Read Hrangkhol ESTHERI 6 Bible Online

ESTHERI 6 - Hrangkhol bible

ESTHERI 6

¹Kha nî zân ngêta khan rêng chu inmu man thei maka, thil milui irsinsiana lekhahai kha kêlsua hrangin thu a pêka, an itepsuak chu ar ngaia.

²Reng ina thainuzel Bigthana le Teresa hai inhni’n rêng that tuma an irsiam thu kha an tep suaka.

³Rengin, “Hi mi sika hin Mordekaia hi chôiindômin lômman kin pêk mo?” a tia. A siahlohaiin, “Ama hrangin ite tho pe ma ung,” an tia.

⁴Rengin, “Tu mo rêng in tuala om so?” a tia. Hamana’n Mordekaia irkhâi thatna hrang chopui a siam pea, inkhâi that hranga ngênna rêng inhual sûnga a ihong a ni.

⁵Reng siahlohaiin, “Nang hmu tumin Hamana a hong a ni,” an tia. Khan rêngin, “Hong lût ri se,” a tia.

⁶Hamana a hong lûtin chu, “Mi inkhat chôiindôm ki nuama, itin mo ki itho hrang?,” rêngin a lei tia. “Rengin kei ti no chu tu mo a ichôiindôm a nuam hrang,” tiin a milung an chonga.

⁷Reng kuanga khan, “Rengin chôiindôm a inuamhai chu,

⁸rêng innghâk ngai songkol la sianlân, a chuangna ngai sakor hong kai ri se, chôiindômna lukhum inkhumtir ni ri se.

⁹Ni mi lianhai laia a roiinpui tak koiin lân, rêng songkolhai chu innghâktir sianlân, sakor chunga inchuangtir sianlân, khopuia chaipui ri se. An fepui laiin, rêngin mi a ichôiindôm ni a ti, ti zêl ri se,” a tia.

¹⁰Rengin Hamana kuang, “Irhnotin lân, rêng songkolhai le sakorhai chu lan lân, Juda mi Mordekaia hi ni iti lam takin chôiindôm roh. Ni iti murdi ang khan tho ro, rêng tual lûtna mikot bula son a om so,” a tia.

¹¹Khanchu Hamana’n rêng songkolhai chu a lâka, Mordekaia chu an nghâktira; Mordekaia chu sakora khan an chuangtira; khopui irhîlin Hamana’n sakor chu a kaia, an fe laiin mipui inhriata, “Rengin chôiindôm ni a ti,” tiin an insam thiaia.

¹²Mordekaia chu rêng tual lûtna bula khan a va fe nôka; Hamana rêk chu inzaka a hmâi hîpin ina a honga.

¹³A dôngma leh a rualhai chu a chunga thil tung murdi chu a hril zita. A dôngma le a rual vâr tak takhaiin, “Mordekaia hi Juda mi a nia, ngam no chi ni, ni ihrât loi ngêt hrang a ni hi te,” an tia.

¹⁴Khaang thu an hril laiin Hamana chu rêng ina Estheri hruaithe fâk hranga hruai zôi zel hrangin thainuzelhai an honga.