Read Hrangkhol FESUAKNA 14 Bible Online

FESUAKNA 14 - Hrangkhol bible

FESUAKNA 14

¹RENGPA khan Mosia kha hiang hin a ti pea,

²“Israelhai laia kîr nôka Migdol le Tuipui Sen kâr, Pi-hahiroth kôla Baal-Zefon maton tianga riak hrangin hril roh.

³Khan kêng Faroa’n Israelhai chungchâng thua, ram kâra lungzîngin an invâia, ramchâra an in-ôk a ni ta hi te, ti a ti.

⁴Keima’n Faroa lungrîl inngartir pe ki ta, khanchu irzûlhai a ta; keima’n Faroa le a sipaihaiin ni chôiirsâng an ti; khanchu Aigupta mihaiin keima hi RENGPA chu ki nih ti inhre ta an ti,” tiin.

⁵Aigupta rêng kha Israel mipuihai rot thurchi hril hrang a ni’n chu, Faroa le a milianhai khan an lungrîl a’rthûl nôka, “Hianga Israel mihaiin ei sin an tho lai taka ei insuahai hi te, itho sika hianga ei itho mo a ini tâk,” an tia.

⁶Khanchu an sakor tâlihai an sinsiama, a mihai hruai sain;

⁷Sakor tâli irzaruk le Aigupta rama sakor tâli om murdi a rêngin hruaituhai hruai sain an oma.

⁸RENGPA khan Aigupta rama rêng Faroa lungrîl an ngartir pea, Israelhai ngam taka suakhai kha an irzûlhaia.

⁹Aigupta mihai khan sakor murdi le Faroa sakor tâlihai le sakor chunga chuang mihai le a sipaihai leh khan an irzûla. Khante, Pi-hahiroth hmun kôl Baal-Zefon kôl tuipui kôla an riak laiin an va phâkhaia.

¹⁰Faroa’n a va nâihaiin chu, Israelhai khan an lei thîra, Aigupta mihai khan, an ni tiang an pana; kha zel khan an chihai tâka. Israelhai khan Pathian an insam tâka.

¹¹Mosia kuang, “Aigupta rama khan thân a iom loi sika ma ni? hi ramchâra thi hranga ni ni hong ihruai suak hi?

¹²Aigupta rama khom khan, Aigupta mihai sinthoin lei ompai hi ri ung, nang kin iti mo ni ma? Ramchâra thi nêkin chu Aigupta mihai sintho khom hi kin ta hrangin chu sa ual a ti,” an tia.

¹³Mosia khan mipuihai kuang khan, “Chi no unglân, lungthiriamin om roi, RENGPA saninhringna a vuan hin nangni a itho pe hrang hi a thîr vai tho roi, a vuana Aigupta mi nin ihmuhai hi, kumtuangin hmuhai nôk ta no chin ni.

¹⁴RENGPA’N nangni doi pe a ta, nangni chu nin iom chian hrang a ni,” a ti pehaia.

¹⁵RENGPA khan Mosia kuanga, “Itho sika ni ni insam mani? Israelhai hi fe zêl hrangin hrilhai roh.

¹⁶Ni khianghrol kha lângin lân, ni kut Tuipui chunga phar ro, tui irsen a ta, Israelhai Tuipui laia irnêngchâra an fe theina hrangin.

¹⁷Keima’n Aigupta mihai lungrîl inngartir pehai ki ta, khanchu irzûlhai mai an ti. Faroa le a sipaihai, a sakor tâli le sakor chung chuang mihaiin ni chôiirsâng an ta,

¹⁸Faroa le a sakor tâlihai le sakor chung chuang mihaiin an ni chôiirsâng tena chu Aigupta mihaiin keima hi RENGPA ki ni, ti inhre thei ta an ti,” a tia.

¹⁹Pathian vântirtôn Israelhai mân tianga fe ngai kha inhnung tiang a’rthon tâka, khaang khan an maton tianga irthokin sûm inding khom a’rthona an hnung tiang a om tâka.

²⁰Aigupta sipaihai le Israelhai kâra a hong om tâka. Zân sôtin sûm kâra a vâr insuakin, a dang tiang a zîng inchangin, khaang khan tûte irpan irnâi thei loiin an oma.

²¹Mosia’n Tuipui chunga a kut a phara; RENGPA’N zân sôtin nisua tianga phâivua a hong inhrângtira, Tuipui kha a sêm inkîrtira, khanchu Tuipui kha irnêng châr a hon changtira, Tuihai kha irsen chitin a oma.

²²Israelhai khan Tuipui sûng kha irnêng châr angin an fe tâka. Tuihai kha an chang tiang le vei tianga hrângin bang angin a hong om pehai tâka.

²³Aigupta mihai khan an irzûlhaia, Faroa sakor murdi le sakor tâli le sakor chung chuang mihai khan Tuipui sûnga khan an irzûl lûthai sa tâka.

²⁴Zîng kôl a hong irsal tôn chu sûm le meichok indinga irthokin RENGPA’N Aigupta sipaihai kha a zu ena, an char an dongtir pehai tâka.

²⁵An sakor tâli kehai a khek pehaia, fe thei ta loiin, khanchu Aigupta mihai khan, “Israel pâlhai kha masanhai ta ei ti, RENGPA’N a sanhaia, Aigupta mihai a idoipui a ni,” an ti tâka.

²⁶Khanchu RENGPA khan Mosia kuanga, “Aigupta mihai an sakor tâli le an sakor chung chuang mihai hi tuiin a hong dîl nôkhai theina hrangin ni kut kha Tuipui chunga phar ta ro,” a tia.

²⁷Mosia’n a kut kha Tuipui chunga a phara khua a hong vârin chu, Tuipui kha a luang balamin a luang nôk tâka; Aigupta mihai kha an kîr nôka; RENGPA’N Aigupta mihai kha Tuipui sûnga khan a pailûthai tâka.

²⁸Tui an luangtir nôk tâka. Khanchu, sakor tâli le sakor chung chuang mihai Tuipuia irzûl inlûttirtu Faroa sipai murdihai kha Tuipui khan a tân irhmang paihai ta.

²⁹Khannisianlân, Israelhai rêk chu Tuipui sûnga irnêng châra khan an fesuak ving theia; tui kha an chang tiang le an vei tianga hrangin bang a hong chang pehai ta.

³⁰Kha nî khan RENGPA’N Israelhai kha Aigupta kut ata an zôka, Israelhai khan Tuipui kama Aigupta mithihai kha an hmua,

³¹Israelhai khan RENGPA’N Aigupta mihai chunga thil roiinpui tak a itho kha an hmua, mipuihai khan RENGPA an ngîka; khanchu RENGPA le a suak Mosia kha an iam zôi ta.