Read Hrangkhol ESTHERI 1 Bible Online

ESTHERI 1 - Hrangkhol bible

ESTHERI 1

¹Reng Ahasuera’n India ram rengata Sudan dênin ram bial, irzakhat sômhni sari chunga roirêltu a chang laia hi thil hi a hong itung a ni.

²Kha laia khan rêng chu Susa khopuia a oma.

³Reng a chang kum thumna khan a rama mi lianhai, a sinthotuhai Persia le Media sipai hruaituhai, bial tina ram optuhai le rêng nâihai le mi felhai ta hrangin hruai an thêa.

⁴Tha ruk sûng a ram roiinpui taka a’rchongzia, an lalzia le a neinungziahai an entira.

⁵Kha zoia chu a omna khopui Susa khuaa a fea, mi lian le mi chînhai ta hrangin rêng irhuan sûng tuallaia sûn sari hruai an thê nôka.

⁶Kha khan puan ngoi, puan duk, puan sendukhai an zâra, a zârna hruihrual chu sâilungvâr chopuia tangkarua suankuala khan puanirnêm an thunga. Rângachak le tangkaruaa siam toihmunhai chu siam irfûk an nia; a tualzôla khan sâilungvâr hai, lunghlu chi dang dang a sen, a êm, a dukinpôlhai an dâp saa.

⁷An zû semna khilât chu rângachak khilât a ni, an khilât kha chi dang dang a ni; rêngin uain chu tamtakin a pêkhaia.

⁸A in lam dân khom bituk ual om ma, tukhom an nuam ang taka in intirhai hrangin rêngin a siahlohai chu a ihril diamhai a ni.

⁹Rengnu Vasti khomin rêng Ahasuera in danga nupanghai ta bîk hrangin hruai an thea.

¹⁰Sûn sari nia chu, uain sikin rêng lungrîl a hong lôm tâka, khanchu, thainuzel sarihai Mehumana, Biztha, Harbona, Bigthana, Abagtha, Zethara, Karkasa ama siahlo bîkhai chu a koihaia.

¹¹Rengnu Vasti chu a rênglukhum khum pumin va hruai hrangin a tîrhaia. Rengnu chu nu hmêl satak a ni, a hmêl sa lam chu a mi lianhai le a mikhual murdihai inentir a itum a ni.

¹²Reng thupêk an inhrila rêngnu Vasti chu fe nuam ta maka. Reng chu a sân a ning an mur tâka.

¹³Renghaiin dân le an fepui hrang lam chungchânga dân inhriat mihai an irdon infel ngai. Khasikin, rêng Ahasuera khomin dân inhriat mi a koihaia.

¹⁴A ikoihai chu Karsena, Sethara, Admatha, Tarsisa, Maresa, Marsena, Memukana, Persia le Media rama milian, rêng kôla om ngaihai an ni.

¹⁵Rengin, “Kei, rêng Ahasuera’n ki siahlohai kha rêngnu Vasti ki van koitirhaia, ama khan ki thu kha lei pom maka. Hi ang chungchânga ei ram dân hi i ma ni, itina tho hrang ma ni?” tiin anni chu a’rdonhaia.

¹⁶Memukana’n rêng le mi lian danghai makunga, “Rengnu Vasti hin rêng vai hi a hnuaisia ni maka, a rama mi lianhai le ram pumpui sûnga pahai khom hi a ihnuaisia a ni.

¹⁷Rengnu thiltho dân hi nuhaiin an inhriat tika an pasalhai hnuaisia an ti, ‘Reng Ahasuera’n rêngnu Vasti a koi khomin fe nuam mah kha te;’ ti an ti.

¹⁸Misa tâk mân Persia le Media rama mi lian dôngmahai khomin rêngnu om dân an inhriatin an pasalhai thu zôm no nihaia, pahai chu an ninginmur a ti.

¹⁹Rengin sa a tiin chu rêngnu Vasti hin, ‘Reng hmêl hmu viat ta no ni,’ tiin rêng thupêk insua roh. Thûl nôk thei viat chi ni mah tiin Persia le Media dân bua irziak ni ri se. Rêngin a rêngnu nina hi ama nêka sa ual nei nôk ri se.

²⁰Kha thupêk kha ni ram irzat taka khan inpuang a ni zoia chu nuhaiin an pasalhai chu an inriang mo, an irchong mo mahrip tho an ti,” a tia.

²¹Reng le mi lianhaiin kha kha sa an iti tâk a nia, Memukana iti angin rêngin a tho tâka.

²²A ram bial tina, kha bial chong le horop hmangin thupêk a sem indarh tâka; “In sûngkua tina pa hi an laltak ni a ta, a thu chu zôm ving hrang a ni,” tiin.