Read Hrangkhol ESTHERI 5 Bible Online

ESTHERI 5 - Hrangkhol bible

ESTHERI 5

¹Sûn thum bu a nghei zoiin, Estherin rêng puansil ar bela, rêng tentan irkul sûng tual, rêng toihmun omna mikota khan a fea. Mikot tiang hmâi songin rêng toihmuna khan rêng chu a lei toia.

²Estheri, pên tianga ngîr chu rêngin a va hmua, a lei inrena, a rângachak rêng khianghrol kha a lei irlek pea. Estheri’n a va pana, a khianghrol hmor chu a va tôna,

³“Rengnu Estheri, imo ni inuam nin hril ro, ki ram chimrip khom ni ri se nang pe ki ti,” a lei tia.

⁴Estheri’n a sâma, “Rengin sa ni tiin chu a vuan zân hin nang le Hamana hin ki hruaithe siam ni hong fapui hrangin nangni ki fial,” a tia.

⁵Rengin Hamana chu rêngnu hruaithe otpui hrangin, hong lat hrangin chong an thuana, rêng le Hamana chu rêngnu hruaithe otpui hrangin an fe tâka.

⁶Uain an in laiin rêngin, “Imo ni inuam, ki ram chimrip khom ni ri se, nang pe ki ti,” a ti nôka.

⁷Estheri’n a sâma,

⁸“Rengin ni ni lunginkhama, ki thil zong hi ni ni iphal hrang a niin chu nangtûk zâna hruaithe siam nôk ki ta, Hamana leh hong fa nôk unglân, ki thil zong chu nang hril ki ti,” a tia.

⁹Hamana chu hruaithe fâk zoia raifân le lôm takin a kîra, khannisian, Mordekaia chu rêng in irkul hualsûng mikot bula a hmua, lei inza loiin ngîr khom ngîr nuamloi a hmu’n chu Hamana chu a sân a ning an mur tâka.

¹⁰Khannisianlân, Hamana chu an sum zâma, a in tiang a kîr ta. A rualhai le a dôngma Zeresi chu a ina a koi bûmhaia.

¹¹A’rchongzia hai, nâipa a nei intamzia hai, rêngin ngîrhmun irsânga a siazia hai, rêngin mi lian danghai nêkin a’rngaisângzia hai a hril zita.

¹²“Rengnu khomin rêng le kei vai a hruaithe fa hrangin a ni ikoi a ni, nangtûk zâna khom a ni ifial nôk a ni.

¹³Aniachu, rêng in lûtna mikot bula Juda mi Mordekaia toi ki hmu sûng chu hi thilhai hin nin lômtir ual ma,” a tia.

¹⁴Khanchu a dôngma le a rualhaiin, “Mûk sômringa irsânga inkhâi thatna hrang siamin lân, nangtûk zîng, rêng makunga Mordekaia chu inkhâi that hrangin ngênin lân, raifân takin hruaithe chu otpui thei ni ti,” an tia. Hamana’n sa a ti tak taka, inkhâi thatna hrang chu a siam tâka.