Read Hrangkhol 2 THURCHI SUINA 36 Bible Online

2 THURCHI SUINA 36 - Hrangkhol bible

2 THURCHI SUINA 36

¹Judai rama mihaiin Josia nâipa Joahaza chu rêngin an inthanga, Jerusalema sahriak an pola.

²Joahaza chu kum sômhni inthum a niin Judai rama rêng a changa, tha thum an lal irmana.

³Aigupta rêng Nekoa’n sala a chela, Judai ram chu, khâzana tangkarua her sângthum irzaminli le rângachak her sômthum minli an chôitira.

⁴Khan, Nekoa’n Joahaza upa Eliakima chu Judai rama rêngin a siama, a’rhming khom Jehoiakima tiin a phua nôka, Joahaza chu Aigupta rama a hruaia.

⁵Jehoiakima chu kum sômhni ringa a niin Judai rama rêng a changa. Jerusalema kum sômhleikhat an lala.

⁶Babulon rêng Nebukadnezara chu Judai ram a doia, Jehoiakima chu a chela, thîrhrui leh khitpumin Babulon-a a hruaia.

⁷Nebukadnezara’n tempila thil hlu senkhat chu a chôi pea, Babulon khua, a ina a siaa.

⁸Jehoiakima sintho murdi chu, thil intirom tak tak a ithohai le thil sual a ithohai chu Israel le Juda rênghai thurchi irziakna bua a chuang ving a ni; ama irthûlin a nâipa Jehoiakina chu an lal tâka.

⁹Jehoiakina chu kum sômhleiriat mi a niin Judai rama rêng a changa, Jerusalema tha thum le sûn sôm an lal irmana. Ama khom RENGPA chunga thil sual a thoa.

¹⁰Kholum a hor phut tiang chu rêng Nebukadnezara a honga, Babulon sala a hruaia; tempila thil hlu murdi a chôipai vinga. Nebukadnezara’n Jehoiakina sangpa Zedekia chu Judai ram le Jerusalema rêngin a sia tâka.

¹¹Zedekia chu kum sômhni inkhat mi a niin Judai rama an lala. Jerusalama kum sômhleikhat sûng an lala.

¹²RENGPA mithmua thil sual a thoa; RENGPA thu intungtirtu deipu Jeremia thu lak irngai zât om mah a ti ngaia.

¹³Zedekia chu Nebukadnezara ata tehel a zonga, Pathian irhmingin iam omna thu an kungpuia, rêngin a siam tâka. Tukullian a songa, irlet nuam maka, Israelhai Pathian RENGPA tiang irhei nuam maka.

¹⁴Juda ulianhai, ochaihai le mipuihai lakin an kôlvêla nam sualhai omdân lâkin, RENGPA irthiangtir sai tempil chu millim biakin an innimtira.

¹⁵Tempil le a mihai chu a san nuamhai sikin, mipuihai irchutir hrangin an irchihai Pathian khan deipuhai a tîrhai maia.

¹⁶Khannisian Pathian mi tîrhai chu an lei manêphaia, an thu lak ite la pehai mahaia. Deipuhai chu innuisanhaiin, inhnung tiang chu RENGPA kha a sate’n a ning an mur pea.

¹⁷RENGPA’N anni soisak hrangin Babulon rêng a hong hruaia, rêngin Judai rama ruathartehai chu tempil sûnga khom a that phiarhaia. Ulian le nâipang lêk loiin, nupang pasal, hrisêl le sêl loi dênin ite inrenna boiin. Pathianin a kuta a ipêk ving a ni.

¹⁸Babulon rêngin tempil kha an moka, thilhlu an ihrêhai a lâka, rêng in le mi lianhai ina thil omhai khom Babulon-a a chôi vinga.

¹⁹Tempil le kho sûnga inhai chu a hâla, khopui kul bang neihai a seta.

²⁰A thi zoi loihai chu Babulon-a a hruaihaia, ama le a rualhai chu suaka, Persia hai an hong tung dênin an oma.

²¹Jeremia bâia RENGPA thu lei hril chu, Kum sômsari sûng chu nin ram châr a ta, a iti kha a hong itung a ni ta.

²²Persia rama rêng Kura an lal phut kumin, RENGPA’N Jeremia bâia a thu hril hlo a hon chuktira. Reng Kura kha a kaihara, hiang hin thu an pêktirhaia: a ram sûng hmun tina tep thei hrangin irziakin thu a thon dara:

²³“Hi hi Persia rêng Kura thupêk chu a ni. RENGPA, irvân Pathianin rammual pumpuia roirêltu mi a siamhaia. Judai ram le Jerusalema hrang tempil sin hrangin a ni tia. Khasikin, Pathian mihaio, nin rêngin kha khan fe roi, nin Pathian RENGPA’N nangni ompui ri se,” tiin.