Read Hrangkhol 2 THURCHI SUINA 5 Bible Online

2 THURCHI SUINA 5 - Hrangkhol bible

2 THURCHI SUINA 5

¹Khanchu, Solomona’n RENGPA in ta hranga a isin chu a zoi diam tâka: khanchu Solomona’n a pa Davida’n thil a lei inhlan tâkhai kha a bukkhôm nôka; tangkarua hai, rângachak hai, hmangrua dang murdi chu Pathian ina irchon hrêna khan a sia tâka.

²Khanchu, Solomona’n Israel ulianhai le an nam hruaitu murdihai chu, Davida khopui Zion ata RENGPA Thuthung Bôm irzôn hrangin Jerusalem khuaa a bukhaia.

³Khanchu, Israel mi murdihai chu tha sarina kût an ihmang hranga khan an rêng kuang an irchuna.

⁴Khanchu Israel ulianhai kha an honga, Levi irchihaiin bôm kha an irzôna.

⁵Khan, RENGPA bôm le irtongna puan in le puan ina bêlbûr irthiang murdi chu an lâkhaia; annihai kha ochai Levi irchihaiin an irzôna.

⁶Khan, rêng Solomona le Israel a honghai khan a kuanga hong irbukhai chu bôm kôla khan an irchuna, kêlbelra le sehrâtchal tep zoi loi le hril zoi loihai leh an irbôla.

⁷Khanchu, ochaihaiin RENGPA Thu’nkungna Bôm chu a omna hranga khan an siaa, in sûnga ama biakna hmun, hmun irthiang tak, cherub hai mitha hnuaia khan.

⁸Cherubhaiin bôm omna chung irdîna khan an mitha an phar chiana, cherubhai khan bôm le a’rzônna zônfunghai kha an irkhupai vinga.

⁹Kha a zônfunghai chu a sei oka, a zônfung hmorhai chu biakna hmun kôla Hmun Irthiang ata ar hmu theia; khannisian pên tiang ata chu irlang thei ual ma; atûn ten hin a la iom mai a ni.

¹⁰Aigupta ram ata an suaka, RENGPA’N Israel irchihai kuang thu a intung laia Mosia’n Horeb tânga lungphêk inhni a isia tih no chu, kha bôm kôla khan ite a dang om mah.

¹¹Khanchu hiang hin a nia, ochaihai chu Hmun Irthiang ata an hong suak le khan, (Ochai omhai murdi chu an irthâr irthianga, a pâlin irsiam ual loiin;

¹²Levi irchi hla sak mihai khom an rêngin, Asafa hai, Hemana hai, Jeduthuna hai, an nâipasalhai le nâinupanghai, puanchek sila irvôin têngrep hai, perkhuang hai, dâr hai le maichâm nisua tiang an ngîra, an laia ochai irzakhat sômhni bekul tumin an om a ni.)

¹³Hiang hi a nia, bekul tumhai le hla saktuhaiin RENGPA inpâkna le lômthu hrilna an itumhai chu hmunkhata inhriat thei a ni; bekul le têngrep le thil dang irhâi an hon suaa, “Ama lak a satak a nia, a khonzâna lak kumtuanga om hrang a nia,” tia RENGPA an hon pâkin chu, RENGPA in chu sûmpuiin a sip zit tâka.

¹⁴Khanchu, sûm sika khan ochaihaiin an sin khom tho thei loiin an oma, RENGPA roiinpuinain Pathian in chu a isip zoi tâk a ni.