Read Hrangkhol NEHEMIA 11 Bible Online

NEHEMIA 11 - Hrangkhol bible

NEHEMIA 11

¹Mipui hruaituhai chu Jerusalema an oma; sômkhat laia inkhat khopui irthiang Jerusalema inomtir le sômkhat laia kuak kho danga om hrang hai inhriatna’n mipuihaiin tâ an sâna.

²Milungchuk taka Jerusalema om hrang irpêkhai khan mipuihai inpâk an hloa.

³Hihai hi mi rama hruaitu Jerusalema omhai chu an ni: khannisianlân Judai ram sûnga khuahaia khan, an omna hrang khuahaia an oma; khahai kha chu Israelhai, ochaihai, Levi hai, Nethinim hai, le Solomona siahlohai irchi an ni.

⁴Jerusalema khan Juda irchihai laia mi: Zekaria tupa, Uzia nâi Athaia; ama hi Juda nâipa Pereza irchi a ni, a puhai chu Amaria hai, Sefatia hai, Mahalalela hai an ni.

⁵Kolhozea tupa, Baruka nâipa Maaseia; ama hi Juda nâi Sela irchi laia mi a ni. A puhai chu Hazaia hai, Adaia hai, Joiariba hai le Zekaria hai an ni.

⁶Pereza irchia mi chu irzaminli sômruk kiriatin Jerusalem khuaa in le loi an nei.

⁷Benjamina irchi laia mi chu hihai hi an ni: Jesaia nâipa Ithiela, ama nâipa Maaseia, a nâi nôk Kolaia, ama nâipa Pedaia, ama nâi nôk Joeda, ama nâipa Mesulam, ama nâi nôk Salua.

⁸Ama zoi nôk chu Gebaia, Salaia, an rêngin Benjamina irchi Jerusalema omhai chu irzakuak sômhni kiriat an ni.

⁹Khan Zikria nâipa Joela chu an hruaitu a ni; Hasenua nâipa, Juda chu a khuaa ulian tak hnuai renga mi a ni.

¹⁰Hi ochaihai hi Jerusalem-ah an om sa: Joiariba naipa Jedaia le Jakina.

¹¹Mesulama tupa Hilkia nâipa Seraia. Ama hi a puhai chu Zadoka hai, Meraiota hai, le Ochai inlaltak Ahituba hai an ni.

¹²Hi mihai irchi hi irzariat sômhni inhniin Tempila sin an itho ngai a ni. Pelaia tupa Jerohama nâipa Adaia. Ama puhai hi chu Amazia hai, Zekaria hai, Pasura hai le Malkija hai an ni.

¹³An rêngin hi irchihai hi an insûngkuaa hruaituhai le mi irzahni sômminli inhni an ni. Ahzaia tupa, Azarela nâi Amasaia. Ama hi a puhai chu Mesilemota hai le Imera hai an ni.

¹⁴Hi irchihai hi mi irzakhat sômhni kiriat an om, sipai hâitak tak an ni. An hruaitu chu Hagadolim nâipa Zabdiela a ni.

¹⁵Levia irchi Jerusalem-ah omhai: Azrikama tupa, Hasuba nâipa Semaia. Hi Semaia puhai chu Asabia hai le Bunia hai an ni.

¹⁶Sebethaia le Jozabada. Anni hi Levia irchi, mi inlâr tak, Tempil pên tianga sin enkoltu an ni.

¹⁷Asafa irchi, Zabdia tupa, Mika naipa Matania. Ama hi Tempil zaipôl lômna hla sak hruaitu a ni. Bakbukia: ama hi Matania changpuitu a ni. Galala tupa, Samua nâipa, Abdia: ama hi Jeduthuna irchia mi a ni.

¹⁸Jerusalem kho irthianga Levia irchi om murdihai chu mi irzahni sômriat minli an ni.

¹⁹Kha tih no khom kha mikot hrungin Akuba hai, Talmona le an urênghai kul mikot entuhai irzakhat sômsari inhni an nia.

²⁰A ban Israelhai, ochaihai, le Levihai chu Judai ram khua tina mâni ram chita an oma.

²¹Nethinim hai chu Ofel-ah an om: Ziha le Gispa chu Nethinim hai hruaitu an nia.

²²Jerusalem khuaa Levihai hruaitu chu Asafa nâi, hlasaktuhai laia mi Mika, ama nâipa Matania, ama nâipa Hasabia, ama nâipa Bania, ama nâipa Uzia a ni, Pathian in tiang sinchuan thôtu tak a ni.

²³An chungchânga hin rêng thupêk a oma, hla saktuhai khom a nitina an sak hrang bituk a oma.

²⁴Juda nâipa Zera irchia mi Mesezabela nâipa Pethahia chu mipuihai chunga thuneitu rêng irthûla om a ni.

²⁵Khante, mipuihai kha an loimân nâina khuahaia khan an oma. Juda nama mi senkhathai chu Kiriat-arba le a kôla khotehaia Dibon le a kôla khotehaia, Zekabzeel le a kôla khotehaia;

²⁶Jesua le Molada le Betpeleta haia an oma.

²⁷Khan, Hazarsuala hai, Beer-seba le a kôla khotehaia,

²⁸Ziklag-ah le Mekona le a kôl khotehaia,

²⁹Enrimon haia, Zora haia, Jarmut haia;

³⁰Zanoa hai, Adulam, le an khua vêla Lakis le a ram sûnga hai, Azeka le khua vêla an oma. Khanchu Beer-seba ata Hinom irhôr dênin omhmun an khuara.

³¹Benjamina irchihai chu Geba khêla Mikmas haia, Ai haia le Bethel le khote hai;

³²Anathot haia, Nob haia, Anania haia;

³³Hazor haia, Rama haia, Gitaim haia,

³⁴Hadid haia, Zeboim haia, Nebalat haia;

³⁵Lod haia le Ono haia kuttheithiamna irhôrhaia an oma.

³⁶Khan, Judai rama om ngai Levihai pâl senkhathai chu Benjamin hai laia an omtir tâka.