Read Hrangkhol FESUAKNA 23 Bible Online

FESUAKNA 23 - Hrangkhol bible

FESUAKNA 23

¹“Minlak chong ni inhriat hril indartir no’n lân, mi sual sanin thu dik loi hril no roh.

²Thil sual tho hrangin chu, tam ual khomhai sian zui no’n lân, milaka mi dang thiamno inchangtirnaa khom kop ual hliak no roh.

³Roirêlna hmuna inriang thiarthâk no roh.

⁴Ni irdoipui ngai sehrât mo, sakuartung moh a rot ni hmu’n chu, a kuang ni ikai intung pe hrang a ni.

⁵A sakuartung kha a puakin a del a ni’n chu, a sakuartung kai thoipui hrangin changpui ro, ni imâk rak hrang ni mah.

⁶Mi inriang kha roirêlna hmuna a ngîrin chu, thudik takin ni irngaitua pe hrang a ni.

⁷Minlakin mi dem no’n lân, mi tho inchâina nei loi kha ni ithat hrang ni mah. Tukhom thil saloi thohai kai chu theiloi ki inchangtirhai hrang a ni.

⁸Inthâmna rêng rêng ni ilâk hrang ni ma; inthâmna hin thil dika irthokin mit an chotir ngai. Tho’nchâina nei mihai chu chanlamboiin a siam ngai.

⁹“Ram dang mi dengintheiin ni inomtirhai hrang ni ma, nang khom ram danga Aigupta rama ni oma, a tuang intak lam nin hriat tâk sikin.

¹⁰“Kum ruk sûng chu ni loia chîmu songin a rahai chu irtik inlûthai roh.

¹¹Kum sarina kuma chu ni irngam hrang a ni, khatak ata chu ite farhli khom ni irtik hrang ni mah. Mi’nrianghai dong hrang a nia, an irtik zoi loi la om chu ramsahaiin an ifâk hrang a ni. Khaang khan grep le oliv loihai khom ni itho hrang a ni.

¹²Sûn rûk sûng sin zongin lân, sûn sari nî sûn chu sintho no ro, khanchu ni suakhai le ni sintho ram dang mihai le ni ram khomin irngam zoro an inei hrang a ni.

¹³Keima RENGPA nin kuang ki itih murdi hi lunghnâng tho roi, Pathian dang laia chu chongchai no unglân, an irhming lua sâm no roi.

¹⁴“Ni chôiirsângna hrangin a kum tin kût voithum hmang ngai roi.

¹⁵Abib tha, ki zoro inkunga, chol koploi bai kût hmang unglân, sûn sari sûng chu hi kûta hin chol koploi bai ite nin ifâk hrang ni mah. Hi zoro hin a ni, Aigupta ram ata nin hong isuak, khasikin chubai ni mûk hrangin kut korongin nin ihong hrang ni mah.

¹⁶Chîmu invâng thar Pentikos kût hmang unglân, kum hek tiang nin thil song murdi nin bûm zoi tika kairêng kût hmang sa roi.

¹⁷A kum tin hi kût voithum zoro hin, nin laia pasal murdi RENGPA nin Pathian chubai ni mûk hrangin nin hong inlang ngêt hrang a ni.

¹⁸“Chol kop bai chu ki kuang thil inhlan sa thisen leh nin inhlan hrang ni mah. Irbôlna sa inhlan mar chu, zîng khovâr dêna sia hrang ni mah.

¹⁹A kum tin ni chîmu ra maton tak a sa u ual chu RENGPA ni Pathian ina ni hong ichôi hrang a ni. Belra mo kêlte moh a nu dûttui leh ni ibut hrang ni mah.

²⁰“Nin zin sûnga hmun ni irfûktir kha, nangni intungtira, ni hrungin mahruaitu ni hrangin vântirtôn ki itîr hrang a ni.

²¹Ama chu irngaiinhlu unglân, a thu zôm roi. A chunga khan tehel ngai no roi, khaanga tho’nchâina kha ngaidam ni no ni; ama kha ki itîr a ni sikin.

²²A thu nin zôma, ki iti murdi hi nin zôma ni’n chu, nin râlhai nangni doitu ni ki ti.

²³Ki vântirtôn khan nangni hruai a ta, Amor hai, Periz hai, Kanaan mihai, Hiv hai le Jebus hai rama nangni hruai inlût a ta, anni chu that irhmangpai hrang a ni.

²⁴an pathianhai chubai nin mûk hrang ni ma; an sakhua khom nin ilâk hrang ni mah. An pathian chu nin insiat chit hrang a nia, an lung chopui khom nin ivîk siat pehai hrang a ni.

²⁵RENGPA nin Pathian chu chubai nin mûka niin chu bu le rotuiin sat nangni vur ki ta, nin lai ata natna irkiangtir ki ti.

²⁶Nin rama nu tukhomin nâi saloi vong no nihaia, irchi suanpâr boiin om no nihai. Hring dam sôtnahai nangni pe ki ti.

²⁷“Nin fena hrang mihai chu irtha’nvâiin inomtirhai ki ta, milung am invâiin om an ta, nin râlhai chu nin mân tiang laizâm len thotirhai ki ti.

²⁸An laia khuaipui insua ki ta; Hiv hai, Kanaan mihai le Hit mihai chu irzûl indarhai an ti.

²⁹Kum khat sûng rengin chu irzûlpaihai zit no ninga; irzûlhai khom inlân, ram rong ving a ta, nangni inbuai hrang ramsa an itam hrai hrang a ni.

³⁰Ram pumpui lua hrang mi nin om mâka chu, tôm pha phatin irzûlhai ki ti.

³¹Nin ram chu Tuipui Sena irthokin Mediteranean tuikhanglian kâr le ramchâr ata Eufrates vadung ten ni a ti. Kha rama omhai chunga thuneina nangni pe ki ta, hong nâi maiin nin irzûl suakhai hrang a ni.

³²Anni le moh an pathianhai leh moh khom thuthung ite siam viat no roi.

³³Nin rama khan hi mihai hi nin inomtirhai hrang ni ma; nin inomtirhaiin chu, ki chunga thil saloi nangni an inthotir hrang a ni. An pathian chubai nin mûk duaiin chu, nin ta hrangin thina châng nangni chang pe a ti,” a tia.