Read Hrangkhol NEHEMIA 3 Bible Online

NEHEMIA 3 - Hrangkhol bible

NEHEMIA 3

¹Khanchu ochai inlal Eliasiba chu a urêng ochaihai leh an thoia, belra lampui an siama; an irthiangtira, a inkhârhai an sina; Hamea in irsâng dênin an irthiangtira, Hananela in irsâng dênin.

²Kha zoiin chu Jeriko mihaiin an siama. Khan anni zoia chu Imria nâipa Zakura’n a siama.

³Khan ngahai lampui chu Hasena nâihaiin an sina, a neinunhai an siaa, a inkhârhai an charêla; a kalna le an tûknahai an sina.

⁴Anni zoiin chu Hakoza nâi Uria nâipa Meremota’n a siam insaa. Anni zoia chu Mesezabela nâi Berekia nâipa Mesulama khan a siam insaa, anni zoi nôkin chu Baana nâipa Zadoka’n a siama.

⁵Khan, anni zoiin chu Tekoa kho mihaiin an siam insaa, khannisian an mi lianhaiin an hruaituhai sina khan irpôl nuam mahaia.

⁶Khan inkhâr milui chu Pasea nâipa Joiada le Besodeia nâipa Mesulama mihaiin an siam insaa, a rêla an siaa, a lampuihai an charêla.

⁷Khan anni zoia chu Gibeon mi Melatia le Meronot mi, Jadona’n, varâl tianga ram optu thu hnuaia om Gibeon mi le Mizpa mihai le an siam insa nôka.

⁸Kha zoiin chu rângachak siamtu laia mi Harhaia nâipa Uziela’n a siama. Kha irzoiin chu mirimhoi siamtu laia mi Hanania’n a siam nôka, Kul irsahai dênin Jerusalem chu an siam insa nôka.

⁹Anni zoiin chu Jerusalem bial chimrip hruaitu Hura nâipa Refaia khan a siama.

¹⁰Khan anni zoiin Harumafa nâipa Jedaia’n a siam insa, kha irzoiin chu Hasabneia nâipa Hatusana’n a siama.

¹¹Harima nâipa Malkija le Pahat-moaba nâipa Hasuba haiin hmun dang le meipui sêmna in irsâng an siam insaa.

¹²Kha zoiin chu Jerusalem bial chimrip hruaitu Halohesa nâipa Saluma’n a nâinuhai leh an siama.

¹³Phâiruam inkhâr chu Hanuna le Zanoa haiin an siam insaa; a inkhârhai charêlin, a kalnahai siamin an tûkna an sin insatira. Khan sahrok paina tianga inkhâr dênin kul mûk sângkhat an sin saa.

¹⁴Sahrok paina inkhâr chu Bet-hakerem bial hruaitu Rekaba nâipa Malkija’n a siam insatira, inkhârhai le a kalna le an tûknahai a siama.

¹⁵Khan Mizpa bial hruaitu Kolhozea nâipa Saluma, tuikuang lampui chu a siam insaa, ar khûtira, a lampuihai siamin a kalna le an tûknahai irfûkin, khan rêng irhuan kôla, Sela dîl irkulna chu Davida omna khua ata chum theina leidâk dênin a siam insaa.

¹⁶Kha zoiin chu Azbuka, Betzur bial chimrip hruaitu nâipa Nehemia’n Davida thân irdîn le dîl khua le mi hrâthai in irdîn dênin a siam insaa.

¹⁷Kha zoiin chu Levi irchihaiin an siam insa nôka; Bania nâipa Rehuma haiin. Kha irzoiin chu Keila bial chimrip hruaitu Hasabia’n a bial irhmingin a siam insaa.

¹⁸Ama zoiin chu a urênghaiin an siam nôka; Keila bial chimrip hruaitu Henada nâipa Bevaia haiin;

¹⁹kha zoiin chu Mizpa hruaitu Josua nâipa Ezra’n hmun dang kul kôi irphutna râltukfam siana panna lam a siam insata.

²⁰Kha irzoiin Zabaia nâipa Baruka’n, sathnem irngaitakin hmun dang kul kôi irphutna ata ochai inlal Eliasiba in lampui dênin a siam insaa.

²¹Kha irzoiin Hakoza nâi, Uria nâipa Meremota’n hmun dang Eliasiba in lampui ata Eliasiba in hekna dênin a siama.

²²Khanchu a kôlvêla ochaihaiin an siam insa nôka.

²³Anni zoiin Benjamina le Hasuba’n an in irdîn an siama. Anni zoiin Anania nâi Maaseia nâipa Azaria’n a in kôl kha a siama.

²⁴Ama zoi le chu Henadaba nâipa Binuia’n hmun dang, Azaria in ata kul kôi irphutna a kil dênin a siam insaa.

²⁵Uzia nâipa Palala’n kulkôi irphutna irdîn le intângna in kôla rêng in irsâng ual ata irlôinahai a siam insatira. Kha zoia chu Parosa nâipa Pedaia’n a siam insaa.

²⁶Nethinim haiin nisua tianga tui mikot irdîn dênin in irsâng irlôina dênin an siam insa nôka.

²⁷Kha zoiin chu Tekoa kho mihaiin hmun dang, in irsâng lianpa fena le Ofel kul dênin an siam insa.

²⁸Sakor lampui chung tiang chu ochaihaiin mâni in irdînhai an siama.

²⁹Anni zoiin chu Imera nâipa Zadoka’n a in irdîn dênin a siam insaa. Kha zoiin nisua tianga mikot hrungtu Sekania nâipa Semaia’n a siam insaa.

³⁰Kha zoiin chu Selemia nâipa Hanania le Zalafa nâipa kirukna Hanuna haiin hmun dang an siama. Kha zoiin Berekia nâipa Mesulama khan a omna irdîn a siam insaa.

³¹Ama zoiin chu rângachak siamtu laia mi Malkija’n Hamipkad mikot irdîn Nethinim hai in le bepâr thohai in dênin a kil panna dênin a siam insa nôka.

³²Khan a kil fena le kêlbelra mikot kâr chu rângachak siamtu le bepâr thohaiin an siam insa a ni.