Read Hrangkhol FESUAKNA 18 Bible Online

FESUAKNA 18 - Hrangkhol bible

FESUAKNA 18

¹Jethroa Midian ochai, Mosia tarpu kha Pathianin Mosia le a mihai thil a tho pehai zia murdi le, RENGPA’N Israelhai Aigupta ram ata a hruaisuak ziahai a le’nhriata.

²Mosia tarpu Jethroa khan Mosia dôngma Zipori, Mosia’n a itîrpai kha, a nâihai inhni a hruaihaia; inkhat irhming chu Gersoma a nia, “Mi rama om ki ni sikin,” a tia.

⁴Inkhat irhming chu Eliazara a ni, “Ki Pathian chu ni changpuitu a nia, Faroa khandai ata a ni saninzôk tâk sikin,” a tia.

⁵Jethroa, Mosia tarpu kha Mosia nâipasal hnihai le a dôngma leh khan Mosia kuang ramchâra a riakna Pathian tânga khan an honga.

⁶Mosia kuang khan, “Keima hi ni tarpu Jethroa, ni dôngma le ni nâipasal hnihai le kin hong,” iti chong a len thuana.

⁷Khanchu Mosia khom a tarpu lei don hrangin a’rthoka, a makunga a kûna, a poma, damhar thu an irdon irhlôma; khanchu Mosia puan in sûnga an lût tâka.

⁸RENGPA’N Israelhai sansuak hranga Faroa le Aigupta-hai chunga a sintho murdi le, lam laia intak tuang lamhai le RENGPA’N a saninzôkhai lam murdi chu Mosia’n a tarpu kha a hrila.

⁹RENGPA’N Israelhai, Aigupta ata a saninzôka, thil a lei itho pehai lam le an chunga satna tamtak sika khan Jethroa chu a lôm sabak tâka.

¹⁰RENGPA’N Aigupta-hai irthoka, Faroa irthoka, nangni saninzôktu chu inpâkin om ri se; ama khan Aigupta thuhnuaia om mipuihai chu a saninzôk ta hi,

¹¹atûn ata chu RENGPA chu pathian tinhai nêkin a roiinpui ual ti kin hriat ta, Israelhai hmusitin, khaang dôra dengintheiin, a saninzôk tâk sikin, a tia.

¹²Khanchu Jethroa khan thil inhlanin, a pum kai hâlirvôm le irbôlna hrang danghai a hong chôia. Arona le Israel hruaituhai murdi kha Mosia tarpu kuanga khan Pathian makunga bai fa hrangin an fe.

¹³Zîng nôka chu Mosia kha mipuihai roirêl hrangin a toia; khante mipuihai khan zîng ata khohloi dênin Mosia kôla an om maia.

¹⁴Mosia tarpu khan khaanga mipuihai hranga a sintho kha a hmu’n chu, “Mipuihai hi i ual mo ni itho pehai tâk? Itho sika mo sûn khat vaiin roirêltu’n ni toina zîng ata khohloi dêna mipuihai hi ni kôla an ingîr chian?” a tia.

¹⁵Mosia’n, “Mipuihaiin Pathian nuam lam irchu hrangin ki kuang an hong sikin ki itho ngêt a nang a ni, tiin a sâma.

¹⁶Thubuai i ma ni, an neiin chu ki kuanga hin an hong ngai, khanchu keima’n an tualbômhai an thubuai kha ki lei rêl pehai ngai, khanchu Pathian inkung le a dânhai chu ki lei inhriat ngai a ni,” a tia.

¹⁷Mosia tarpu khan, “Ni thil tho dân hi sa mah.

¹⁸Nangma leh hi mipuihai ni kuanga honghai hi sûn khat sûnga tho hrangin chu a intak hrai a ni.

¹⁹Atûn hin, ki chong hi irngai ta, thurôn nang pe ki ti; Pathian chu ni kuang om sianlân, Pathian makunga nang chu mipui irthûltu nin lân; nangin Pathian makunga thubuaihai kha intung thiaiin lân:

²⁰khan, dân irziakhai le dânhai chu anni irchutirhai ni ta, an sintho hranghai le, lam an ihrô hrang kha inkhîk irhmuhai ni ta.

²¹Kha no khomin, mipui laia irthok mi theithiam, Pathian chi mi, mi dikhai, fâkinrûk fel loi khôkmâk mihai inthangsuakin lân, anni chu sâng khat chunga roirêltu, irza chunga roirêltu, sôm ringa chunga roirêltu, sôm ruk chunga roirêltuhai ni hrang se roh.

²²khahai khan itiklai khomin mipui roirêl pe ri sehai, thu intak ual kai chu ki kuang hon tunghai sian, thu ol ualhai chu anni’n rêl infel ri sehai. Khaang khan nangma ta hrangin chu nang irzâng pe ok a ti; anni’n nang an isan hrang a ni.

²³Khaang khan ni thoa, Pathianin chong nang a pêkin chu tho thei ni ta, khaang khan mipuihai milung inchukin mâni in tiang an ichîn thei hrang a ni,” a tia.

²⁴A tarpu Jethroa thuhril chu Mosia’n a poma, a iti lam angin a thoa.

²⁵Mosia’n Israelhai laia mi kâmom u ual an thanghaia, mipuihai laia hruaitu’n a siamhaia, sâng chunga hruaitu le irza chunga hruaituhai, sômringa chunga hruaitu hai, sômkhat a bêhaia.

²⁶Khahai khan itiklai khomin mihai roi an rêl pehaia, thu intak ual kai chu Mosia kuang an intung ngaia, thu intak ok loi chu an bingin an rêl ngai.

²⁷Khanchu Mosia khan a tarpu kha an fetir tâka. A omna ram tiang a kîr nôk ta.