Read Hrangkhol 2 THURCHI SUINA 33 Bible Online

2 THURCHI SUINA 33 - Hrangkhol bible

2 THURCHI SUINA 33

¹Kum sômhleihni a niin Manasea chu Judai rama an lal irphuta, Jerusalema kum sômringa le ringa an lala.

²Khan, RENGPA sikin an ihnôlna rama namhai thil intirom thohai ang kha a thoa.

³A pa Hezekia’n a lei insiatpai tâk, nam dang pathianhai biakna hmun irsânghai kha a sin insatira, Baal makunga irbôlna inhlanna hranga maichâm an sintira, pathiannu Aseri irlimhai an sintira, ârsihai chubai a mûka.

⁴Kumtuanga RENGPA biakna hrang tempil an kunga khan nam dang pathian maichâm a sina.

⁵Tempil tentan inhnia khan ârsi biakna hrang maichâm a sina.

⁶Hinom irhôra hâlirvôm thilinhlanna’n a nâipahai an hlana;

⁷tasânhai le kutzia en theihai, ârsi en theihai a hmanga, mithi châ theihai, tasân theihai a hmanghaia. RENGPA’N a sa a iti loihai a thoa, a ning an mur pe ta a ni.

⁸A millim siam chu tempila a siaa, Pathianin Davida le Solomona kuanga, “Israel nam murdihai laia Jerusalem le hi in hi ki’rhming lamna hranga inthang a ni. Kumtuanga ki thupêk murdi an zôma, ki thu’nkunghai le ki dânhai, ki siahlo Mosia ihrilhai kha an zômin chu Israelhai hi itiklai khoma an pahai kuanga ki ipêk hrang ram ata hi inhnotsuakhai no ning,” a tih tâka.

⁹Manasea’n Judai ram le Jerusalem mihai chu thil dik loi an thotirhaia, Israelhai makunga a inhnotsuak namhai ti nêka sual lian ual an tho tâk a ni.

¹⁰RENGPA’N Manasea le a mihai kuang thu a hrila, irngai pe nuam mahaia; khasikin Assuria sipai hruaitu chu RENGPA’N Judai ram an doitira.

¹¹Manasea chu an chela, zîngziri hrui leh an vîka, Babulon-a thîrhrui leh an kaia.

¹²A chardong hrai sikin Pathian RENGPA makunga irhnuai takin, changpuina ar zong tâka.

¹³Manasea chongchaina chu a le’rngaitua pea, a izonghai chu sâmin Jerusalema an fetir nôk tâka. Manasea’n chu RENGPA chu Pathian a nih ti an hriat infel thei tâka.

¹⁴Kha zoiin chu Davida khopui nisua tianga kul bang pên tiang khan Manasea’n in a zom irsânga, Gihon tui omna irhôr hmâr tianga Nga mikot kôla ‘Ofel’ an itihna dênin a sina. Judai rama kul nei khua tina sipai pâl khat, hruaitu inkhatin a siahaia.

¹⁵Tempil ata nam dang pathian irlim le millim inluan, ama isiahai chu a thonpaia. Tempil mual le Jerusalem khua nam dang pathian biakna maichâm om khom kha a lâka, a paia.

¹⁶RENGPA biakna maichâm balhai kha a sina, irngeina thilinhlanhai; lômthu hrilna thilinhlanhai an hlana, Judai rama mi murdi chu Israelhai Pathian RENGPA an biaktirhaia.

¹⁷Mipuihai kha irbôlna hmun pângaia la irbôl maihai khomsian, RENGPA kuang vai an irbôl ta a ni.

¹⁸Manasea thil tho dang murdi, Pathian kuanga chongchaina hai, Israelhai Pathian RENGPA irhminga deipuhaiin a kuanga an thuhrilhai chu Israel rênghai thurchi irziakna bua a chuang.

¹⁹Reng Manasea chongchaina le Pathian isâmna hai, a irlet zoia thilsual a ithohai thurchi, nam dang pathian biakna hmun irsânghai, Aseri irlim sina, a millim inluan a ibiakna thu hai, deipuhai thurchi irziakna bua a chuang sa ving a ni.

²⁰Manasea chu a thia, rêng ina an phûma, a nâipa Amona chu ama irthûlin an lal tâka.

²¹Amona chu kum sômhni inhni a niin Judai rama an lal irphuta, Jerusalema kum hni an lala.

²²A pa Manasea angin RENGPA chunga thilsual a thoa, a pa millim inluanhai chu chubai a mûkhai tâka.

²³Khan, a pa angin irngaiintômna nei maka, RENGPA tiang irhei nuam maka, a pa nêkin a isual ual a ni.

²⁴A rualhaiin an khita, a ina an thata,

²⁵Judai rama mihaiin Amona thattuhai kha an thathaia, a nâipa Josia chu rêngin an siama.