Read Hrangkhol 2 THURCHI SUINA 35 Bible Online

2 THURCHI SUINA 35 - Hrangkhol bible

2 THURCHI SUINA 35

¹Reng Josia’n RENGPA irhmingin Jerusalema Ferkân kût a hmanga. Tha khatna sûn sômhleiminli nî chu kûta hmang hrang sa a thata.

²Ochaihai chu tempila an sin hrang a sem pehaia, sataka sin hrangin an thorhaia,

³RENGPA ta hranga ser bîka, dân irziaktu Levi irchihai khom hiang hin a hrilhai. “Davida nâipa Solomona in sin sûnga khan Thuthung Bôm hi chu se roi, nangni irzôn kochok nang ta no ni. Nin Pathian RENGPA le a mi Israelhai sin nin itho hrang a ni.

⁴A chi chiin tempila nin omna hranga om unglân, nin itho hrang rêng Davida le a nâipa Solomona inkung ang khan tho roi.

⁵Sin nin irsem tena Israel in sûng mihai changpuitu hrang mi senkhat nangni bê ki ta,

⁶ferkân kûta sa hrang kêlbelra le kêl nin ithat hrang a ni. Atûn irthâr irthiang roi, an thilin hlan hranghai inhlanpuihai unglân, Mosia kuang RENGPA thupêk ang khan nin urêng Israelhaiin an zôm theina hrangin,” a tia.

⁷Mipuihai hmang hrangin Josia’n ama sâhai laia mi kêlbelra hai, kêlbelrate hai le kêltak sîngthum le sehrâtchal sângthum a thata.

⁸A ihruai mi lianhai khomin mipuihai, ochaihai le Levi irchihai fâk hrang an tho saa. Tempil hruaitu ochai inlaltak Hilkia hai, Zekaria hai le Jehiela haiin belrate le kêltak sînghni sângruk le sehrâtchal irzathum, kût sûnga thilinhlana inhlan hrangin ochaihai chu an pêka.

⁹Levi irchihai hruaitu Konania hai, Semaia hai le a sangpa Nethanela hai, Hasabia hai, Jeiela hai, Jozabada haiin kêlbelrate le kêltak sângringa le sehrâtchal irzaringa, Levi irchihai thilinhlana hmang hrang an tho saa.

¹⁰Ferkân kût hmangna hrangin itinrêng an infel zoiin chu, an omna hmun inkunga an oma.

¹¹Kêl le belra an that zoiin chu Levi irchihaiin a vun an hlâia, ochaihaiin a thisen kha maichâma an intheka.

¹²Hâlirvôm thilinhlana hmang hrang chu Mosia dân bua a irziak anga inhlan hrangin an sema.

¹³Levi irchihai chu dân angin ferkân kût hme chu an hâl inhmina, hme irthiang senkhat chu bêla hai, thîr bêla hai, bêl lianhaia an suanga, a hme chu mipui an semhaia.

¹⁴Kha zoiin chu anni fâk hrang le Arona irchi ochaihai hrang an suang nôka, ochaihai khan hâlirvôm thilinhlan le an thilinhlana a thâi hâlna mei chu zânkhuain an buaipuia.

¹⁵thil tum thei mi, Asafa irchi, Levi irchi, hihai hi rêng Davida tho dân angin an omna hrang hmuna, Asafa hai, Hemana hai, Jeduthuna hai, rêng deipuhai hin sin an thoa. Tempil hrungtuhai hrang khom irthon nang maka, an rual Levi irchi, mi danghai khan ferkân kût hme chu an lei sinsiam pehaia.

¹⁶Reng Josia thu angin RENGPA chu an chongpuia, tho hrang murdi, ferkân kût hmang hai, maichâma hâlirvôm thilinhlan inhlanhai chu an thoa.

¹⁷Sûn ruk sûng chu ferkân kût le bai chol pol loi kût chu Israel mihaiin an hmanga.

¹⁸Deipu Samuela thi zoiin hianga roiinpui hin ferkân kût la hmang ngai mahaia. Reng Josia hai, ochai hai, Levi irchihai, Juda le Israel rama omhai le Jerusalema omhaiin ferkân kût an ihmang ang hi la hmang ngai mahai.

¹⁹Reng Josia kum sômhleiriat an lal kumin an ihmang a ni.

²⁰Reng Josia’n hiang dôra tempil a’rvôtir zoi hin Aigupta rêng Nekoa chu Eufrates tui kôla, Kharkemisa, irdoi hrangin a sipaihai a hruaia. Josia’n lei danh a tuma.

²¹Nekoa khan, “Nang Juda rêng, hi thila hin ite ni kopna hrang om ma. Nang doi hrangin zuang ma ung, ki râlhai doi hranga zuang kêng ki ni. Pathianin irhnot hrangin a ni tia, keima tianga kop a nia, khasikin ni lei khâl tum no ro, nan siatna a ti,” tiin palai a tîra.

²²Josia’n lei doi a tum maia, Nekoa hmanga Pathian thu hril chu nuam maka, a irvo danglamin, Megido phâia an irdoina khan a fea.

²³An irdoi lai khan Aigupta sipaihai thalin Josia kha a tok tâka. A tâli chalaitu kuang, “An nin phop innatir hraia, irdoina hmun ata hi ni suakpui ro,” a tia.

²⁴Ama tâli ata an irzôn suaka, tâli dang chunga an siaa; Jerusalema an tuanga. A thia, rênghai thâna an phûma, Judai ram le Jerusalem mihaiin an inhroia, an sûnpuia.

²⁵Deipu Jeremia chu Josia sûnna hla a phuaa, Israelhai laia hla sak mi, nupang le pasal rêng sûnna hla an saka. Sûnna hla irziak khômna bua, kha hla kha a chuanga.

²⁶Josia thil tho murdi le RENGPA a irngaiinna lamhai, dân a izôm lamhai,

²⁷a phut ata a mong dênin a thurchi chu Israel le Juda rênghai thurchi irziakna khan a ichuang ving a ni.