Read Hrangkhol ESTHERI 7 Bible Online

ESTHERI 7 - Hrangkhol bible

ESTHERI 7

¹Reng le Hamana chu Estheri hruaithe siam fâk hrangin an fea.

²Uain an in lai takin rêngin, “Rengnu Estheri, imo ni nuam nin hril ro, ki ram chimrip khom ni ri se, nin hrilin lân, nang pe ki ti,” a tia.

³Rengnu Estheri’n a sâma, “O Rengpa, rêngin lung a nin khama sa a tiin chu ki hringna le ki mihai hringna khom inzôk hrangin nang ki ngên.

⁴Kei le ki in sûng mihai chu that irhmang zit hranga rêl kin ni tâka. Nupang pasal suaka ni zuar hrang ni sianlân chu ite ti no ning, khannisianlân atûn hin kin râlhaiin ni that irhmang zit hrang an ni,” a tia.

⁵Reng Ahasuera’n Estheri kuang, “Khaanga tho ngam kha tu ma ni, khôn mo a iom? a tia.

⁶Estheri’n, ‘Kin râl leh nir doipuitu chu, hi mi sualpa Hamana hi a ni hi te,’ a tia. Hamana chu rêng le rêngnu kôla khan chi le inthingin a om tâka.

⁷Reng chu a ninginmurin uain a in laiin a thoia, rêng irhuana khan a zu fea. Hamana chu rêngin hrem hrang a ni tih a lei inhriata, khasikin in sûnga khan a oma, rêngnu kuang a hringna inzôk hrangin a ngên a ni.

⁸Reng chu irhuan ata hongin uain an inna tentana khan a hong lût nôka, Estheri toinaa Hamana chu inbok hrupa lei om a hmua. Rengin, ‘Ki ina, ki mithmu ngeia khom rêngnu hi siatpui a itum a ni moh?’ a tia. Reng a hong chong suakin chu Hamana hmâi an tuama.

⁹Reng kuanga om ngaitu thainuzel inkhat Harbona’n, ‘Reng ta hranga sin sa tho ngai Mordekaia inkhâi thatna hrang mûk sômringaa irsâng Hamana’n a in kôla chopui a phun kêng,’ a tia.

¹⁰Khanchu, rêngin, ‘Khataka khan inkhâi that roi,’ a tia. Mordekaia inkhâi thatna hranga a isiama khan, Hamana chu an inkhâi that tâka, rêng ningmur chu a hong boi tâka.