Read Hrangkhol NEHEMIA 2 Bible Online

NEHEMIA 2 - Hrangkhol bible

NEHEMIA 2

¹Khan hiang hi a nia, rêng Artazerzia kum sômhni an lal kum, Nisan tha uain an sôm zoiin uain kha ki lâka, rêng ki pêka. Matona khan chu a makunga beidong hmêl irput ngai ma unga.

²Rengin ki kuang, “Damloi khom ni ual mak chea, itina mo beidong hmêl ni irput tâk hi te? thil dang ni no ni, ni lungrîl a isôl kêng ni a ti,” a ni tia. Khanchu a sân ki chi tâka.

³Keima’n rêng kuang khan, “Reng chu kumtuangin dam sôt ri se: ki irchibulhai thân omna khua chu a ramin a inkhârhai a kânga, beidong hmêl irput loiin mo ki ini hrang?” ki tia.

⁴Khanchu rêng khan, “Imo ni izong?” a tia. Khanchu irvân Pathian kuang ki chongchai tâka.

⁵Reng kuang khan, “Rengin a sa a iti lam a niin chu, ni siahlo hin ni mit ki lei tung ngaiin chu, Judai rama ki’rchihai thân omna khuaa nin fetir ro, khua la va inding nôk hi rong,” ki tia.

⁶Rengin ki kuang, “I dôr ten mo ni va iom hrang, itik tena mo ni ihong thei nôk hrang?” a tia. Khanchu rêngin lôm takin a nin fetira; keima’n hunbi kin danga.

⁷Kha vai kha ni loiin rêng kuanga khan, “Rengin a sa a ti’n chu varâl tianga roirêltuhai irhmupuihai hrangin Judai ram ki fe theina hrangin lekha ni pe’n lân;

⁸khan rêng ram nghâktu Asafa hmu hrangin irhrungna kul inkhâr enna, khopui kul hrang le, ki va iomna hrang in le thing an ni pêk theina hrang lekha ni pe sa ro,” ki tia. Khan ki Pathianin a nin dit sikin rêng kuanga ki izong ang a ni pêka.

⁹Khanchu varâl tianga roirêltuhai kuanga ki va tunga, rêng lekhahai chu ki pêka. Rengin ki kuanga sipai hruaitu le sipai sakor chung chuang mi an fetirhaia.

¹⁰Khan Horon mi Sanbalata le Amon mi siahlo Tobia haiin an len hriatin chu Israelhai san hrangin an hong a nih tiin an milung chuk pehai maka.

¹¹Khanchu Jerusalem ki hong tunga, sûn thum ki’rngam baka.

¹²Zâna chu ki thoia, kei le mi dang tômtein: Jerusalem tah hranga ki itho tum ki Pathianin ki lungrîla a isia chu tûte hril ma unga, ki ichuangna ti no chu sa dang ite chôihai ma unga.

¹³Khan zâna chu phâi tianga mikota ki suaka, Dragon tuisunsuakna tiang le sahrok paina tiang ki fea, Jerusalem kul chim le a inkhâr kânghai ki en vêla.

¹⁴Khan tuisunsuakna lam le rêng dîl dênin ki fea: khannisian ki chuangna sa fe thei ving loina hmun a nia.

¹⁵Khanchu zâna vadung ki’rvâka, kulhai kha ki ena; ki hong kîr nôka, phâi tianga mikota khan ki lûta, kha tiang khan ki hong kîr nôka.

¹⁶Roirêltuhaiin khôn mo ki ife le imo ki itho khom inhre loiin; khan Judahai ochai, mi thathai, roirêltu le mi dang sinthohai ngai khom la hrilhai ual ma unga.

¹⁷Khanchu an kuang, “Kin ngîrhmun a isiat lam hi nin hmua, Jerusalem a ram ti le, a inkhârhai a kâng ti khom nin inhriata: tho insîrinsiata ei ni loina hrangin Jerusalem kul chu indingtir nôk ei ti,” ki tia.

¹⁸Khan ki Pathianin a ni inuampui lam kin sîra, ki makunga rêng thuhrilhai khom. Khanchu anni’n, “Thoi ei ta, indingtir tak tak ei ti,” an tia. Khanchu kha sin sa tho hrangin an kut an inhrâttira.

¹⁹Khannisian Horon mi Sanbalata le Amon mi, siahlo Tobia le Arab mi Gesema’n haiin an inhriatin chu an nin nuisanin, an ni hmusita, “Nin sintho hi itho sika mo? Reng chunga hin nin tehel nin izong ma ni?” an ni tia.

²⁰Khanchu hiang hin ki sâmhaia, “Irvân Pathianin ni’rnghil maka; khasikin keini a siahlohai hi thoi kin ta, indingtir nôk kin ti; nangnihaiin chu Jerusalema hin dongtum mani, irchamneina mani, hnungmân mani ite nei thei no chin ni,” ki tia.