Read Hrangkhol FESUAKNA 12 Bible Online

FESUAKNA 12 - Hrangkhol bible

FESUAKNA 12

¹Aigupta rama khan RENGPA’N Mosia le Arona-hai kha a ti pehaia,

²“Hi tha hi nin ta hrangin tha maton tak, nin kum khat sûnga tha matontak ni a ti.

³Israel nam pumpui inhrilhai unglân, hi tha sûn sôm ni sûn tak hin mi tin an nam omdân dungzuiin kêlbelrate inkhat lahai sianlân, in sûngkua khatin kêlbelrate inkhat la chit ri sehai.

⁴Khannisian in sûng khat mi fâk a ruk pehai noa, a tôm hraiin chu, an tualbôma mi anaitak le a fâk hrang mihriam an tam le tôm enin irsem ri sehai.

⁵An indit inthangna khom kêlbelrate a ni no le kêl nei thei nin ta, khannisian a chal kum khata mi, demnaboi a ini hrang a ni.

⁶Kha tha sûng ngêtin sûn sôm hleiminli nî sûn dênin enkol nin ta, khanchu Israel nam pumpuiin misa kôl a tâk tena an ithat ngêt hrang a ni.

⁷A thisen kha la an ta, an hme fâkna hrangin mikot chunghaia an inâl sa hrang a ni.

⁸Kha zâna khan hme chu meia rôin, chol polloi bai le hloihna khâ leh an ifâk hrang a ni.

⁹A sel a hroia tuia suangin fa no unglân, a lu a ke le a sûngkuahai khom meia rô ni ri se.

¹⁰Zînga fâk hrangin ite hôi ni no ri se; nin ifâk ban la omhai chu nin ihâlirvôm ngêt hrang a ni.

¹¹Hiang hin nin fâk hrang lam khom a ni; nin puan nin konga khit pumin, nin kekok khom nin kea bun pumin, le nin kuta khianghrol chôi pumin irhnot pasotin nin ifâk hrang a ni. Kha kha Ferkân kût keima RENGPA nin ni imahripna a ni.

¹²Kha zân ngêta khan Aigupta rama fe ki ta, sa le mihriam an rêngin nâilutîr kai chu that ving ki ta; khante Aigupta rama pathianhai chunga roirêlna intung ki ti. RENGPA’N ki iti a ni.

¹³Thisen chu nin ta hrangin nin omna ina irsinsiana ni a ta; khanchu thisen ki hmu’n chu nangni irkân ki ta, khanchu Aigupta mihai dûk ki thohai tena chu, nangni irhmangtir hrangin hripui ite lêng ta no ni.

¹⁴Hi nî hi RENGPA’N sintho nangni inhriattirtu sakhua kût nin ihmang ngêt hrang a ni.

¹⁵RENGPA’N, “Sûn sari sûng chu chol pol loi kût bai nin ifâk hrang a ni; matona nin in sûnga chol kha chu nin ipai ving hrang a ni. Mi tukhom maton tak ni sûn ata sûn sari ni tena bai fâkhai chu, Israel mi iti thei ni no nihai.

¹⁶Sûn maton taka inkhômpui irthiang nei nin ta, sûn sari sûna khom nei nin ti. Mi tinin an innang fâk zât irfûktir ti no chu ite sin dang nin itho hrang ni ma; fâk zât irfûktir vai tho hrang ni a ti.

¹⁷Chol pol loi kût nin ihmang a ni, hi nî sûn khera hin nin mihai chu Aigupta ram ata ki hruai suakhaia; khasikin nin irchihaiin kumtuanga thudet a om mai theina hrangin hi sûn hi nin iser hrang a ni.

¹⁸A tha khatna, kha tha a sûn sôm hleiminli nî kha, tha sûn sôminhni sûn khat khohloi dênin

¹⁹sûn sari sûng chu nin in sûnga chol a iom hrang ni ma, tukhom chol kop bai fâkhai kai chu, nin laia om mani, nin laia suak mani, Israel mipuihai laia tep ni thei no ni.

²⁰Chol kop rêng rêng chu nin ifâk thei hrang ni ma, nin omna hmun tina chol kop loi bai nin ifâk hrang a ni,” tiin.

²¹Mosia’n Israel hruaituhai a koi bûmhaia, an kuanga khan, “Nin in sûngkua nam dân dungzuiin belratehai mani, kêlte mani, zen unglân, ferkân kût sa hrangin that roi.

²²Husop ôn la unglân, tâbora thisen leh inchie roi, mikot luah le inkhâr banga tâbora thisen om leh khan nâl roi; mi tukhom zîng khua a vâr mâka chu nin in omna pên tiang nin isuak hrang ni mah.

²³RENGPA kha Aigupta mihai that hrangin a hong itung ngêt hrang a nia; khanchu mikot chung le inkhâr sîr hnia thisen kop kha a hmu’n chu RENGPA khan mikot kha irkân a ta, in sûnga khan nangni that hrangin vântirtôn mi that ngai kha hong lût phal no ni.

