Read Hrangkhol EZRA 6 Bible Online

EZRA 6 - Hrangkhol bible

EZRA 6

¹Khanchu rêng Daria’n thu a pêka, Babulon-a an irchon bukkhômna, lekhabu in chu an zonga.

²Khanchu Media biala Ekbatan khuaa rêkin chu hi thu chuangna hi an hmu suaka:

³“Jerusalem Pathian in chungchânga rêng Kura’n an lal irphut kumin hiang hin thu a pêka: an irbôlna ngai in chu siaminsat nôk ni sian; a lungphûm khom dettaka phûm ni sianlân.

⁴A’rsânglam mûk sômruk, a’rza lam khom mûk sômruk, lung lianpahai zora thuma irchuan hnungin, thing phêk leh irmîltir hrang a nia, a sinna hi rêng sumpuan ata pe hrang a ni.

⁵Khan Pathian ina rângachak le sumru bêl le bûr chu Nebukadnezara’n Jerusalem biak in ata a ilâksuak Babulon-a omhai khom pe kîr nôk ni sian, Jerusalema an omna hmun chita sia ni sianlân, Pathian ina hrê hrang a ni,” tiin.

⁶Reng Daria khan hiang hin a sâma: “Eufrates nitâk tianga ram optu Tatenaia hai, Sethar-bozenaia hai le an isinpui Eufrates nitâk tianga omhaio: Tempil chu hong nâi no roi,

⁷hi Pathian biak in an isin nôk hi ite tihai ta no roi; Judahai optu le Juda hruaituhaiin hi Pathian in hi a hmun pangaia sin ri sehai.

⁸Kha in an isin nôkna hranga changpui hrangin thu nangni ki pêk. Sin a’rngam loina hrangin Eufrates tuidop tianga bialhaiin, rêng sum hranga an isia kha pe lat hrang a ni.

⁹Irvân Pathian ta hrangin hâlirvôm thil inhlan hrang an innang murdi, sehrâtchaltuai, Belrachal le a tê, fachî, uain, sahriak hai, Jerusalema deipuhai thu ang takin a nitina pe ngêt hrang a ni.

¹⁰Khan kêng irvân Pathian kha mirimhoi irbôlnahaiin an irhlan thei hrang, rêng le a nâihai an dam sôt theina hrangin an ichongchai thei pehai hrang.

¹¹Mi tukhom hi thu indanglamtirtu chu a ina pakhalâi kaidoka, ama chu khatak khan inkhâi ni ri se, hi sika hin a in chu êk painaa siam ni ri seh ti thu nangni ki pêk.

¹²khan khataka ama irhming inomtirtu Pathian khan Jerusalema Pathian in insiat tuma kut thâkhai chu, an rênghai le nam om murdihai inboipai ving hrang a ni. Kei, Daria hin thu ki pêk a nia; a zôm khom an izôm zôi zêl hrang a ni.

¹³Khanchu tui varâl tianga ram optu Tatenaia le Sethar-bozenaia le a rualhaiin rêng Daria lekhathon sikin, khaang tak khan an tho tâka.

¹⁴Khan deipu Hagaia le Idoa nâipa Zakaria thuhril sikin Juda ulianhaiin an sin tâka; Israelhai Pathian thupêk ang le Persia rêng Kura le Daria le Artazerzia hai thupêk angin an sina, an zoi tâka.

¹⁵Kha in kha rêng Daria inlal kum rukna Adar tha sûn thum niin chu zoi a ni tâka.

¹⁶Khanchu, Israel irchihai, ochaihai, Levia irchihai le sala intâng hong zôkhaiin, kha Pathian kha lôm takin inhlanna an hmang tâka.

¹⁷Khan, kha Pathian in inhlanna hrangin sehrâtchal irzakhat, kêlbelrachal irzahni, bêlrate irzaminli an irhlana; khan Israel mi om murdi’n an sual irbôlna hrangin kêlchal sômkhat inhni seng an pêka.

¹⁸Mosia lekhabua chuang angin Jerusalema Pathian sintho hrangin ochaihai, Levi irchihai chu a pôlin an inomtirhaia.

¹⁹Khan sala intâng zôkhai khan tha khatna, sûn sôm sûn minli nî chu Ferkân kût chu an hmang tâka.

²⁰Ochaihai le Levi irchihai chu an bingin an lei irthiang tâk sikin, an rêngin irthiang an ni tâka. Khanchu ferkân kûtna hrangin sala intâng zôkhai leh an urêng ochaihai le, anni ta hrangin an that tâka.

²¹Israel irchi sala zôk nôkhai le RENGPA Israelhai Pathian zong hranga kha rama Pathian thu zômloi porchena ata irthianga, anni zômhai murdi kha an fâka,

²²chol koploi bai kût chu lôm takin sûn sari an hmanga: RENGPA’N anni kha an lômtirhaia, Pathian, Israelhai Pathian in sinna hrangin an kuthai inhrâttir hrangin Assuria rêng lungrîl chu anni tiang a irheitir a ni.