Read Hrangkhol ESTHERI 8 Bible Online

ESTHERI 8 - Hrangkhol bible

ESTHERI 8

¹Kha ni sûna khan Judahai râl Hamana in le loi chu rêng Ahasuera’n rêngnu Estheri chu a pêka. Estheri’n rêng kuanga Mordekaia leh in sûngkhat an nih ti thuhai a hrila. Kha rengata chu rêng kôla a nuam nuamin Mordekaia chu a fe thei tâk a ni.

²Reng kutsabi Hamana ibun kha rêngin a lâka, Mordekaia chu an buntira. Estheri’n Hamana in le loi chu Mordekaia kuta a sia tâka.

³Estheri’n rêng kuang hril hrang a la neia. A ke kôla inbokhrupin a oma, Hamana tho tum, Judahai that irhmang a itum chu sûtpai hrangin mitrithi suak pumin a ngêna.

⁴Rengin a rângachak khianghrol chu Estheri tiang an lek pea; khanchu, Estheri chu a thoia, rêng makunga khan a ngîr tâka.

⁵“Rengin sa a tia, a ni lunginkham tak taka niin chu, rêng ram bial tina Juda omhai that hranga Agag mi Hamadata nâipa Hamana’n lekha a ithon kha sûtpai nôkna irziak ni sianlân,

⁶Ki mihai chunga hianga thil saloi tung hrang hi itin mo ki ituang thei hrang? ki mihai leh ki urênghai an that zit hrang hi ki ien ngam hrang ma ni?” a tia.

⁷Rengin rêngnu Estheri le Juda mi Mordekaia kuang, “Hamana chu Judahai that zit a tum sikin kin khâi thata, a in le loi khom rêngnu Estheri ki pêk ta.

⁸Reng thupêka irziak, a kutsabi irsinsiana nam tâk chu sût nôk ni thei ta ngai ma. Nin thei lam angin, Juda mihai kuang ki’rhmingin lekha irziak unglân, kutsabi irsinsiana nam roi,” a tia.

⁹Tha thuma Sivan tha tarik sûn sômhni inthum ni khan rêng lekha irziaktuhai chu Mordekaia’n a koihaia, Judahai chungchânga a nuam ang lam takin a’rziaktira. India ram ata Sudan ram dênin, rêng ram bial irzakhat sômhni sari, rêng irthûla ram optuhai le bial hruaitu chu an mâni chong le an horopa irziakin a thona.

¹⁰Reng Ahasuera irhmingin lekha chu Mordekaia’n a’rziaka, rêng kutsabiin irsinsiana an nama. Sakor intân hrât zât, rêngin thupêk thon darna hranga a ivâi chunga chuanghai kuta an pêka, an intânpui tâka.

¹¹Reng lekhaa khan; “Judahai an omna khua tina omhai chu irbukkhôma an mâni le an dôngma an nâihai lei doihai chu lei doi nôkhai hrangin rêngin a phala. An omna bial tina anni lei doituhai chu lei doiin that thei an ta, an irchihai in le loi khom râllâk sum angin nei thei an ti.

¹²Tha sôm tha hnina Adar tha, tarik sômhleithum nî khan, rêng Ahasuera ram sûnga bial murdia, Judahai that hrang an ti nia, hi thupêk thar hi Judahaiin hmang thei an ti.

¹³Hi thu hi dân deta hmang hrang le Judahai khom an râlhai chunga phuba la hranga an irsiam theina hrangin bial tina mihai laia inpuang hrang a ni.” tiin an irziaka.

¹⁴Reng thupêkin sakor chunga chuang mihai chu rêng sakor hrât chunga an chuanga, an intân zut zuta. Kha thupêk kha Susa khopuia khom an inpuanga.

¹⁵Mordekaia chu puan irnêm senduk songkol an nghâka, rêng puansil a duminpôl le a ngoi chu a sila, chôiirsângna rângachak lukhum a khuma; rêng in ata chu a suaka, Susa khopuia lam liana mi tin lômin an lei khêk sup supa.

¹⁶Judahai chu hoina, lômna le raifânna le chôiindômna an chang tâka.

¹⁷Khanchu, ram bial tin le kho tina, rêng thupêk a tungna hmun tina, Judahaiin lômna le raifânna an neia, sûn irngamna le hruaithena hai khom an nei ta. Judahai kha an chi tâk sikin, kha rama mi tamtak chu Judaa an irlet tâk a ni.