Read Hrangkhol ESTHERI 9 Bible Online

ESTHERI 9 - Hrangkhol bible

ESTHERI 9

¹Reng thupêk hmang hrang sûn, Adar tha tarik sômkhat inthum nî chu a hong tung tâka. Kha ni sûn kha an râlhaiin Judahai that irhmang zit an tum ni kha a nia; khannisianlân, Judahaiin an inhnêhai tâka.

²Reng Ahasuera ram pumpui sûnga Judahai chu an khopuihaia khan an irbukkhôma, anni hong doi tumtu chu doi nôk hrangin an lei irsiam diama. Tu nam khomin Judahai chu an chia, doi ngam mahai.

³Bial optu rêng irthûla ram optuhai le sorkâr sinthotuhaiin Mordekaia an chi sikin Judahai chu an changpuihai tâka.

⁴Ram pumpuia Mordekaia chu ircham a hong nei ta, ti mi tinin an inhriat tâka, a hong inlal ual ual tâk a ni.

⁵Khasikin Judahaiin an râlhai chu an nuam nuamin an longhaia, chemin an doia, an râl murdi chu an that zit tâka.

⁶Susa khopuia khom Judahaiin mi irzaringa vêl an thata.

⁷Hi mi Parsandata, Dalefona, Aspata,

⁸Porata, Adalia, Aridaia,

⁹Parmasta, Arisaia, Aridaia, Vaizata hai

¹⁰Juda râl Hamedata nâipa Hamara nâi sômhai khom hi Judahaiin an thata; aniachu tûte ina râllâk sum la mahai.

¹¹Kha nî sûn khan rêng khopui Susa khuaa mi an ithat zât chu rêng an inhrila.

¹²Rengin rêngnu Estheri kuang, “Reng khopui Susa-ah khom Judahaiin mi irzaringa le Hamana nâipasal sôm an that tâk. Reng ram sûng bial danga itin tak mo tho ta nihai na! Ni inuam dang a la om mo? Nin hril ro, nang tho pe zit ki ti,” a tia.

¹³Estheri’n, “Rengin sa a tiin chu, a vuana an itho angin Susa khuaa Judahaiin nangtûka khom tho nôkhai sian, Hamana nâipasal sômhai chu thinga inkhâi that ni ri sehai,” a tia.

¹⁴Khaanga tho hrangin rêngin thupêk an suaka, Susa khuaa an puanga. Hamana nâipasal sômhai khom chu thinga an inkhâia.

¹⁵Susa khuaa Juda omhai chu Adar tha tarik sômkhat minli nî chu an irbukkhôm nôka, Susa khuaa mi irzathum an that nôka, aniachu, tûte ina râllâk sum la mahai.

¹⁶Ram sûng bial tina Judahai khom chu an mâni irhrung hrangin an irbukkhôma. an râlhai laia hruaitu mi sîngsari le sângringa an thata; aniachu, tûte ina râllâk sum la mahai.

¹⁷Khaangin Adar tha tarik sômkhat inthum nî khan an thoa. Zîng nôk tarik sômkhat minli nî khan chu tukhom that ta mahai, raifânna kût sûn an hmang tâk a ni.

¹⁸Susa khuaa Judahaiin chu tarik sômkhat ringa nî khan omnî an neia, tarik sômkhat inthum le sômkhat minli nî chu an râlhai an thata, tarik sômkhat ringa nî chu an monga, hruaithe ni le raifân nia an siama.

¹⁹Khasika khan kho sûnga om Judahai chu Adar tha, tarik sômkhat minli nî hi omnî an neia, raifân takin hruai an inthea, thilpêk an irpêk irhlôm ngai.

²⁰Mordekaia’n hi thurchihai hi lekhabua a’rziak zita, Persia ram sûnga Juda om murdi, a hla le anaia omhai khom lekha a thona.

²¹Adar tha tarik sômkhat minli nî le sômkhat ringa nî, kum tin om nî sera; kût nei hrang a ni.

²²Hi sûnhaia hin Judahaiin an râlhai ata an zôka, beidong le chardong tha chu raifânna le lômna tha inchang nî a ni. Hruaihai an inthea, raifân taka hmangin fâk nêk irpêk irhlôm hrangin a hrila; mi inriang khom fâk nêk pêk hrangin a hril saa.

²³Judahaiin Mordekaia thupêk chu an zôma, kum tin kûtna an nei tâk a ni.

²⁴Agag mi Hamadata nâipa Hamana, Judahai râlpa khan Judahai that irhmangna hrangin i sûn mo a isa hrang ti inhriatna hrangin tasânna a neia.

²⁵Khannisianlân, Estheri chu rêng kuang a fea, rêngin thupêk an sua tâka. Kha thupêk sikin Judahai tuang hranga a isiam chu Hamana le a nâipasalhaiin an tuang tâka, thinga an inkhâi thathai tâk a ni.

²⁶An chunga thil hong tunghai sik le Mordekaia lekha sikin kha kût kha, Purim “tasân” kût an phua tâk a ni.

²⁷Judahai chu an irchihai dênin a zoro taka, kum tin Mordekaia ihril angin hi sûn hni hi omnî an inei hrang a ni tih dân an siam tâka.

²⁸Juda sûngkua tinin, sûn matona irchi la hong om zêlhaiin bial tina mi le khua tina mi’n inhriat maina hrangin hi Purim kût hmang ngai hrang a nih ti thu an inkunga.

²⁹Rengnu Estheri, Abihaila nâinu’n, Purim kût chungchânga Mordekaia lekha chu a namindet a nih ti thu chu, Mordekaia lekhaa khan a thon suak zêla.

³⁰Lekha chu Juda mi murdi ta hrangin thon a ni; Persia ram bial irzakhat sômhni sari kuanga ar kopin an pêk saa; Judahai chu irtharngam tak le hoi taka om hrangin lekha thonhai chu an thon tâka.

³¹Judahai chu, an irchihai dênin a zoro taka bu nghei le lusûn tho dân an nei angin Purim nî hi hmang ngai hrangin chong a pêkhai saa. Kha kha Mordekaia le rêngnu Estheri chong a ni.

³²Rengnu Estherin Purim kût chungchâng an namindetna thu chu lekhabua irziak a ni.