Read Hrangkhol 2 THURCHI SUINA 31 Bible Online

2 THURCHI SUINA 31 - Hrangkhol bible

2 THURCHI SUINA 31

¹Kût an chînin chu Israel mihai chu Judai ram kho tina an fe irtheka, an lungphunhai, an pathiannu Aseri irlim an iphunhai an naminrîla, maichâmhai le hmun irsâng, nam dang pathian an biakna hmunhai an insiata, Judai ram khêla Benjamina hai, Efraima hai le Manasea biala mihai khom an insiata, mâni in tiang an kîr nôk tâka.

²Reng Hezekia chu ochaihai le Levi irchihai chu sin an irsem ngai ang khan an tho hrang dân an fel pehaia. An sin hrang chu hâlirvôm thilinhlanhai, irngeina thilhai le tempila Pathian biakna bukhalâi hai, tempil mikot kôla RENGPA inpâkna hla saka, lômthu hrilhai a ni.

³Hezekia chu ama sehrât le kêlbelra rual rengata a sûn tin le a zân tin hâlirvôm thilinhlan hranghai le, sabat nihai, tha thar nihai le kût zoroa hâlirvôm thilinhlan RENGPA dân bua inhlan hrang a iti dôr chu a itum ving a ni.

⁴RENGPA dânin a inphût angin, an zoro nei an hmang theina hrangin, ochaihai le Levi irchihai dongtum thilinhlan chu pe mai hrangin Jerusalema mihai chu Hezekia’n a hrila.

⁵Khaanga thu a pêkin chu Israel mihaiin an thilpêk bai indi a sa zâthai, uainhai, oliv hriakhai, khuaihlutui hai le an thil tharhai le an inei murdi an sôma inkhat leh an hong pêk tâka.

⁶Judai ram khopuia om murdihaiin an sâ sôma inkhathai, an Pathian RENGPA kuang thil tamtak an ipêkhai chu an hong chôi ngaia.

⁷A tha thumna ata chu an hong pêk phut tâka, tha sari tena an hong ipêkhai chu a irbuk hluk tâk a ni.

⁸Reng Hezekia le hruaituhaiin thilpêk tam lam kha an hmu’n chu RENGPA an chôiindôma. Israel mipuihai khom an inpâka.

⁹Rengin ochaihai le Levi irchihai kuanga thilpêk lam chu an ikhop le khop loi ar donhaia.

¹⁰Zadoka irchia ochai inlaltak Azaria’n, “Mihaiin thilpêk tempila an hong chôia ta hi chu fâk hrang kin nei tâka, fâk sêng loi tamtak a izôk a ni, RENGPA’N a mihai sat a vura, hihai ang hi ei inei thei a ni,” a tia.

¹¹Reng thupêk angin tempil ram sûnga hin neinun siakhômna an sina.

¹²An thilpêk le sôma inkhat chu a porinche loina hrangin an siaa. A enkol hrangin Levi irchia mi Konania an inkunga, a sangpa Simeia’n a changpuia.

¹³Anni hnuaia sin hrangin Levi irchi Jehiela hai, Azazia hai, Nahata hai, Asahela hai, Jerimota hai, Jazabada hai, Eliela hai, Ismakia hai, Mahata hai, Benaia haiin chu rêng Hezekia le ochai inlaltak Azaria kha an inkunga.

¹⁴Imna nâipa Korea, tempil nisua tianga mikot hrungtu hruaitutak chu RENGPA kuanga an thilinhlan le ser bîkhai zêk hrangin an inkunga.

¹⁵Kho dang, ochaihai omna khan hi Levi irchi Edena hai, Miniamina hai, Jesua hai, Semaia hai, Amaria hai, Sekania hai chu fâk hrang kha satakin an sempuia, an Levi irchi chanpuihai khom; a poimo le poimo loihai khom ti loiin an isem sîp sîp ngai a ni.

¹⁶Pasal kum sômthum chung tiang, tempila sintho theihaiin chu an dinghmun enin an donga.

¹⁷Ochaihai chu an irchi anga irsan thei hrangin sin an irsema; Levi irchi kum sômhni chung tianga mihai chu a pa pâla sintho hrangin an semhai a ni.

¹⁸An irhming chu an dôngmahai, an nâihai le an iompui indethai leh an irziak vinga, itiklai khoma sintho hranga koihai thei an ni.

¹⁹Arona irchihai omna hrang thingtâng khua le a kôlvêla sâ vâina ram inkunga om, ochaihai kuanga fâk le nêk hrang sem hrang an inkunghaia, Levi irchihai irhming chuanghai khom an pêkhai ngai.

²⁰Judai ram pumpuia rêng Hezekia chu a Pathian RENGPA kuang, sin sa le a lôm lamin sin a thoa.

²¹A diktakin a Pathian sin a thoa, tempil a’rngaiirsânga, a dânhai a zôm hrai sikin, lam tinrênga a irhniangtir a ni.