Read Hrangkhol 2 THURCHI SUINA 29 Bible Online

2 THURCHI SUINA 29 - Hrangkhol bible

2 THURCHI SUINA 29

¹Hezekia chu kum sômhni ringa a niin Judai rama rêng a chang irphuta, Jerusalema kum sômhni kuak an lala. A nu chu Zekaria nâinu Abija a ni.

²A pu Davida’n RENGPA nuamlam a itho ngai angin ama khomin a thoa.

³An lal phut kum, tha maton taka, Hezekia chu tempil inkhârhai chu an honghaia, a siathai chu an sintirhaia.

⁴Tempil nisua tianga tuala khan ochaihai le Levi irchihai a koibukhaia.

⁵An kuang, “Nangni Levi irchihaio, irthiang infâi unglân, nin pahai Pathian RENGPA in hi irthiang infâitir roi; tempil ata hi thil porinche murdi paisuak ving roi.

⁶Kin pahai chu RENGPA kin Pathian ata iamom loiin, a inuam loi lamtak an thoa. Tehel an zong pea, a omna in chu mâksanin an hnôla.

⁷Tempil mikot chu an kala, meiser an thata, mirimhoi hâl mahaia, hmun Irthianga Israelhai Pathian ta hrang hâlirvôm thilinhlan inhlan mahai.

⁸Hi sika hin RENGPA chu Juda le Jerusalema mihai chunga a ning an mura, mi tinin ar khêl tia danginchek khum rakin an isoisak tâk a ni; khahai kha nangni khomin nin ihmu mai a ni.

⁹Kin pahai chu khandai leh tukthat an nia, kin nâinuhai le nâipahai, kin dôngmahai leh sala an chelhai a ni.

¹⁰Kin chunga a ningmurna hi an tômtir sabeiin Israelhai Pathian RENGPA leh Thuthung siam ki itum tâk a ni.

¹¹Ki nâihaio, omchian ta no roi, RENGPA chu a makunga a ngîra, a sin tho hrangin nangni an thanga, khasikin a sin zong unglân, thilinhlanhai inhlan roi,” a tia.

¹²Khahai laia khan Levi irchihai hi an oma: Kohata irchihai laia mi, Amasaia nâipa Mahata le Azaria nâipa Joela, Meraria irchihai laia mi: Abdia nâipa Kisa le Jahalelela nâipa Azaria; Gersona irchihai laia mi. Zima nâipa Joa le Joa nâipa Edena.

¹³Elizafana irchi laia mi: Simria le Jeuela; Asafa irchi laia mi; Zekaria le Matania;

¹⁴Hemana irchi laia mi: Jehuela le Simeia; Jeduthuna irchi laia mi: Semaia le Uziela.

¹⁵Hi mihai hin an irchipui Levi irchihai an bukkhôma, an irthiangtirhaia; rêng thupêk angin tempil an irthiangtira. RENGPA dân bua hril angin an irthiangtira.

¹⁶RENGPA tempil sûnga ochaihai an lûta, thil porche an ihmu murdi chu RENGPA in tuala khan an hong sia suakhaia; Levi irchihai chu Kidron tuia an paia.

¹⁷Tha khatna, sûn maton taka tempil irthiangtir an phuta, a sûn riatna nî chu tempil sum omna dênin an infâia. Sûn riat dang, sûn sômhleiruk dênin tempil sûng chu Pathian biakna inruk hrangin an infâi nôka, an irthiangtir tâka.

¹⁸Levi irchihai chu rêng Hezekia kuang an fea, “Tempil sûng kin irthial irthiangtir ta. Hâlirvôm thilinhlan hâlna maichâmhai, bai ser siana dokânghai le a hmangrua murdi kin irthiangtir ta.

¹⁹Ahaza’n RENGPA kuang ata tho’nchâina sual a tho laia tempil bêlbûr a ilâksuakhai kha kin sia nôk ta, kin irthiangtir zoi tâka, RENGPA maichâm kôla itinrêng hrê infel a ni ta,” an hong tia.

²⁰Reng Hezekia chu Jerusalema hruaitu u ualhai chu a koibukhaia, RENGPA tempila khan an fea.

²¹sherâtchal sari, kêlbelrachal sari, kêlbelrate sari le sual irbôlna thilinhlan kêlchal sari an hong chôia; ochaihai chu RENGPA maichâma inhlan hrangin a tia.

²²Sehrâthai chu an thata, an thisen chu maichâma an intheka, kêlbelrate khom kha an thata, a thisen chu maichâma an intheka.

²³Reng le pungkhômhai makunga khan sual irbôlna thilinhlan hrangin kêlchalhai an hong kaia, an lu chunga an kut an irnghata,

²⁴ochaihaiin an thata, an thisen chu sual irbôlna’n an hmanga, Israel mi murdihai sual irbôlna’n an inhlan a ni. Reng thu angin hâlirvôm thilinhlan le sual irbôlna thil inhlan chu Israel mi murdi ta hranga inhlan a ni.

²⁵Reng deipu Gada le deipu Nathana hmanga Davida kuang RENGPA iti angin Levi irchihai chu perkhuang, serânda le têngrep chôiin tempila khan an siaa.

²⁶Davida itum ngai ang tum zât an chôia. Ochaihai khom bekul chôiin an ngîra,

²⁷Reng Hezekia chu hâlirvôm thilinhlan chu inhlan hrangin an hrila; an hor hlanin chu mipuihaiin RENGPA inpâkna hla an saka, bekulhai an tuma, chi danghai khom an tum tâka.

²⁸Khataka om murdihaiin Pathian chubai an mûka, hla an saka, an thilinhlan a kâng zoi mân chu mirimhoi an hâl zui pata.

²⁹Reng Hezekia le mipuihai chu an khûksadela Pathian chubai an mûka.

³⁰Reng le hruaituhaiin Davida le deipu Asafa hla phua, RENGPA inpâkna hla kha, Levi irchihai an insaktirhaia. Khûksadela Pathian chubai mûkin an rêngin râifan takin an om tâka.

³¹Hezekia’n mipuihai kuang, “RENGPA hrang nin infâi irthiang tâka; thilinhlanhai, lômthu hrilnahai, RENGPA tempila hong la ta roi,” a tia.

³²A’rbukkhômhai khan thilinhlanhai, lômthu hrilnahai an hong inhlana, a nuam murdihaiin hâlirvôm thilinhlanhai an inhlana. A’rbukkhômhaiin hâlirvôm thilinhlan hrang an hong ichôihai chu sehrâtchal sômsari le belrate irzahni le belra irzakhat a ni.

³³Sehrâtchal irzaruk le belra sângthum khom thilinhlan chi danga an inhlana.

³⁴A that hrang ochai an ruk no sikin an that zoi mân chu Levi irchihaiin an sanhaia. A hnungkhôn tiang chu ochai tam ual khom an thâr irthianghai tâka. Levi irchihai hi ochaihai nêkin an lei irvong irthiang thei ual a ni.

³⁵Mipuihai thilinhlan hâlhai hi ochaihai tho hrang a nia, an sa that mipuihai fâk hranghai khom hi an ihâl hrang a ni; hâlirvôm thilinhlan leh irrualin uain an hong inhlanhai khom hi ochaihaiin an ibun bak hrang a ni. Khanchu tempil sin thôna chu an phut nôk tâka.

³⁶Reng Hezekia le mipuihai chu an râiinfân oka, Pathianin hianga tho thei nôk hranga a tempila hmang thei hrang le hruai theia an om sika hin.