Read Hrangkhol 2 THURCHI SUINA 28 Bible Online

2 THURCHI SUINA 28 - Hrangkhol bible

2 THURCHI SUINA 28

¹Ahaza chu kum sômhni a niin an lal irphuta, Jerusalema kum sômhleiruk an lala. A pu Davida tho dân ang zôm nuam loiin RENGPA indit loi lam a thoa.

²Israel rênghai tho dân a lâka, Baal irlim an sintirhaia.

³Hinom irhôra mirimhoi a hâla, Israel mihai makunga RENGPA inhnotsuakhai nam dang tho dân intirom tak takhai chu a thoa, a nâipasalhai ngêt khom millimhai makunga hâlirvôm thilinhlan hrangin a thata.

⁴Tânga nam dang pathian biakna hmun irsânghai, thing dâihlim satak hnuaia hai, Ahaza chu ar bôl ngaia, mirimhoihai a hâl ngaia.

⁵Ahaza’n thilsual a tho sikin, Suria rêng kuta Pathian RENGPA’N a pêka; Damaska khuaa Juda mi tamtak Suria rêngin a hruaia.

⁶Israel rêng Remalia nâipa Pekahia khomin Ahazia chu a doia, an hnêa. Juda sipaihai satak tak mi nuai khat le sînghni a thata. Judai rama mihai chu an irchibulhai Pathian RENGPA chu an mâksan sikin RENGPA’N kha thilhai kha an chunga a intungtir a ni.

⁷Israel sipai Efraima pasal sa Zikria’n Ahaza nâipa Maaseia chu a thata. Reng in enkoltu Azrikama a that saa; rêng hnuaia mi Elkana khom a thata.

⁸Judahai chu a urênghai an ni nâkin, Israel sipaihai chu nupang le nâipang nuai hni suaka an chelhaia. Samari khuaa an kalkhumhaia, râllâk sum tamtak an chôi pehaia.

⁹Samari khuaa khan RENGPA deipu inkhat Obeda a oma, Israel sipai rualin Judai ram ata an suaka, an ichelhai le Samari khuaa lût hrang kha a lei hmuhaia, an kuang, “Nin irchibulhai Pathian RENGPA chu Judahai chunga a ninginmura, nangni a inhnêtir tâk a ni; khannisian nin thata, an chunga nin nunsiatzia a ihmu mai a ni.

¹⁰Jerusalem le Judai rama om pasal le nupang suaka inomtirhai nin itum mai a ni hi. Nangni khomin RENGPA, nin Pathian ata thilsual nin tho ti hi nin la inhriat loi ma ni?

¹¹ki thu hi irngai hi roi, hi sala nin ichelhai hi nin urênghai, nin farnuhai kêng an ini, insuapaihai roi, khano’nchu, RENGPA ninginmur a ta, nangni soisak a ti,” a tia.

¹²Hmâr tianga rêng hruaitu lian minli, Jehohanana nâipa Azaria hai, Mesilemota nâipa Berekia hai, Saluma nâipa Zehiskia hai, Hadlaia nâipa Amasa hai khomin sipaihai sintho chu a sa ti mahaia.

¹³An kuang, “Nin sala nin ichelhai hi, hin hong hruaihai no roi, RENGPA ata thilsual kin tho tâk sikin a ni hrem nuamlam takin, a ning kin inmurtir a ni. Kin thilsual lei tho tâkhai khêla ni la bôk pe nin inuam ma ni?” an tia.

¹⁴Khanchu, sipaihaiin sala an ichel le râllâk sum an hong ichôi chu mipui le an hruaituhai kuta an inhlan tâka.

¹⁵Mi minlihai hi an râllâk sum ata sala an ichelhai kuang sil le kai pehai hrangin an tia, silkai hai, kekok bun hranghai an pêka, an sâbe pol hrangin oliv hriak an semhaia. Mâni kea fe thei loi raka irzalhai chu sakuartung chunga an inchuangtirhaia; sala an ichelhai murdi chu Judai ram Jeriko-a an hruai kîrhai vinga. Khan, Israelhai chu Samari tiang an fe tâka.

¹⁶Kha laia khan rêng Ahaza chu ama changpui hrangin Assuria rênghai a koia.

¹⁷Edom-haiin Judai ram an hong doia, an inhnêa, mi tamtak an chelhai a ni.

¹⁸Filistia-hai lakin nitâk tianga tâng mongna phâi khuahai le Judai ram Negeb-hai an hong doi nôka. Anni len vâng chu Beth-Semes hai, Aijalon hai, Gederot hai, Soko le a kôlvêla khuahai, Timna le a kôlvêla khuahai Gimzo le a kôlvêla khuahai an lâka, an lua pehaia.

¹⁹Juda rêng Ahaza chu a mihai satna hrang ngaitua viat loiin, RENGPA chu ite bêa bê loiin Judahai an doktirhai a ni.

²⁰Assuria rêng Tiglat-Pilesera chu Ahaza chu va san nêkin intakna an tungtir pea.

²¹Ahaza chu tempila rângachak hai, rêng ina mihai le mi irchong ualhai ina mihai a lâkhaia, Assuria rêng chu a pêka, khannisian a’rfêna om maka.

²²A sân a charindong lai tak khomin Ahaza chu RENGPA ata a sual uala.

²³Ama inhnêtu Suriahai pathianhai chu chubai a mûkhaia, Suria pathianhai hin Suria rêng an changpuia, khasikin an kuang thilinhlan hrangin ni changpui ngêt a ti, iti a ni. Kha kha a mihai leh an isiatpui nôkna chu a ni.

²⁴Khakhêla tempila hmangrua a lâksuaka, an siata, tempil chu a khâra; Jerusalem khuaa maichâm a sinhai hluka;

²⁵Judai ram khopuia le kho sûnga hai nam dang pathian biakna hmun irsâng, mirimhoi hâlna hrang a sin pher phura. Hiang hin ar chibulhai Pathian RENGPA chu a ning a inmurtir a ni.

²⁶A roirêl sûnga a thurchi danghai chu a phut ata a mong dênin, Juda le Israel rênghai thurchi irziakna bua a chuang.

²⁷Ahaza chu a thia, rênghai thâna ni loiin Jerusalema an phûma, a nâipa Hezekia chu ama irthûlin an lal tâka.