Read Hrangkhol ESTHERI 3 Bible Online

ESTHERI 3 - Hrangkhol bible

ESTHERI 3

¹Kha zoia chu Agag mi Hamedata nâipa Hamana chu rêng Ahasuera’n ngîrhmun irsânga a siaa, hruaitu murdi chunga a sia ta.

²Reng thupêk angin rêng ina sintho murdi’n Hamana chu khûksadelin chubai mûka, inzâ hrang a ni. Mi tinin chubai an mûka, Mordekaia vaiin mûk mah.

³Reng ina sinthotuhaiin Mordekaia kuang, “Reng thupêk hi itina mo ni izôm nuam loi?,” an tia.

⁴Reng thupêk chu zôm ngêt hrangin an inhrila, khannisian, Mordekaia’n, “Juda ki nia, Hamana makunga kûn thei no ning,” a tia. Khanchu Mordekaia om dân chu ar ngai thei mo, irngai thei ma moh ti inhriatna hrangin Hamana chu an inhril tâka.

⁵Mordekaia chu Hamana makunga kûn nuam maka, chubai khom mûk nuam mah ti Hamana’n an hriatin chu a ning an mur ok tâka,

⁶khan, Mordekaia chu Juda mi a nih ti an hriatin Mordekaia vai ni loiin Persia rama Juda om murdi chu that ving a tum tâka.

⁷Ahasuera rêng a changna kum sômhleihnina tha masa tak, Nisan tha khan Hamana tho tum irchûtirna hrangin i nikhua le i tha mo a isatak hrang tih inhriatna hrangin tâ an sâna; kha tasân nî chu zoro’nchum tak angin an bêa.

⁸Hamana’n rêng kuang, “Ni ram sûnga hmun dang danga nam inkhat irzep an oma, bial tina an om indarh a ni. Nam dang dân ang ni loi, an binga dân bîk an neia, a ram dân khom zôm nuam mahai. Annihai hi an om maiin chu nangma hrangin sa no ni.

⁹Rengin, sa a ti’n chu thathai zit hrangin thupêk insua ri se. Khaang takin ni tho’n chu ni ram opna hrangin rêng suma tangkarua nuai thum le sîng minli her nang pe thei ki ti,” a tia.

¹⁰Thupêk inpuang namindetna kutsabi chu rêngin a lâka, Judahai râlpa Agag mi Hamedata nâipa Hamana chu a pêka.

¹¹“Mipuihai leh an sum chu ni kuta nang ki pêk ta, ni nuamlam ang takin tho ro,” a tia.

¹²Tha masa tak tarik sômkhat inthum nî khan rêng lekha irziaktuhai chu Hamana’n a koihaia, rêng thupêk inpuang chu a’rziaktira, a ram sûnga chong chi tinrêng le an horop hmangin ar hlettirhai zôia, rêng irthûla, ram optuhai le roirêltuhai kuang rêng kutsabi lekha a irbela thon suak hrangin ar siam tâka.

¹³Ram pumpui sûnga bial tina, rêng thupêk chu an thon suaka. Kha thupêk kha, kha nikhua ngêt, tha sômhleihni, Adar tha, tarik sômhleiminli nî hmang hrang a ni. Juda mi murdi, vânglai le tarhai, nupang nâipang that zit hrang le, neinunhai khom lapai pehai zit hranga thupêk a ni.

¹⁴Bial tinin kha thupêk kha tepsuak zit hrang a ni, a zoro taka, thupêk lam ang takin an tho theina hrangin.

¹⁵Susa khopuia khom thupêk kha rêngin an puangtira; bial dang danga khom lekha chu an intânpuia. Reng le Hamana chu zu an in mai lai takin Susa khuaa mi chu an char a dong zit tâka.