Read Hrangkhol EZRA 5 Bible Online

EZRA 5 - Hrangkhol bible

EZRA 5

¹Kha zoroa khan deipu inhni Hagaia le Idoa nâipa Zakaria haiin Judai ram le Jerusalema Juda omhai laia Israelhai Pathian irhmingin thu an hrila.

²Khanchu Sealtiela nâipa Zerubabela le Jozadaka nâi Jesua’n Jerusalema Pathian in chu an hong sin phut nôk tâka; khan an kôla Pathian deipuhai chu anni changpuihai hrangin an oma.

³Khaangin tui varâl tianga ram optu Tatenaia le Sethar-bozenaia le an rualhai an kuang an va fea, hiang hin an va ti pehaia, “Hi in sin nôk hrang le hi kul zoi hrangin tu’n mo thu nangni a ipêk?,” an tia.

⁴Khanchu hiang hin an kuang, “Hi in sintuhai hi an irhming tuhai mo an ini?,” kin tia.

⁵Khannisianlân an Pathian mit chu Juda ulianhai chunga a chuma, Daria kuang an thu kha a tunga, a sâmna an inhriat nôk mâka chu an ram optuhai khan inmatirhai ual mahai.

⁶Tui varâl ram optu Tatenaia le Sethar-bozenaia le a rualhai, varâla om, Apharsak-haiin rêng Daria kuang lekha an thona, hiang hin an irziaka:

⁷“Reng Daria kuang irngeina om ri se:

⁸hi hi rêngin len hre ri se, Judai rama Pathian roiinpui takin, lung liantak taka sin le thing banga sung, takirtâina insua an lei idoina hmun kin fea.

⁹Khanchu hi in sin hrang le kul zoi hrangin tu’n mo thu nangni a ipêk? tiin an ulianhai kin irdona.

¹⁰An hruaituhai irhming kin irziaka, kin infelhai theina hranga an irhming nangni kin irdon a ni.

¹¹“Hiang hin an ni sâma, ‘Irnêng le irvân Pathian siahlohai kin ni, kha dôr kuma sin, Israel rêng roiinpui tak inkhat lei isin sai kin isinsiam nôk a ni.

¹²Khannisianlân kin pi le puhaiin irvân Pathian kha a ning an inmurtir le a milung an inchuk no sikin Kaldai mi Babulon rêng Nebukadnezara kuta a pêka, hi in hi a insiat a nia, mihriamhai chu Babulon tiang a hruaia.

¹³Khannisianlân Babulon rêng Kura inlal kumin, rêng Kura’n hi Pathian in sin insa nôk hrangin thu a pêka.

¹⁴Khan Pathian ina rângachak le sumrua siam bungrua Jerusalem Pathian ina mi Nebukadnezara ilâksuak, Babulon biak ina a isiahai kha rêng Kura’n Babulon biak in ata a lâksuak nôka, mi inkhat ar hming Sesbazara, ram optu kuang a pêka;

¹⁵A kuanga khan hi bungruahai hi lan la, fe ro, Jerusalem biak ina sian lân, khan biak in chu a hmun pangaia sin ni ri se, a tia.

¹⁶Khanchu Sesbazara kha a fea, Jerusalem biak in lungphûm chu a phûma, khatak ata chu atûn ten hin sin a ni ta; khannisian la’rzoi loi a la ni maia.

¹⁷“Khan rêngin sa a ti a ni’n chu, a iti lam a ni le ni loi, Babulon sum ina mi kha hong zong sianlân, rêngin hi thua hin a inuam lam ni hon hril nôk ri se,” tiin.