Read Hrangkhol EZRA 9 Bible Online

EZRA 9 - Hrangkhol bible

EZRA 9

¹Khahai kha a’rzoiin chu, mi lianhaiin, “Israel mihai le ochaihai, Levi irchihai chu hitaka mihai leh hin ite danglamna boiin, Kanaan hai, Hit hai, Periz hai, Jebus hai, Amon hai, Moab hai, Aigupta hai, Amor hai sintho intirom an itho angin an thoa.

²An nâinuhai khom an nâipasalhai leh an irneipola; kha irchi irthianghai kha, hi rama mihai leh hin an irneipol tâka; an milianhai le roirêltuhai hi irneinahai hin a tu tak mo an inih ti an ni hong hrila.

³Kha thil kha kin hriatin chu, ki songkol le ki diar ki’r-ekthêra, ki sam le ki hnermul ki phôia, chardongin ki toirak tâka.

⁴Khanchu sal intâng zôkhai inchâina sika Israelhai Pathian thua irthiang murdihai chu ki kuang an honga; khohloi tianga irbôlna zoro phâk dênin a lô lam inhre loiin ki toi raka.

⁵Khohloi tianga irbôl zoroa khan beidong pumin songkol le diar chet pumin ki thoia; ki khûksadela, RENGPA ki Pathian tiang ki bân ki phara;

⁶“O ki Pathian, nangma tianga hor hei hi kin zaka, ki hmâi a isen hlut hlut ngai a ni, ki Pathian, kin inchâinahai chu ni delpha thei rakin a punga, kin thei loinahai hin irvân a suna.

⁷Kin pi le puhai ata atûn ten hin theiloi kin ichang zoi a ni; kin inchâinahai sikin kin rênghai le kin ochaihai le ram danga rêng an ichela, khandaia thathai, sala intânghai, inrûknahai kin tonga, a vuanhaia kin iom ang hin.

⁸Atûn hin kin Pathianin kin mit an vârtira, kin sal omna a nin hriat suaktira, a hmun irthianga khan a nin om indet theina hrangin a la om sunhai a nin suaktira, RENGPA kin Pathian lungthungna kin la idong a ni.

⁹A’rhmang zoi hrang chu kin nia; khannisian kin Pathianin ar hmang zoi hranga kin om laiin, ni’rnghil maka, nin hartir le kin Pathian in indingtir nôk, a siat tâk irvo insatir nôk hranga Judai ram le Jerusalema Kul nei hranga Persia rêng mithmua kin chunga inrenna a zuang irzâmtira.

¹⁰“O kin Pathian, atûn hin imo kin ihril ta hrang? Ni thupêkhai kin mâksan tâk sikin,

¹¹ni siahlo deipuhai hmanga, nin fena hrang, nin ram lua hrang rama mi omhai, porchena sikin a porche tâka, hmun tin kil tin intir a iom zoi a ni ta.

¹²Khasikin nin nâinuhai khom an rêng nâipasalhai irneitirhai ta no roi, nin nâinuhai khom an nâipasalin nei ta nohai sian, an raifânna le a hoi an itihna ite bê’n bê ta no unglân, nin hrât sikin, kha rama thil kha nin fâka, kumtuanga nin nâihai leh nin irdîn suak theina hrangin.

¹³Kin sintho insual sikin le inchâinahai sikin kin chunga hianga thil a hong itung a nia, nang kin Pathianin kin inchâinahai nêka irnêpin deng ni nin thei zoia khom a la omhai khom ni ni la hôi pe ti inhre maiin,

¹⁴ni thupêk kin insiat zoi khom hin hianga thil intirom thotuhai leh hin kin la irnei mai hrang ma ni? A zôk le a khêl thei om loiin, irhmang ving hrang anga kin chunga hin ni ning mo inmur no ni?

¹⁵O RENGPA Israelhai Pathian, nang chu ni fela; a la zôk thei kin nia, a vuana keini ang hin, irngai ro, theiloi changin ni kôla kin oma, hihai sikin tûte ni makunga ngîr thei kin iom loi a ni,” ki tia.