisuaka, rêng tho hrang dân bu kha a pêka, rêngin an siam tâka, ochai Jehoiada le a rualhaiin Joasa chu sahriak an pola, “Reng hi dam sôt ri se,” tiin an khêka.

¹²Athali’n rêng an chôiindôm ti an hriatin chu, mipui irbukna tempil tiang a fea.

¹³Reng thar chu rêng ngîrna hranga an indang, tempil sûng lûtna kôl bang kôla ngîr kha a hong hmua, sipai hruaituhai le bekul irputhaiin an irhuala. Mipuihai chu raifân takin an khêk dur dura, bekul an tuma, tempila zaipôlhaiin an thil tum irhâi leh hla an hruaia. Annihai kha a hong hmuin chu ningmurin a puan an pot thêra, “Nin ni ihuang a ni,” tiin a khêka.

¹⁴Jehoiada’n tempil vêla that nuam maka, sipai hruaituhai kha a koia, “A hrung hrangin sipai irtâng unglân, a lei inruang nin hmu’n chu thatpai roi,” a tia.

¹⁵Athali chu an chela, rêng in tiang an hruaia, sakor mikot an itina kôla khan an thata.

¹⁶RENGPA mi ni hrangin ochai Jehoiada’n rêng Joasa le mipui chu thu a thungpuia.

¹⁷Baal an ibiakna hmuna khan an rêngin an fea, an insiata. Maichâm kha an insima, millimhai kha an irfûi inkhoia, Baal ochai Matana chu maichâm kôla an thata.

¹⁸Jehoiada chu ochaihai le Levi irchihai chu tempila an sintho hrang, an inthotirhaia, rêng Davida iti angin an tho hrang an semhaia, Mosia dân bua irziak angin RENGPA kuang hâlirvôm thilinhlanhai an inhlana. Irhâihoi tumhai, hla sakhai le hla hruaituhai khomin an itho hrang a ni.

¹⁹Jehoiada’n chu tempil mikothai an hrungtirhaia, mi porinche tûte inlûttir phal hrang ni ma.

²⁰Sipai hruaituhai, ram hruaituhai le mipuihaiin Jehoiada pâlin lampuia an irkôia, rêng chu tempil ata rêng ina an hruaia, mikotpuia an lûtpuia, rêngtoihmuna khan rêng chu a toia.

²¹Mi murdi’n an râi a fâna: Athali chu an tuk that tâk sikin kho sûnga khan buaina om ta mah.