Read Hrangkhol FESUAKNA 24 Bible Online

FESUAKNA 24 - Hrangkhol bible

FESUAKNA 24

¹RENGPA khan Mosia kuang, “Arona, Nadaba, Abihua hai leh Israelhai hruaitu sômsarihai ki kuang hong luipuihai ro; hlatak ata chubai nin ni imûk hrang a ni.

²Nangma vai ti no chu, mi dangin an ni hong inâi hrang ni mah. Mipuihai len vâng chu tâng lua an hong ilui hrang ni ma,” a tia.

³Mosia kha a zuang chuma, RENGPA thupêkhai le an ivong hrang dân a irêl murdi an hril vinga, mi tinin, “RENGPA’N a iti murdi chu tho kin ti,” tiin an tia.

⁴Mosia khan RENGPA thupêkhai kha a’rziaka, zînga chu inrang takin a thoia, tâng kôla khan maichâm a siam irfûka, Israel nam om dôr lung chopui sômhleihni a phuna.

⁵Khan, Israel irchi ruathartehai chu a tîra, RENGPA kuang hâlirvôm thilinhlan an inhlana, irngeina thilinhlan hrangin sehrâtchalin an irbôl saa.

⁶Mosia’n sa thisen a chimrip a lâka, tâbora a siaa, a chimrip dang kha maichâma an theka.

⁷Khanchu thuthung irziakna bu chu a lâka, mipuihai inhriat hrangin inring takin a tepa, “RENGPA thu zôm kin ta, a thupêk angin tho kin ti,” an tia.

⁸Kha hnung chu Mosia khan thisen kha a lâka, mipuihai kha an thekhaia, “Thupêkhai nangni a pêk laia RENGPA’N Thuthung nangni le a isiam namindettu chu hi thisen hi a ni,” a tia.

⁹Mosia, Arona, Nadaba le Abihua hai le Israel hruaitu sômsarihai chu tânga an hong luia.

¹⁰Israelhai Pathian chu an hmua. A ke hnuaia khan safir lung siakhôm ang, a irtêkzia chu irvân ni ôm tak hi a oma.

¹¹RENGPA’N hi Israel hruaituhai hi na intuanghai maka, Pathian chu an hong hmua, khanchu hmunkhata fâkin an ina.

¹²RENGPA’N Mosia kuang, “Tâng sîpa ki kuang hong luiin lân, ni mi hong hruaihai irchuhai ro, ki dân le thupêk ki’rziakna lungphêk inhnihai nang lei pe ki ta,” a tih pea.

¹³Mosia a thoia, ama santu Josua hruaiin Pathian omna tânga khan a hong lui tâka.

¹⁴Mosia’n Israel hruaituhai laia khan, “Kin zuang kîr nôk mâka chu hi riakbuka hin ni lei nghâk mai roi, Arona le Hura khom hin an om, i mani thubuai infel zât nin neiin chu an kuanga fe thei nin ti,” a ti pehaia.

¹⁵Khanchu Mosia kha Sinai tânga a lui tâka, tâng sîp kha sûmin a tuam khapa.

¹⁶RENGPA ompuina vâr irkhêl chu tâng chunga khan a zuang chuma. Israelhai hrangin chu vâr kha tâng chunga meichok ang a ni. Sûm khan sûn ruk sûng chu a tuam maia, sûn sari nî sûn chu sûm laia irthokin RENGPA’N Mosia kha a koia.

¹⁸Mosia chu sûm kâra khan a lûta tâng chunga khan a lui tâka, kha khan sûn sômminli le zân sômminli a hong oma.