²⁴Hiang hin nir chihai hrangin kumtuanga thu’nkung a om mai theina hrangin nin hong itho ngai hrang a ni.

²⁵RENGPA’N nangni pe hranga ram nin lûtin chu hi tho dânhai hi nin izôm hrang a ni.

²⁶Khante, nin nâihaiin, ‘Hi sinthôna omzia hi i tihna mo a ini ta hrang?’ an hong ti’n chu,

²⁷Nangni’n, ‘Hi hi RENGPA Ferkân irbôlna a ni, ama’n Aigupta mihai a that lai khan keini inhai chu a hong irkânpaia, Aigupta rama Israel irchihai chu a hong irkânhai a ni,’ la ti roi,” a tia. Mipuihai chu an lu an kûna chubai an mûk tâka.

²⁸Israel irchihai chu an fea, RENGPA’N Mosia le Arona thu a ipêk ang khan an thoa.

²⁹RENGPA’N zân laia Aigupta rama nâilutîr murdi rêngtoihmuna toi Faroa nâilutîr taka irthokin intângna in sûnga nâilutîr tak dênin a thathai vinga, sa a suak maton takhai khom.

³⁰Kha zân khan Faroa le a milianhai le Aigupta mi murdi chu an thoia; Aigupta rama khan chapa inrûm a oma; mithi om loina in reng om ta maka.

³¹Reng khan kha ni zân ngêta khan, Mosia le Arona a koihaia, an kuang khan, “Thoi unglân, ki mihai mahai unglân, Israelhai leh hin fe unglân, ni ingên lam angin RENGPA sin va tho ta roi.

³²Nin iti angin nin belrahai le nin kêl le sehrâthai khom fepuihai unglân, keima hrang khom ni chongchai pe sa roi,” a tia.

³³Aigupta mihai khan kha ram ata suak lat hrangin Israel mihai kha a tuarpolhaia; “Nin suak lat no’n chu kin ithi zoi hrang kêng,” an tia.

³⁴Khanchu mipuihai khan bai an inhmet kha chol kop loi kha an lâka, an inhmetna khêng kha puan leh an tuama, an dâra an bânga.

³⁵Israelhai khan Mosia iti angin an thoa; Aigupta mihai kha sumru irvôna rângachak irvônahai le puanhai an ngêna.

³⁶RENGPA khan mihai kha Aigupta mihai lungkham an ihlo a ni, khaang khan an inghi kai chu an pêka; khaang khan Aigupta mihai an hong irbuk a ni.

³⁷Israelhai kha Ramases-ah irthokin kein an suaka, Sukoth hmun dênin an fea, nâipang le nupang tep loiin pasal ulian ringot khom nuai ruk an ni.

³⁸Anni le mi dang tamtak an irthoka, belrahai, kêlhai le sahai khom tamtak an hruaihai sa.

³⁹Aigupta ram ata bai inhmet sai chol koploi an hong ichôi kha an inzêia, Aigupta ram ata inhnotsuak an ni sika khan an fâk hrang irfûktir zoro nei mahaia, hi sika hin bai inhmet sai chol an ipol loi a ni.

⁴⁰Khaang khan Israelhaiin Aigupta rama an om sûngin kum 430 a ni.

⁴¹Kum 430 a hekin chu, kha nî taka khan RENGPA mi murdihaiin Aigupta an imâk a ni.

⁴²Kha zâna khan Aigupta ram ata anni a hruaisuakhai sikin RENGPA ta hrangin zân an iser hrang a ni; Israelhaiin an irchi suanpâr dênin kha zân kha RENGPA ta hrangin an iser mai hrang a ni.

⁴³RENGPA’N Mosia le Arona kuang khan, “Hiang hin Ferkân kût hmang hrang dân chu a ni: nam danghaiin chu an ifâk hrang ni mah.

⁴⁴Khannisian siahlo sum le irchôk sai tâk chu dân anga a sertan zoiin chu fa thei ni a ti.

⁴⁵Nam dang le suaka nin ihmanghaiin chu an ifâk hrang ni mah.

⁴⁶In inkhata nin ifâk hrang a nia; hme khom pên tiang nin ichôi hrang ni mah. A ru khom nin inkhiak viat hrang ni mah.

⁴⁷Israelhai murdi’n an ihmang ngêt hrang a ni.

⁴⁸Nam dang nin kuanga om, khan RENGPA’N Ferkân a hmang nuamin chu, a in sûngkua pasal om murdi’n sertanhai sianlân, khanchu a ram izir angin kop sa thei ni a ti; khannisianlân sertan loi mi’n chu a ifâk hrang ni mah.

⁴⁹Khakhêla suak le nam dang nin laia omhai hrangin hi dân hin a ihuaphai ving a ni,” a tia.

⁵⁰Israel murdihaiin khaang khan an thoa, RENGPA’N Mosia le Arona thu a ipêk ang lam takin an tho tâka.

⁵¹Hiang hin a nia, kha nî sûn taka khan RENGPA’N Israel irchihai kha Aigupta ram ata mipuihai chu a ihruaisuakhai tâk a ni.