Read Hrangkhol FESUAKNA 15 Bible Online

FESUAKNA 15 - Hrangkhol bible

FESUAKNA 15

¹Kha irzoiin chu Mosia le Israelhaiin RENGPA inpâkna hrangin hi hla hi an saka, “RENGPA inpâkna hrangin hi hla hih sak ki ti, Ama’n roiinpui takin an hnê tâk sikin, Sakor le a chunga chuanghai kha tuipuia a pai lûthaia.

²RENGPA chu ni changpuitu hrât tak a nia, Ki saninhringna a nia, ki Pathian a ni, ama inpâk ki ti, ki Pathian a ni, ama chôiindôm ki ti. Kin pahai Pathian a nia, a roiinpuizia hril kin ti.

³RENGPA chu irdoi mi a nia, a’rhming khom RENGPA a ni.

⁴Faroa sakor tâli le a sipaihai kha tuipuia a pai lûthai tâka, A sipai lian a sa murdi Tuipui Sena a pai lût zoi ta.

⁵Tui inthûk takin a ngîmhai tâka, an thûkna taka khan lung angin an tâk zoi ta.

⁶Ni kut chang tiang kha, O RENGPA sinthotheina roiinpuiin ni kut chang tiang khan, O RENGPA râlhai irsem darin.

⁷Ni roiinpuina liantak khan, nangma nang a doituhai an irhmang zoi ta; Ni ningmurna ni zuan suma, fapôl angin an kâng zoi ta.

⁸Ni hnâra phûkin tui an irhloma, Tuihai kha bang angin an indingtira; Tuipui inthûknahai khom a kang zoi ta.

⁹Râl kha irpâkin, irzûl ki ta, pha ngêt ki ti, râllâk sum sem ki ta, annia khan ki’rzukna murdi khopna hmu ki ti. Ki khandai kêlsua ki ta, ki kut leh anni thathai ki ti,” tiin.

¹⁰Ni phâivua kha nin sêmtira, tuipui khan a’rkhû zoi ta, tui inthûk taka khan sisâr tang angin an tâk zoi ta.

¹¹“O RENGPA nangma anga Pathianhai laia tu mo a om? Tu mo nangma anga irthiangna tianga roiinpui? Tu mo sinirkhêl le sin roiinpui ni isin anga sin thei?

¹²Ni kut chang tiang ni phara, khanchu irnêngin an volhai zoi ta.

¹³Nangma lungkhamna sika irtan sai tâk, ni mihai hruai ni ta; ni hrâtna’n ni omna hmun irthianga hruai intunghai ni ti.

¹⁴Nam tinin inhria an ta; ngîkin inthing an ti; Filistia omhai kha an milung kângpuihai a ti.

¹⁵Edom rama hruaituhai chitna’n sip an ta, Moab mi hrâthai insînain chelhai an ti, Kanaan rama mihai zâmirzal ving an ti.

¹⁶Chitna le ngîkna an chunga chum a ta, Ni bân irnakhrât khan lung angin omchian an ti; O RENGPA ni mihai an thang zoi mâka chu.

¹⁷Nangma’n hruai intunghai ni ta, ni tâng sîpa phun ni ti, O RENGPA nangma omna hranga hmun ni irfûktirna khan, O RENGPA, hmun irthiang ni kuta ni lei inding ta kha.

¹⁸RENGPA’N kumtuangin roirêl a ti,” tiin.

¹⁹Faroa sakorhai kha sakor tâlihai le a chunga chuang mihai leh khan tuipuia an tâk ving tâka, RENGPA khan tuikhanglian tuihai leh a hong vurhai nôka; Israelhai rêk chu tuipui sûng irnêng châra khan an kâi zoi ta.

²⁰Khanchu deipu Miriami, Arona farnu khan khuangte a kut leh a lâka, nupang murdi’n khuangte chôia lâmpuiin an zuia.

²¹Miriami’n, anni hrang hla a sak pehaia: “RENGPA chu inpâkin hla sak roi, ama khan inhnêna roiinpui takin an hnê tâk sikin; sakor le a chunga chuang murdi’n tuipuia an pai lût tâka.

²²Kha hnung chu Mosia khan Israelhai kha tuipui sena irthokin a hruaihaia, Sur ramchâr tiang panin an suak tâka; sûn thum sûng ramchâra khan tui hmu viat loiin an inzina.

²³Mara an itihna hmun an hong tungin chu tui kha a khâ pehai sikin in thei mahaia; khasikin a’rhming khom Mara ibe a ni.

²⁴Mipuihai khan Mosia kuang khan, “Imo kin i-in hrang tâk?” tiin an chiara.

²⁵Mosia’n RENGPA kha a sâma, RENGPA khan thing inkhat a’rhmua, kha kha tuia khan an dêngzuanin chu, tui kha a hong tui pehai tâka. Kha hmuna khan RENGPA’N an izôm hrang dân a pêkhaia; a fiahai saa.

²⁶“RENGPA ni Pathian hnuk irhâi kha ngûk takin irngaiin lân, a mit hmua a sa a iti murdi ni sina, ni pomin chu Aigupta mihai chunga hri ki inlêngtir ang khan ni chunga inlêngtir no ning. Keima hi RENGPA nang an damtirtu ki ni,” a tia.

²⁷Kha hnung chu Elim an itihna hmun an hong tunga, kha hmun khan tuihnâr sômhleihni le tûm kung sômsari a oma; tui kôla khan riakbuk irpuk an khôr ta.