Read Hrangkhol EZRA 3 Bible Online

EZRA 3 - Hrangkhol bible

EZRA 3

¹Khan tha sarina a hong tung tena chu Israel mihai kho sûnga an om laiin, mihai kha irrualin Jerusalema an irbûma.

²Khanchu Jozadaka nâipa Jesua le a sangpa ochai le Sealtiela nâipa Zerubabela le a urênghai an hong thoia, Pathian mi Mosia dâna chuang angin hâlirvôm thil irhlanna’n Israelhai Pathian maichâm an siama.

³Khan maichâm chu a omna hmun pangaia khan an siaa; khataka omhai khan chi zaphai khomsian, maichâma khan RENGPA hrang hâlirvôm thil an inhlana.

⁴An irziak angin Kairêng kût an hmanga, a nitina tho hranga inkung angin a dôn te’n a nitin thil chu an irhlana.

⁵Kha zoiin chu a nitin thil inhlanhai, tha thar thil inhlanhai, RENGPA hranga sûn an inkung ang takin an sera; an nuam lam taka RENGPA kuanga lôm takin an irhlana.

⁶Tha sarina, sûn khat nî ata hâlirvôm thil inhlanhai RENGPA kuanga an iphut a ni; khannisianlân RENGPA Biak in lungphûm chu la phûm mahai.

⁷Lung tukhai le kuttheithiamhai sum an pêka; Persia rêng Kura iphal dân angin, Sidar thing Lebanon ata tuipuia Jopa tena lei la hrangin Sidon le Tura mihai chu fâk nêk le sahriakhai an pêka.

⁸Khan Jerusalema Pathian in an intung hnunga kum hni tha hnina nî chu Sealtiela nâipa Zerubabela hai, Jozadaka nâipa Jesua hai, an urêng ochai le Levia irchi danghai sala zôk murdi Jerusalema fehai an rêngin an pûta; Levi irchihai chu kum sômhni chung tianga mihai chu RENGPA in sina hruaitu hrangin an inkunghaia.

⁹Kha tena chu Jesua chu a nâihai leh a urênghai le Kadmiela nâihai le, Juda nâipa leh khan Pathian in sintuhai kha an ir-ôihaia: Henadada nâihai; an nâihai le an urêng Levia irchihai le,

¹⁰Khan a sintuhaiin RENGPA in lung phûm an hor khamin chu ochaihai chu an tukrivo irbelin, bekul chôiin Levia irchi Asafa nâihai chu Israel rêng Davida’n tho hrang dân a lei inkung angin RENGPA inpâk hrangin an inngîrtirhaia.

¹¹“Ama chu a saa, a lungkhamna khom Israel mihai chunga om kumkhua a ti,” tiin RENGPA inpâk le a kuanga lômthu hrilin hlain an saka. RENGPA in lungphûm an phûm tâk sikin RENGPA an inpâkna khan mipuihai chu an khêk sup supa.

¹²Ochai le Levia irchi leh a ina a lu u ual tamtakin, a in milui hmutuhai putarhai chu an mithmua hi lungphûm hi an hmu nôkin chu an chapa; mi tamtak lôm sikin an khêka:

¹³Khanchu mihai khan an lôm sik le an chap sika an ikhêk kha theitha loiin; mipuihai chu inring ualin an khêka, an irhâi chu hlatak ata inhriat thei a ni.