Read Hrangkhol EZRA 8 Bible Online

EZRA 8 - Hrangkhol bible

EZRA 8

¹Hihai hi rêng Artazerzia inlal laia Babulon ram ata ki kuanga honghai, in sûngkua le an irchihai irhming chu a ni.

²Finehasa irchihai laia Gersoma; Ithamara irchihai laia Daniela; Davida irchihai laia Hatusa;

³Sekania irchihai; Parosa irchihai laia Zakaria; pasal irzakhat sômringahai le.

⁴Pahat-moaba irchihai laia Zerahia nâi, Eliehoenaia; pasal irzahni le.

⁵Sekania irchihai laia Jahaziela a nâi, pasal irzathum le.

⁶Adina irchihai laia Jonathana nâi Ebeda, pasal sômringahai le.

⁷Elama irchihai laia Athalia nâi Jesaia, pasal sômsarihai le

⁸Sefatia irchihai laia, Mikaela nâi Zebadia, pasal sômriathai le.

⁹Joaba irchihai laia Jehiela nâi Obadia, pasal irzahni sômhleiriat hai leh.

¹⁰Selomita irchihai laia Jasifia nâi pasal irzakhat sômrukhai le.

¹¹khan Bebaia irchihai laia Bebaia nâi Zekaria, pasal sômhni kiriathai leh.

¹²Azgad irchihai laia Hakatana nâi Johanana, pasal irzakhat sômkhathai le.

¹³Adonikama irchihai laia an irhming chu hihai hi an ni; Elifeleta, Jeuela, Semaia, pasal sômrukhai leh.

¹⁴Bigvaia irchihai laia Uthaia le Zakura, pasal sômsarihai le

¹⁵Ahava tuidunga ki buk khômhaia; kha khan sûn thum kin oma; mipuihai le ochaihai ki enhaiin chu, Levi irchihai zel hmuhai ta ma unga.

¹⁶Khasikin a hruaitu u ualhai, Eliezera, Ariela, Semaia, Elnathana, Jariba, Elnathana, Nathana, Zekaria, Mesulama hai ki koihaia: mi irchutu Joiariba le Elnathana hai khom.

¹⁷Khan Kasifia hmuna hruaitu Idoa kuanga ki tîra; kin Pathian ina sintho hrang hong hruai hranga Kasifia hmuna Idoa le a urênghai Nethinim hai kuanga an hong tîrhai hrang ki hrilhaia.

¹⁸Khan Pathian inrenna sikin Issekela; Mahlia irchihai laia; Israel nâipa, ama nâipa Levia; Serebia, a nâihai le a urêng sômhleiriathai le:

¹⁹Hasabia, Meraria irchihai laia Jesaia, le a urênghai le an nâihai sômhnihai le;

²⁰Nethinim hai, Davida le an milianhai le Levia irchi a sintho hranga irpêkhai laia mi Nethinim hai irzahni sômhnihai a ni hruai pea: an rênga irhming irziak an ni.

²¹Khanchu kin Pathian makunga kin irhnuaia; a kuanga keini le kin nâihai leh kin bungrua murdihai kin chôi theina hrangin Ahava tuidunga khan bu nghei hrang thu kin inpuanga.

²²“Kin Pathian inditna chu ama zongtuhai murdi chunga an sana hrangin an langtir maia; a sinthotheina le a ningmurna chu ama mâksantuhai chunga an langa,” tia rêng kuanga kin hril tâk sikin, lampuia kin râlhai ata ni san hrangin ni sipai le sakor chung chuang mi rêng kuanga zong chu inzak ki tia.

²³Khanchu bu kin ngheia, kin Pathian kuanga zong tatakin; kin izongna chu hlo a nin chuktir pea.

²⁴Khanchu ochai bîk ualhai laia mi sômhleihni Serebia le Hasabia le an urênghai laia mi sômkhat kin danghaia,

²⁵rêng le a roirêltu, a milianhai, le khataka om Israelhaiin kin Pathian in hranga thilinhlan sumru, rângachak, bungruahai ki buka, kin hlana;

²⁶ki ibuk sûnga an kuta ki inhlan chu sumru, talênt irzaruk sômringa, bungrua talên irzakhat; rângachak talênt irzakhat;

²⁷rângachak berbu sômhni, sumthîr sângkhat chitin; dâr irtêk enhoi tak, rângachak anga hlu bungrua inhni a nia.

²⁸An kuang, “RENGPA hranga irthiangtir nin nia, bêlbûrhai khom nin irthiangtir a ni; sumru le rângachak hai hi RENGPA, nin pi le puhai Pathian hranga, mâni nuam thua irhlan a ni.

²⁹Ochai hruaitu inchang ualhai le Levi irchi le Israel mi in sûngkua ar luahai laia Jerusalema, RENGPA ina tentan an sin mân chu hrung unglân, fe roi,” ki tia.

³⁰Khanchu ochaihai le Levi irchihaiin Jerusalema kin Pathian ina chôi hrangin sumru le rângachak le bêlbûr bukhai chu an lâk tâka.

³¹Khanchu Jerusalema kîr nôk hrangin tha khatna, sûn sômhleihni nia chu, Ahava tuidung ata kin suaka; kin Pathianin a nin rena, râlhai ata le lampuia ni len ruanghai ata a nin zôktira.

³²Jerusalem kin tung tâka, sûn thum sôl irngamin kin oma.

³³Khan sûn minli nî chu, sumruhai, rângachak hai, bungruahai chu kin Pathian inah bukin ochai Uria nâipa Meremota kuta kin irhlana; a makunga khan Finehasa nâipa Eleazara a oma; an kôla khan Levia irchi Jesua nâipa Jozabada le Binuia nâipa Noadia hai an oma:

³⁴Tep le varh ving a nia; an ivarh zât khom an irziak vinga.

³⁵Sal ata zôkhaiin Israelhai Pathian kuanga hâlirvôm thil an inhlana, Israel mi murdihai hrangin sehrâtchal sômhleihni, kêlbelrachal sômkuak kiruk, Belrate sômsari sari; sual irbôlna kêlchal sômhleihni: hihai murdi hi RENGPA kuanga hâlirvôm thilinhlan ving an ni.

³⁶Khan rêng thu’nkunghai chu rêng ulianhai le varâl tianga ram optuhai an hrilhaia; anni’n mipuihai changpuiin Pathian in sin chu an suiirzompuihai tâka.