Read Hrangkhol FESUAKNA 11 Bible Online

FESUAKNA 11 - Hrangkhol bible

FESUAKNA 11

¹RENGPA’N Mosia kuang khan, “Faroa le Aigupta ram chunga hri inkhat la hong intungtir nôk ki ti; kha zoiin chu hitak ata hi nangni infetir ta a ti; nangni an fetir tena chu, nam tôlin nangni nam tôlpai a ti.

²Mipuihai inhriat hrangin hrilin lân, pasal le nupang tinhaiin rângachak le sumru, irvônahai kha an tualbômhai ata pûk ri sehai,” a tia.

³RENGPA’N Aigupta mihai mit hmua, Israel mihai chu inhroina an neitirhaia, Faroa siahlohai mit hmua, Aigupta ram sûnga mi liantak a nia.

⁴Khan, Mosia’n “Hiang hin RENGPA’N a ti; zânrîl laia Aigupta mihai irfang suak ki ta;

⁵Aigupta rama nâilutîr murdi, Faroa nâilutîr a rêngtoihmuna toi lai rengata, bu sukna hmuna sintho, suaknu nâilutîr tak le a sa pâl laia a tê maton takhai leh khan thi ving an ta.

⁶Khanchu Aigupta ram pumpuia khan chap irhâi irkhêl tak om a ta, khaang kha la om ngai maka, om khom om ta ngai no ni, a ti.

⁷Khannisian Israel le Aigupta mihai kâra hin RENGPA’N i ang dôra danglamna mo a isia ti an inhriat theina hrangin Israel irchihai chu sa le mihriam chunga ui inkhat lua khomin inmûk no ni.

⁸Khan, hi ni siahlohai murdihai hi ki kuang hong an ta, ki makunga khûksadelin, ‘Nang zuitu hranghai murdi leh khan, suak ta ro,’ ni ti an ta. Khanchu kha zoi le khan suakpuihai ta ki ti,” a tia. Khanchu ningmur takin Faroa kha a suaksan tâka.

⁹Khanchu RENGPA’N Mosia kuang khan, “Aigupta rama hin ki thilirkhêlhai a pung theina hrangin, Faroa’n nin thu a irngai nuam loi hrang a ni,” a tia.

¹⁰Khanchu Mosia le Arona’n Faroa makunga khan, thilirkhêlhai an tho tâka; khannisian RENGPA khan Faroa lungrîl chu an ngartira, Israel irchihai chu kha rama irthokin infetirhai mah.