Read Hrangkhol FESUAKNA 10 Bible Online

FESUAKNA 10 - Hrangkhol bible

FESUAKNA 10

¹RENGPA’N Mosia kuang, “Faroa kuang va lûtin lân, hi ki isinsiahai hi anni laia ngêt kin entir theihaina hrangin a siahlohai le ama lungrîl khom ki inngartir pehai tâk a ni,

²anni laia thil irkhêl ki ithohai le, Aigupta mihai chunga i angin mo an chunga sin ki itho iti hi a nâipa le a tupahai laia an inhriat theina hrangin le; RENGPA ki ni, ti nin hriat theina hrangin,” a tia.

³Khanchu Mosia le Arona kha Faroa kuang an va lûta, a kuang khan, “Hebrai Pathian RENGPA’N hiang hin a ti, ki makunga nangma ni binga irhnuai nuam loiin i dôr mo ni iom hrang? ki sin an tho theina hrangin ki mihai infetirhai roh.

⁴Ki mihai nin fetirhai no’n chu, irngai ro, zînga ni ram sûnga hin khâi hong chôihai ki ta;

⁵hnuai chung hmun tin hi a dâpin hor dâp an ta, irnêng hmu thei loi rakin om a ti; irial la insiat zoi loi, ni la idonghai kha fapai ving an ta; ni ta hranga loia thing mông tharhai khom fapai ving an ti.

⁶Nangma le ni siahlohai omna inhai khom Aigupta mi in tinhai khom sip ving an ti, ni pahai le nir chi suanpâr khomin, hi hnuai chunga an oma irthokin a vuan sûn tena hin an la ihmu ngai loi ni a ti,” a tia. Khanchu a’rheia, Faroa a mâksan ta.

⁷Faroa siahlohaiin, a kuang khan, “Hi mipa hi i dôr ten mo ei ta hranga chakal ni sak a ini tâk? An Pathian RENGPA sin an tho pe theina hrangin a mihai chu infetir pehai ta ro ba; Aigupta ram hi a insiat zoi hrang a ni, ti hi ni la inhriat mai loi ma ni?” an tia.

⁸Khanchu Mosia le Arona chu Faroa kuang an hong hruai nôka, ama’n an kuang khan, “Fe unglân nin Pathian RENGPA sin va tho ta roi, khannisian tu tuhai mo a fe hrang chu nin ini hrang?” a tia.

⁹Mosia’n “RENGPA makunga hruaiinthe hrang ki nia, kin nâipang le kin tarhai, kin nâipasal le nupanghai leh fe kin ta, kin sehrât le kin kêlbelra pâlhai leh fe kin ti,” a tia.

¹⁰Khanchu an kuanga khan, “Nangni le nin nâihai, nangni infetir ki ta, RENGPA chu nin kuanga om ri se; khan khom ni sian en roi ba, thil saloi nin matona a la om maia.

¹¹Khaang khan chu ni no ri se, mi ulian tâkhai kai fe unglân, RENGPA sin va tho roi, kha kha nin inuam tak a nia,” a tia. Khanchu Faroa kuang ata inhnotsuakin an om tâka.

¹²Khanchu RENGPA’N Mosia kuanga, “Khâihai tâk hrangin Aigupta ram chunga ni bân phar ro: Aigupta ram pumpuia an hong om theina hrangin le a rama hnâ hring tinrêng irial insiat zoi loi an fâk inhek theina hrangin,” a tia.

¹³Khanchu Mosia’n Aigupta ram chunga khan a khianghrol an lektira, khanchu RENGPA’N sûn khat le zân khovârin nisua tianga phâivua an hrângtira; zîng khua a hong vârin chu sak phâivua’n khâi a hong chôihaia.

¹⁴Khanchu khâi tamtak Aigupta ram sûnga khan an oma; Aigupta ram an bit zoi ta, an tam lam chu irkhêl tak a ni. Matona khan hiang reng hin khâi lei tam ngai mahaia, anni zoia hin khom om khom om ta ngai no ni.

¹⁵Hnuai chung chu an dâp vinga, a ram an thimtir tâka; rama sûlhna hring murdi le, thing rahai, irial idêng that mihliahai an fâka; Aigupta ram pumpui chu loia chîmu hnâ le thilhring om viat thei ta maka.

¹⁶Faroa’n Mosia le Arona inrang takin a koihaia, “Nangni le nin Pathian RENGPA chunga thil ki tho insual ok ta.

¹⁷Khasikin atûn hin nangni ki ngên; ki sualna hi voikhat vai ni ngaidam nôkin lân, hi thina hi keima ata a ni lâkpai pe theina hrangin RENGPA kuang ni zong pe roi,” a tia.

¹⁸Faroa kuang ata an fesuaka, RENGPA kha an nghi tâka.

¹⁹Khanchu RENGPA khan, khâi murdihai kha Tuipui Sena hôl lûtpaihai hrangin nitâk tiang ata phâivopui hrât tak an thotira, Aigupta ram pumpuia khan khâi inkhat lua om ta mahaia.

²⁰Khannisian, RENGPA’N Faroa lungrîl an ngartira, Israel irchihai chu infetirhai ual mah.

²¹RENGPA’N Mosia kuang khan, “Aigupta ram pumpuia inthimin, irmai raka oma inthimin a hong om theina hrangin ni bân phar ro,” a tia.

²²Mosia’n irvân tiang a bân a phara; khanchu sûn thum sûng chu Aigupta ram pumpui chu inthim irsa khakin a om tâka.

²³Sûn thum sûng chu mi tukhom an om hmun ata suak thei loiin, a’rhmu khom irhmu thei loiin an oma, khan khom Israel irchihaiin chu an omna khan a vâr pehai maia.

²⁴Khanchu Faroa’n, Mosia a koia, “Fe unglân, RENGPA sin va tho roi; nin sehrât le kêlbelrahai chu omhai sianlân, nin nâihai khom fe no ri sehai,” a tia.

²⁵Mosia’n, “Kin Pathian RENGPA kuang khan, kin irbôl theina hrangin, pum hâlirvôm thilinhlanhai le irbôlna hranghai kin kuta ni ni ipêk hrang a ni;

²⁶Kin sa rualhai khom kin ituanghai hrang a ni, sa inkhat lua khom masan ni thei no ni; kin Pathian RENGPA sin kin tho theina hrangin kin ihruaihai hrang a ni; a hmun kin tung mâka chu, i hmangin mo RENGPA sin kin itho hrang ti kin inhriat no sikin,” a tia.

²⁷Khannisian Faroa lungrîl chu RENGPA’N an ngartira, infetirhai maka.

²⁸Faroa’n a kuanga khan, “Ki kuang ata rot ta roi, ki chunga irdîn ro; ki hmêl ni hong hmu kochok ta no ro, ki hmêl ni hmu nôk nî chu thi hrang ni ni ta,” a tia.

²⁹Mosia’n, “Ni ti indik, ni hmêl hmu nuam ta ma ung,” a tia.