Read Hrangkhol 2 THURCHI SUINA 3 Bible Online

2 THURCHI SUINA 3 - Hrangkhol bible

2 THURCHI SUINA 3

¹Khanchu Solomona’n Jerusalema, Moria tânga, a pa Davida kuanga RENGPA inlârna, Jebus mi Ornana hruizôl, Davida’n hmun a lei isinsiam pena khan RENGPA in chu a sin tâka.

²An lal kum minlina tha hni le sûn hni niin a sin phuta.

³Pathian in sin hrang dân Solomona iti dân chu hiang hin a ni. A dung sei lam chu mûk sômruk a nia, a khang lian lam chu mûk sômhni a ni.

⁴A mân tianga tual sei lam chu a khang lian dôr mûk sômhni a nia, ar sâng lam chu irzakhat sômhni a ni; a sûng chu rângachak tui leh an luana.

⁵Khan tentan lian ual tak banga khan sidar thing ar bela, kha kha rângachak tui leh an luana, kha khan tûm thing le zîngziri irlim an chuangtira.

⁶Khan a en inhoitirna hrangin lunghluhai leh a’rvotira, rângachak chu Parvaim rama rângachak a ni.

⁷A in chu tângkhang hai, bang hai, a sûng dâphai, a inkhârhai chu rângachak leh an luana; a banghai khan cherub irlim an chuangtira.

⁸Khan Hmun Irthiang tak a sina; a sei lam chu a khang lian dôr mûk sômhni a nia, rângachak tui leh an luana, rângachak her sânghni an hmanga.

⁹Khan, a kalna rik lam chu rângachak sekel sômringa a ni. Khan, tentan irsâng tak chu rângachak leh an luana.

¹⁰Khan, Hmun Irthiang taka khan cherub irlim inhni a sina; kha khom kha rângachak leh inluan a ni.

¹¹Khan cherub mithahai khan mûk sômhnia seia, cherub inkhat mitha kha chu mûk ringa a nia, bang a va dêna, khan a mitha dang khom kha mûk ringa ngêt a nia, cherub inkhat mitha leh ar phâka.

¹²Khan, cherub inkhat mitha khom kha mûk ringa a nia, bang kha a va dêna; kiangkhat tianga leh ar phâka mûk ringa dêna sei a ni.

¹³Kha cherubhai kha mûk sômhni delin an mitha an phara, an ngîra, in sûng tianga irheiin an ngîra.

¹⁴Khan, puanzâr hrang a duminpôlhai, a sendukhai, a seninlârhai, patzâi irhmihai leh a sina, kha khan cherub irlimhai an chuangtira.

¹⁵Khan, a maton tiang khan mûk sômthum mûk ringaa irsâng chopui inhni a phuna, annihai sîpa khan mûk ringa a ni.

¹⁶Khataka khan zîngziri a sina, chopui sîpa khan a târa; khan dalim irzakhat a sina, zîngziria khan an khâia.

¹⁷Khan, biak in maton tianga khan chopui a phuna, a chang tiang inkhat, a vei tiang inkhat, chang tianga kha Jakin a tia, vei tianga kha Boaz a tia.