Read Hrangkhol 2 THURCHI SUINA 30 Bible Online

2 THURCHI SUINA 30 - Hrangkhol bible

2 THURCHI SUINA 30

¹Mipuihaiin a zoro taka Ferkân kût hmang thei mahaia, ochai tamtak irthâr irthiang zoi irman mahaia, mipui khom Jerusalema irbuk an la tôma.

²Reng Hezekia le a rualhai le Jerusalema mihai an irhrila, a tha khatna ni loiin, tha hninaa Ferkân Kût hmang an inchuka, rêngin Israel ram le Judai rama thu a thonhaia.

³Efraimahai le Manasea-hai len vâng chu Jerusalem tempila honga RENGPA chôiindôma Ferkân kût hmang hrangin lekha an thonhaia.

⁴Reng le mipuihaiin an thil tho chu a sa an tia.

⁵Hmâr tianga, Dan rengata sim tiang Beerseba kâra Israel mi murdi chu Jerusalema a tam thei dôr honga, ferkân kût hmang hrangin an koihaia.

⁶Reng le a rualhaiin palaihai chu Judai ram le Israel rama mihai va fialhai hrangin an tîrhaia, ngênna lekha hiang hin an thonhaia, “Israel mihaio, Abrahama hai, Isaka hai, Jakoba hai Pathian RENGPA tiang hong irhei roi; keini, Assuria kuttum tuang loi, a hring a dama la omhai tiang hong unglân.

⁷Nin pahai le nin uhai nin irchibulhai Pathian RENGPA ata an ilêng inchâi ang khan tho ta no roi, nin ihmu angin a sân deng an ithei a ni kha.

⁸Anni angin nin tukulinlian ta no roi, RENGPA thu chu zôm ta roi. Nin Pathian RENGPA Irthiangtir sai Jerusalem tempila hin hong ta unglân; hitak hin ama chubai hong mûk roi. Khanchu a ningmurna hek a ti.

⁹RENGPA tiang nin hor hei photin chu nin râlhaiin sala an ichel nin rual lungthunghai kha, len renhai an ta, hong hruaihai an ti. RENGPA nin Pathian hi Pathian khonzâna nei a nia, ama tiang nin hor heia niin chu nangni irheisan no ni, ti irziak a ni.

¹⁰An mi tîrhai chu Efraima le Manasea irchihai omna ram kho tina an fea, Zebulun ram khom an tunga; khannisian mihaiin an nuisohaia.

¹¹Khaang pum khom khan Asera hai, Manasea hai, Zebulun hai, Jerusalema hong nuam an oma.

¹²Judai rama khom Pathianin sin a thoa, rêng le a rualhai thu anga lungrual taka Pathian nuamlam tho an irzuk ok tâka.

¹³Tha hni zoia chu bai chol pol loi kût hmang hrangin Jerusalema mi tamtak an irbuka.

¹⁴Jerusalema pathian dang, biakna maichâm om murdi chu, mirimhoi hâlna maichâmhai leh an lâka, Kidron tuia an paia.

¹⁵Sûn sômhlei minli ni chu ferkân kûta thilinhlan kêlbelrate chu an thata. Ochai le Levi irchi, porinchehai kha an inzâhai hrai sikin RENGPA hrangin an le’rthiang infâi ving tâka, hâlirvôm thilinhlan khom tempila an inhlan thei tâk a ni.

¹⁶Pathian mi Mosia dân bua hril angin an omna hrang hmun indanghaia an om vinga. Levi irchihaiin thilinhlan thisen chu ochaihai an pêka, anni’n maichâma an intheka.

¹⁷Mi tamtak chu an porche sikin ferkân kûta kêlbelrate that irthiang maka, Levi irchihai khan an that pehaia, RENGPA kuang an inhlana.

¹⁸Efraima hai, Manasea hai, Isakara hai, Zebulun hai laia mi tamtakhai chu an irthâr irthiang no sikin dân loi angin ferkân kût an ihmang a ni.

¹⁹Reng Hezekia chu khahai ta hrangin a chongchaia, “O RENGPA, kin irchibulhai Pathian, porche an ni pum khomin lungrîl taka chubai mûkhai chu ni thathai sikin ngaidamhai ro,” a tia.

²⁰RENGPA’N Hezekia chongchaina kha a irngaia, mihai chu a ngaidama, itin te lo maka.

²¹Râifân takin sûn sari sûng chu Jerusalema honghaiin bai chol pol loi kût chu an hmanga, a sûn tin Levi irchihai le ochaihaiin hnuk inring takin RENGPA inpâkna hla an saka.

²²RENGPA biakna hranga an thil neihai leh inkhôm kaihruai an thei sikin, Levi irchihai chu rêng Hezekia’n an pâkhaia. An irchibulhai Pathian RENGPA chu sûn sari thilinhlan an fâk zoiin

²³sûn sari dang kût hmang nôk an nuama, raifân takin an hmang nôka.

²⁴Reng Hezekia chu sehrât sângkhat le kêlbelra sângsari, mipui thilinhlana hruai an inthea, an hruaituhaiin sehrâtchal sângkhat le kêlbelra sîngkhat an tho saa. Ochai tamtak an irthâr irthiang tâka.

²⁵Mi tukhom Judai rama mi honghai le Levi irchihai, ochaihai, Israel ram ata honghai, Judai ram le Israel rama nam dang oma honghai khom an raiinfân tak taka.

²⁶Jerusalem khuaa khan tukhomin an lôma, Davida nâipa Solomona thi hnunga khaang dôra raifânna la om ngai ma.

²⁷Levi irchihai le ochaihaiin mipui ta hranga satvurna an hrila, RENGPA’N a le’rngai pehaia, an chongchaina chu a hmun irthiang irvân a idên a ni.