Read Hrangkhol 2 THURCHI SUINA 32 Bible Online

2 THURCHI SUINA 32 - Hrangkhol bible

2 THURCHI SUINA 32

¹Hezekia’n RENGPA sin satakin a tho zoia hin Assuria rêng Senakeriba’n Judai ram a hong doia, kul nei khuahai chu a sipaihai ar hualtira, kul banghai an siattirhaia.

²Hezekia’n Jerusalem khom doi a tum ti an hriatin chu

³a rualhai leh an irhlet irhlôma, Assuria-haiin Jerusalem an hong nâi tena tui in hrang an nei loina hrangin kho kôla tuikuanghai chu nelinbitpai zit hrangin roi an rêla.

⁴Hruaituhai khan mi tamtak an hruaihaia, tuikuang om murdi chu tui irhmu loiin an nelinbit zita.

⁵Rengin kho kul bang indernahai kha a phoa, in irsânghai a sina, Jerusalem kho milui Milo an iti irnêng an inelinbitna kul banghai a sin insatira, ufei le phô tamtak an sintirhaia.

⁶A kho mihai chu sipai hruaituhaiin an hruaihaia, khopui lûtna mikot tualzôl lian taka khan mihai an bukkhômhaia, ar chuhaia.

⁷An kuang khan, “Huaisen takin om unglân, irnak song roi. Assuria le a sipai tamhai hi chihai no roi, nin ichi viat hrang ni ma, anni nêka roiinpui ei kôla hin a iom a ni.

⁸Ama chu mihriam hrâtnain a’rnghata, eini chu RENGPA, ei Pathianin ni san a ta, râl ni doipui a ti,” a tia. Mipuihai chu Juda rêng Hezekia thu sikin an irtha a’rngam pehai tâka.

⁹Senakeriba sipaihai chu Lakis khuaa an om zoiin Hezekia le Judai rama mi a hruaia, Jerusalema omhai kuang palai a tîra.

¹⁰Assuria rêng Senakeriba’n hiang hin a tia, “Jerusalem lâka om hranga khan imo nin la iam sika nin la iom mai?

¹¹Hezekia khan, RENGPA kin Pathianin Assuria kut rengata ni san a ta, tiin tuiinhrâl le phîngchâma thi hrangin nangni a ihuang mo ni ma?

¹²Nin Pathian biakna hmun irsâng le maichâmhai setin Jerusalem le Judai rama mihai chu maichâm inkhata Pathian chu chubai mûk nin ta, khatak khan thil inhlan nin ti, titu kha hi Hezekia hi mo ni ma?

¹³Keima le ka pahaiin ram tina nam danghai kin isoisak dânhai kha nin lan hriat mo? Anni pathianhaiin an mihai kha ki kut ata an ni sut thei ngai mo?

¹⁴Ka pa khan an pathianhai kha an doktirhai vinga, nin Pathian hin a kut ata nangni san le mo nin iam?

¹⁵Khasikin, Hezekia hin nangni huang no ri se, a he la no unglân, Assuria rengata a biaktuhai khan a san thei tûte nam pathian om mahai. Nin Pathian khomin nangni sansuak zoi ni mo,” a tia.

¹⁶Assuria sipai hruaitu khan RENGPA Pathian le a siahlo Hezekia chu hi nêka sa loiin a hril insiata.

¹⁷Assuria rêngin lekha leh Israelhai Pathian RENGPA chu irkhâmpui maka, nam dang pathianhai khomin a kut ata chu, nang sansuak thei maka, Hezekia Pathian khomin a mihai chu ama ata nangni sansuak thei ni mo? tiin a’rziaka.

¹⁸Khua inhnê olsam ual sabeiin Jerusalem kul kôla omhai insî a tuma, Hebrai chongin thu a hrila.

¹⁹Jerusalem Pathian chu nam dang pathian, mihriam isiamhai angin a soisak a ni.

²⁰Reng Hezekia le Amosa nâipa deipu Isaia chu an chongchaia, Pathian an koia.

²¹RENGPA’N vântîrtôn a zuang tîra, Assuria sipaihai le an hruaituhai a zuang thata. Assuria rêng chu mualphoi takin an khua tiang a kîr tâka. Sûn khat chu an pathian biak ina a om laiin a nâi senkhathaiin khandai leh an tuk thata.

²²Reng Hezekia le Jerusalema mihai chu khaangin Assuria rêng Senakeriba le an râlhai kut rengata RENGPA’N a sansuaka. An kôlvêla ramhai leh irngei takin an omtir tâka.

²³Jerusalema RENGPA kuang thilinhlan hrang mi tamtak an honga, Hezekia kuang khom thilpêk an hong pêka, nam tinin Hezekia an irngaiirsâng a ni.

²⁴Kha zoro laia khan Hezekia chu thi vângin a naa, a chongchaia, a dam nôk hrang thu irsinsiana RENGPA’N a sin pea.

²⁵Khannisian, Hezekia chu RENGPA’N a chunga a itho pe angin tho loiin a’rsongpuia, khasikin Judai ram le Jerusalemhaiin an tuang tâka.

²⁶Inhnung tiang chu Hezekia le Jerusalema mihai an irsîra, an irngaiintôma, Hezekia dam sûng chu RENGPA ningmurna an chunga tung pehai ta ma.

²⁷Reng Hezekia chu a’rchong ok tâka, tukhomin an irngaiirsânga, a rângachak hai, tangkarua hai, lungmantam hai, thil mirimhoi hai, phô le thil dang hlutak tak hrêna hrangin in a sina.

²⁸A buhai, uainhai, oliv hriakhai siana hrang siakhômna in a sina; sehrât inhai, kêlbelra irkul a sina.

²⁹Hihai khêla hin Pathianin kêlbelra hai, sum le pâi chi tinrêng a pêk saa, khuahai a sinsiama.

³⁰Hezekia hin Gibon tui a tiala, tui lam a sina, Jerusalem kho sûnga khur inkhata an luang irchuntirhai a ni. Hezekia chu a sintho hmun tina manchang a suaa.

³¹A chunga sinirkhêl irsinsia hrangin Babulon rêngin palai a hong tîrin chu mi i ang mo a ini iti, Pathianin eninfel hrangin a bingin a isia a ni.

³²Reng Hezekia sintho danghai, a sintho sahai chu, Amoza nâipa deipu Isaia lekhabu le Israel le Judai rênghai thurchi irziakna bua a chuang.

³³Hezekia chu a thia, rêng thânmual chuanchunga an phûma, Judai ram le Jerusalemin a thi kha an chôiindôm oka. A nâipa Manasea chu ama irthûlin an lal tâka.