Read Hrangkhol FESUAKNA 17 Bible Online

FESUAKNA 17 - Hrangkhol bible

FESUAKNA 17

¹Israel irbukkhômhai murdi chu Sin ramchâr ata an suak nôka, RENGPA thupêk angin hmun khat ata a dang tianga irthonin Refidim-ah riakbuk an khuara, khannisian kha hmuna khan mipuihai in hrang tui om maka.

²Khasikin Mosia kha an irkhalpuia, “Tui in zât ni pe ro,” an tia. Khante Mosia’n, “Itho sika nir khalpui moh nin ni? Itho sika RENGPA nin irkhalpui mo?” a ti pehaia.

³Khannisianlân mipuihai kha an tui an hrâl pehai hrai sikin Mosia chunga khan an la nuar pe maia, “Itho hrang sika mo nin nâihai le kin sahai leh hin tui inhrâla ni that hrangin Aigupta ram ata ni ni hong ihruai?” an tia.

⁴Khanchu, Mosia’n RENGPA an sama, “Hi mipuihai hi imo ki ilôhai ta hrang? lung leh ni dêng that hranga irsiam an ni tâka?” a tia.

⁵RENGPA’N Mosia kuang, “Mipuihai maton tiang fe’n lân, Israel ulianhai a sen a zâr hruaihaiin lân; ni khianghrol tiana tui ni vîkna kha ni kutin chôiin lân fe roh.

⁶Irngai ro, Horeb lungpui chunga son ni maton tiang lei ngîr ki ta; lungpui kha hong vîk ni ta, khanchu mipuihai in hrangin tui zuang luang zel a ti,” a tia. Khaang takin Mosia khan Israel hruaituhai mit hmua khan a thoa.

⁷Kha hmun irhming hranga khan Masa le Meriba a tia. Israelhai khan an bei sik le RENGPA hi, “Ei laia a iom mo a iboi mo?” an ti sika khan.

⁸Refidim hmuna khan Amalekhaiin Israelhai kha an hong doihaia.

⁹Mosia’n Josua kuang khan, “Eini lai ata mi inthang suakin lân, Amalek-hai nangtûka va doihai roh. Tâng sîpa Pathianin chôi mai hranga khianghrol intûkin lei ngîr ki ti.

¹⁰Josua khan Mosia iti ang takin a thoa, khanchu Amalek-hai doi hrangin a fesuak tâka, Mosia, Arona le Hura hai kha tâng sîpa an luia.

¹¹Mosia’n a bân a lâng insôt dôr kha Israelhai an hrâta, khannisian a bân an sumin chu, Amalek-hai an hrât ngai.

¹²Mosia a bân a kham pe tena chu, Arona le Hura khan a toi hmun hrang lung an hong chôia, kha khan a toi tâka; Arona le Hura khan a bân kha an indom pea, inkhatin kiangkhat tiang an indompui maia, misa tâk dênin a phar mai tâka.

¹³Khasikin Josua’n Amalek-hai a inhnêhai zoi thei a ni.

¹⁴Kha hnung chu RENGPA’N Mosia kuanga, “Hi thu hi inhriatmaina hrangin lekhabua irziakin lân, irvân hnuaia hin Amalek-hai an om ti khom inhre ta loi hrangin that irhmanghai ki ti, iti hi Josua khom hril ro,” a tia.

¹⁵Mosia khan maichâm a’rfûktira, a’rhming khom “RENGPA chu Jehova Nisi,” a tia.

¹⁶Khan, Mosia’n, “RENGPA puanzâr kha chôikâng roi! RENGPA’N Amalek-hai kha kumtuangin doi sunzom maihai a ti,” a tia.